【正篇已貼完】新·學校女廁的激情『最後⛏️土中』: 開學日的煩惱

話口未完佢就坐咗喺詩敏後面個位上。
林：「喂！你哋嘈夠未呀！」
好明顯，一聽就知先生終於入到嚟課室，Oops，原來係佢，Miss Lam係一個好後生嘅先生，只係嚟咗三年，第一年教低form math，之後兩年已經教會考班，上年佢班嘅數學會考成績贏晒啲老鬼教師，尤其係A至C比率，教學方法獨立特行所以唔多受傳統嗰派歡迎，但就好得後生先生嘅歡心，而學生對佢嘅評價都幾兩極…
林：「嗱，我今日好唔開心呀下，知唔知點解？」
Miss Lam留住一頭負離子嘅黑長直髮，眼神帶住一絲絲嘅殺氣，同午夜兇鈴入面隻貞子都有幾分相似，不過佢啲頭髮唔係遮住隻眼而係中間分界，嗰種震攝力比起見鬼更令人忌諱三分，再加上啱啱條問題，成間課室當然回歸寂靜。
林：「你哋係咪返嚟見返朋友好開心呀？今日我又要開始返工…簡值欲哭無淚。」
從來只有俾先生話懶嘅我哋，第一次聽到有先生話返工辛苦，真係唔知講乜好。
林：「首先我要三個男仔落去校務處幫我攞嘢，有無人自願…好，真係無人舉手，重諗住有人舉就唔使佢幫手…咁，就你啦，磅數最重，應該可以負磅最多。」
豪：「係。」對住Miss Lam肥豪就好似pokemon隻皮皮俾人收服咗咁。
林：「唔使唔開心，畀樣嘢你玩，揀個男同學幫你啦！」


豪：「咁，志華啦。」其實我都估到。
林：「你又揀一個啦。」
我：「咁就麻煩一鳴啦。」
林：「好，搞掂，我唔落去喇，你哋自己搞掂，睇你三個款都係friend嚟㗎啦，唔好玩到俾人鬧，我都唔想俾人鬧。」
就係咁我哋三隻馬騮落咗去。
豪：「喂，呢個Miss乜料嚟㗎？」
鳴：「嚟得實係班主任嚟啦，教Math㗎，你可以問返中六啲師兄姐，好出名㗎。」
豪：「雖然奇奇怪怪，但我覺得佢好靚女。」
鳴：「諗都唔好諗，佢結咗婚㗎，聽聞老公好有錢。」
然後三個苦力搬咗三大疊嘢上嚟，我哋喺Miss嘅指示下將所有嘢放喺角位兩張枱上面。


林：「嗱，呢啲嘢第四年做㗎喇，你哋熟過我啦，有表就填，有回條就攞返去簽，書簿雜費自己識搞㗎啦…我唔派喇，你哋用個最有效率嘅方法傳開佢，然後開工啦，唔識填就問隔籬，除非你今年有兩個阿媽或者老竇，如果唔係唔好問我…」
講完佢就坐咗喺度郁都唔郁，係嘅…佢講得啱，呢啲嘢我哋應該識做。
第一件事係填學生登記表同手冊，填完就貼相，呢個時候我望住詩敏張學生相，而佢都即刻發現咗我嘅不軌企圖。
敏：「做乜呀？想攞啲女神相去賣呀？」
我：「點會呀…覺得好靚咋嘛。」
敏：「即係真人就唔靚啦，係咪？」
我：「梗係唔係，一樣咁靚！」
敏：「見你咁慘畀張你喇。」
我：「真…真下㗎？」
敏：「你都整返張嚟畀我啦。」


我：「吓？好呀…要嚟做乜…」
從來只有聽過男仔攞女仔證件相，我又唔係男神，要我張相嚟做乜？
敏：「點知你幾時激嬲我喎，到時就攞去打小人落降頭再寫欠債還錢貼通街三料夾擊。」
唔理喇，總之佢張相我係袋袋平安。
呢個時候Miss Lam睄咗我一眼…
林：「都搞咗粒幾鐘，如果交得就放出嚟啦，順便將你個名對返而家個位寫喺呢張紙度。」
又過多半粒鐘，小息鐘響咗Miss Lam就自己走人，大部份人都已經搞掂晒啲嘢，課室又回復一貫嘅喧鬧，同埋好多人要去其他課室交流，通常第一日都係咁，包括曉彤都即刻消失咗。
我：「詩敏，妳無嘢吖嘛？唔舒服？」
佢一小息就趴咗喺枱面上。
敏：「唔使理我…M痛緊…」
呢世人第一次有女仔同我講嚟M，即係點？係對我嘅信任？想我安慰佢？其實我唔知點好…只係知道千祈唔好叫佢飲暖水，因為我喺十萬個激嬲女朋友嘅方法入面學過係唔work。
坐喺度都無用，我正想起身出去抖下氣嘅時候發現褲袋震，於是我攞電話出嚟望望。
『哈哈，今日見返你真係好cute！』
我隨即有一種金田一或者柯南上身，覺得犯人喺某處監視緊我嘅感覺，我環視四周一次，當然一無所獲，而詩敏佢兩隻手喺枱面趴咗喺度，所以一定唔會係佢…點算，唔通我以後要每分每秒活喺恐懼之中？但…我無嘢可以做到…
突然之間我又灰晒…


如果第時我同詩敏喺埋一齊，而呢單嘢又爆鑊…認真不堪想像…不過…女神又點會咁易追到…其他女神難追可能係門檻高，要做好多嘢送好多禮物先得佢歡心，又或者要同其他男仔爭崩頭好似比武招親咁，但詩敏佢…係同你講追女神係一件好睇唔開好慘嘅事，唉，其實我都真係幾可憐，早知嗰日玩完就算…但唔得，我又點會捨得嗰日放學發生嘅事。
過咗幾秒一鳴就過嚟捉走咗我。
鳴：「喂，有得同女神坐做乜重一面死灰咁？」
我：「一齊坐啫，算得啲乜。」
真嘅原因又點可以講你知喎…
鳴：「真係諗住追女神？」
我：「呢層…我都…嗯…無錯，我要追佢！」
其實我唔多想認，因為我根本無從入手，但既然我都親口同佢講咗話要追佢，對其他人唔認嘅話就好似學咗猶大唔認耶穌咁，橫掂而家全世界都已經知道我同佢表咗白，佢都應該唔介意人哋知我要追佢嘅。
同一鳴落操場遊完個圈之後就上返去，見到曉彤佢坐咗喺我個位上面，黐到詩敏實一實，好似喺度安撫緊佢，原來佢兩個係咁friend嘅，我一直都唔知添，為咗唔好意思打攪佢哋謦欬我唯有坐喺肥豪前面吽下先。
彤：「知喇，還返個女神畀你喇…」
敏：「喂呀，唔好咁講啦。」
其實…我都無諗住一定要一齊坐，呢件事完全係社會嘅錯。
我：「嗱，畀妳嘅。」
敏：「薄荷糖？搞乜鬼？」
我：「我知道飲暖水係無用，雖然呢個都應該無用，頭先經過小食部是但買。」


敏：「喉嚨痛咩，梗無用啦，我唔會多謝你㗎。」
講就咁講，但佢就即刻放咗粒落口入面，而且面帶笑容，睇嚟我都錯唔晒，呢個時候Miss返嚟。
林：「係喎，我都重未自我介紹…我姓林嘅…欸…其實係咪要叫你哋敬禮㗎？」
我哋你眼望我眼…
「Good morning Miss Lam…」
林：「唉，好鬼麻煩，一陣你哋自己選男女班長同埋班會啦，敬禮呢啲自己搞掂…呀…第一日重有乜搞呢…欸，係咪要調位㗎？」
豪：「Miss Lam，其實唔調都得㗎。」
林：「多謝你嘅意見，即係要調啦。嗯，我想問下呢度有無組合係永遠唔可以坐埋一齊㗎？」
鳴：「應該就無喇，我哋咁融洽。」
林：「乜咁可惜，我最鍾意睇學生打架。」
呢個Miss真係完全令人無語。
鳴：「但係我哋呢度有組合係唔可以分開！」
林：「真係㗎！真係㗎！係邊度呀？」
Miss佢扮到一面天真港女興致盎然，其他同學就露出一副無辜嘅微笑嚟回答佢，然後好明顯佢都知道我同詩敏係異類，表情已代表一切。
林：「好啦，咁我識做㗎喇，我落去教員室幫你哋調位啦，你哋自己選班會班長啦。」


無人駕駛…都唔知係好事定壞事，總之我而家麻煩事纏身當然乜都唔想做；嚟到中四，班入面嘅人大概識六七成到啦，除咗我因為嗰件事而搞到街知巷聞…而詩敏呢啲女神級別就當然係人都識。
班長呢啲就擺到明係免費義工，我其實有啲驚㗎，今朝已經俾佢哋玩咗一劑，容乜易唔夠喉再過多我一棟，好彩有另一個唔熟嘅活躍份子請纓做男班長，至於女班長，理科班男多女少，喺無人想做嘅情況下女神就特別容易被target。
我就當然唔想啦，如果佢係女班長，我寧願我做男班長，但我無理由而家趌個頭出嚟同人爭㗎；而詩敏個樣都好似唔多想做，奈何喺眾人壓力之下好多事情其實無乜選擇餘地。
彤：「無人想做嘅話我做啦！」
真心好朋友喎，英雄救美添。
之後最百厭最多諗頭嘅肥豪俾人屈咗做班會主席，順理成章就屈埋我哋班親信做幹事，是但啦…班會呢啲好閒啫。
過咗一陣Miss Lam佢就返返嚟。
林：「搞掂！大家出嚟跟住呢張表執位啦！班會就自動自覺幫我整個坐位表出嚟。」
其實都知呢個Miss Lam無好帶挈，本來我同詩敏坐喺窗邊都無咁揚眼，而家俾佢set咗喺課室嘅正中間，詩敏喺我右手邊，我前面係曉彤，後面係一鳴…睇嚟有啲嘢唔到我唔化，而女神佢就無乜反應。
開學日中午就放學，搞掂晒啲無謂嘢之後Miss Lam已經懶得理我哋等放工，由得我哋同新同學互相認識下…
鳴：「你識唔識坐我隔籬個女仔？」
佢哄埋嚟喺我耳邊講。
我：「唔識喎，連你成日研究女仔都唔識？」
佢隔籬個女仔，係一個短頭髮髮長到頸嘅女仔，前陰平平碎碎，兩隻眼亮晶晶秋水明眸咁，兩弧眼眉長而深，鼻哥都幾高，瓜子臉配合比較纖巧嘅身型，都幾清秀下，但心口又唔係平胸；點講好呢，佢唔係女神型，而係暗盤美女型；但…好似有印像見過佢，又完全唔知佢係邊個。
於是我走去左前前個位問肥豪，佢又唔識。


肥豪隔條冷巷左左嘅Tamama都係一樣。
好在我行來行去Miss Lam都唔鬧我。
返到嚟原位我又問埋曉彤，既然而家知道曉彤佢就係中一坐我前面嗰個女仔，以前我都成日同佢謦欬兼玩佢頭髮，咁而家都唔怕開口問佢。
我：「曉彤，妳知唔知坐我右後面個女仔係邊個？」我唔話一鳴隔籬因為佢同一鳴啲班別三年都係對死佢都未必識一鳴。
彤：「做乜呀？起痰呀，唔追女神嗱？」
我：「咪玩啦，一見鍾情咩…我哋無人識佢，睇妳識唔識咋嘛。」
彤：「唓，識你都唔認得人啦，我唔識喎。」
咁都要串一串我…然後我望下詩敏佢個樣好似重係唔多舒服，而且我唔想開口喺佢面前提其他女仔，於是我擰個頭去後面，望住一鳴擰擰頭，佢好似有啲失望。
點知呢個時候佢隔籬位靚女望住我哋，重開口。
「你哋係咪講緊我呀？」把聲溫柔得嚟重帶甜。
鳴：「唔好意思呀…我發覺我哋識嘅人都無同過妳同班，所以就…」
「咁就梗係啦，點會同過班。」
鳴：「吓…點解？」
詠：「因為我係repeat㗎囉，咁又點會同你哋同過班呢，我個名單字一個詠，英文名叫阿Wing。」
乜話…中四都repeat，係乜嘢原因呢，通常係中五會考炒粉先re嘅啫，而且睇佢個樣都唔係差到要repeat嗰啲類型。
詠：「唉，我知你哋喺度諗乜，我唔怕講埋啦，我今年五月大病咗一場，無返兩個月學連大考都考唔到，我唔想咁匆忙去考會考，同學校商量完咪讀多年囉。」
鳴：「咁大件事，妳好返晒未呀，無事吖嘛？」
詠：「好返晒喇，多謝關心。」
鳴：「咁妳咪好慘囉，自己啲friend升晒班，嚟到呢度一個人都唔識…」
一鳴雖然無拍過拖，但同女仔吹水嘅功力都係一流嘅，啱啱識人就可以無拘無束咁謦欬。
詠：「無辦法啦，自己前途緊要啲吖嘛…呀，我呢度識一個人嘅，呢個囉！」
詠佢指住我，吓！唔係掛？唔好亂扣我帽子喎，我都唔識妳，一陣詩敏佢有乜誤會點算…
鳴：「吓？妳識志華？」
詠：「呢個傻瓜追緊呢個女神吖嘛，我以前嗰form個個都知啦。」
彤：「噗…嘰嘰…嘰嘰嘰嘰…」
我無聲出，而女神佢係若無其事…
詠：「無所謂啦，你哋幾個好似幾熟咁喎，如果可以就麻煩你哋幾個之後好好照顧小妹。」
明明係姐姐，就稱呼自己為小妹，佢都真係…不過一鳴又好似好受落咁，塊面紅晒…
鳴：「唔敢當，以後我哋多多指教。」
自古有云，近水樓台先得月，中學時大家都係青春期，精力旺盛，只要一個唔小心自然就同坐隔籬位嘅異性變成乾柴烈火，再電多幾下就可以燒到烘烘聲，除非你太廢啦，又或者隔籬嗰個真係哽唔落…但我望一望隔籬，唉…
今日放十二點幾，詩敏曉彤屋企有飯食，所以我哋決定聽日先一齊食lunch，應該話我同一鳴兩個一陣自己食。
我：「詩敏，妳唔怕咁樣張揚得滯咩？」
敏：「重好講，我今次真係俾你害死，成件事係你攪出嚟，而家真係唔方唔出晒名。」
我：「我都控制唔到㗎…肥豪佢…」
敏：「咁無人叫你揀我㗎嘛，火都嚟！」
M到嘅女人真係唔好惹，但佢又唔想出名，又叫我送佢返屋企，都唔知為乜，唔通真係想人幫佢搦書包？不過佢又講得啱，而家連先生都玩埋一份，想避都避唔到…
我：「曉彤，妳…做乜又跟埋嚟…」
彤：「乜嘢跟埋嚟呀！你估我好想做電燈膽！」
敏：「唏！唔好亂講，我同呢隻嘢無任何關係㗎，係喎，費事咁礙眼，妳掉埋個書包畀佢啦。」
彤：「嗱，攞住！我同詩敏住同一棟㗎。」
係…原來係咁…唔怪得咁friend。
彤：「咁佢算唔算係妳隻兵呀？」
敏：「我唔收兵㗎喎，係佢自己黐埋嚟咋，如果妳想要兵我借佢畀妳用囉。」
彤：「下？咁都得？」
敏：「佢話佢聽話吖嘛，應該我講一聲就得。」
妳哋…知唔知販賣人口係犯法㗎。
敏，彤：「聽日見，bye！」
就係咁，我攞住三個書包送到佢哋返屋企，然之後再上一鳴度，條友仔已經買定兩盒焗豬等緊我，重趁佢細佬未返嚟一路食飯一路打hgame。
我：「嘩，你連個賣魚妹姐姐都溝呀？」
鳴：「乜嘢呀，人哋有名㗎，叫麻紀呀，咁啲學生妹同學爆晒機咪到佢囉。」
我：「你覺唔覺得佢似某人？」
我潷一羹飯入口一邊講；麻紀係一個紫色短頭髮好爽朗嘅賣魚檔太子女，平時會著住牛仔褲工衣加條圍裙。
鳴：「你…都咁覺得呀？」
我：「你咁快心動？沉船嗱？」
鳴：「乜喎，先識咗人一日，你估我好似你咁衝動呀？」
我：「乜喎，我識咗詩敏三年㗎喇！」
鳴：「三年做過啲乜吖？無吖嘛！講完一句鍾意人哋就話要追女神，女都未溝過我睇你今次點死！」
我又真係駁唔到喎，吹脹，不過而家可以同女神坐下，謦下欬都算係咁啦，而且重有嗰日發生嘅事…溝唔到都無乜辦法，我連佢諗乜都唔知，但就算明知會失敗，我都想試下。
我：「頂…重食緊飯㗎…」
條友啱啱攻略完麻紀，個賣魚妹姐姐捉咗主角入魚檔入面，真係唔方唔腥上加腥，除完圍裙就到工衣，牛仔褲，原來著到密密實實嘅姐姐入面係咁大波，連粒lin lin都特別脹，爽朗嘅佢直接推冧主角騎咗上去…唔通…呢啲就係姐姐嘅魅力。
真係好豪放，同啲怕羞嘅學生妹完全唔同，喺一輪enter制之後好快就成個肚都係精液…而現實上，我當然睇到佢條褲搭棚塔到IFC咁，當然我都唔好得幾多…
我：「我醒起有啲嘢做返上去屋企先…」
鳴：「嗯，好呀…」
正所謂阻人打J要BBQ，我都識相快脆啲走人，希望佢唔會俾細佬撞破啦；不過睇佢咁玩，原來唔同女仔都真係有唔同嘅魅力，各有特色，如果唔係俾人迫上梁山，我唔明點解要追女神。
但，我覺得我真係鍾意咗女神…
返到屋企換衫攞部電話出嚟睇…
『送兩個靚女返屋企，不得了呀～』
好似，我嘅一舉一動都俾人監察緊…呢個人有無可能係曉彤？算，無意思，通街都睇到我攞住三個書包，任何人都有可能。
我：『妳到底想點？』
『呷醋呀～,,Ծ‸Ծ,,～哼哼哼～』
我真係想嗌救命，呢個到底係妹妹仔，定係點？我記憶中都無得罪過女仔又或者邊個對我好有興趣，要錢，要玩咪直接出聲…點解要咁對我。』
我：『唔好呷醋啦，我聽晒妳話，好唔好，妹妹？』
『咁就梗㗎喇，如果詩敏係你女神，我就係你嘅神，如果我要你跪喺度，你有得反抗咩？』
我：『我跪咗喺度，請問神有乜吩咐？』
『開學好多嘢忙，過幾日先同你慢慢玩～(#ﾟ⊿`)凸』
我：『求下妳，點攪我無問題，唔好攪我身邊嘅人得唔得？』
點算…我係咪應該同詩敏坦白呢件事？但如果佢知道咗我做埋啲咁變態嘅嘢，應該就一切都會完結；其次，我同佢根本就無乜關係，有乜資格要佢分擔我啲煩惱。