因為我個仆街老豆 我被下了一個賓周會變短的詛咒: 後記七. 知道後應該要做的事
兩個月後，當把家寶一切的後事和自己的心態安頓好後，我終於鼓起勇氣來到了澳洲這地方。事實上，家寶去世，兩名子女又已經成家立室，香港已沒有甚麼讓我放不下的事情，所以我毅然來到這個國家，然後好好思考一下接下來自己能做的事。
首先最重要還是要先知道欣欣身處的位置和她的近況，雖然自己間中還是有定期send message給欣欣，但三十多年除了雙藍剔外這我確實從沒得到過對方的任何回覆。之前能大概知道欣欣的狀況，還是要靠郭靖略為隱晦的訊息。
通常他在每年新年都會send一句”新年快樂，一齊安好”的賀年說話給我，那我便至少知道欣欣現在一切安好。不過亦正因三十多年來郭靖還需要用這方法和我互通消息，雖然我沒有問，但大概都能猜想到這些年我們的情況還是沒有改變，欣欣還是一直介懷著我的事，不然我們應該不用再靠這簡潔的對話方式聯絡。
知道他們之前是居住在Melbourne，我在酒店settle好後終於撥了一個多年沒撥的電話。
「郭靖?」
「乘風?」
三十多年沒聽過這老友的聲音，我們各說了兩個字後，便久久都不能再出聲。
「你幾好嗎?」經過了接近一分鐘的沉默，還是我忍不住先出聲。
「哈，去到哩啲年紀，無病無痛就已經算好好㗎喇...」的而且確上了年紀便會明白健康確實很重要。
「都係嘅... 其實我依家係Melbourne。」因心急我直接說出。
「... 為咗佢?」而郭靖一下子便猜到我的用意。
「嗯... 有可能嗎?」我試探問道。
「見面講。你住喺邊? 比個地址我。」
於是我把酒店地址轉發了給他，然後晚上我們在三十多年後終於再次碰頭。
當年大家還只是一個黃毛小子，現在再次見面卻已是一個六十歲的老頭子，當中的反差實在是太大，只不過二人還是能一眼便能認出對方。
「兄弟...哩三十幾年嚟辛苦你喇，多謝...」心頭一熱我主動上前抱著郭靖說道。
「傻啦...我從來唔覺得苦，只係替佢苦...」他回抱著我然後像替她訴苦地說起她。
二人又陷入相對無言。
「咁佢近排幾好嗎?」我鼓起勇氣問道。
「我...聽日帶你去見佢啦。」意想不同的答案，讓我下意識忽略了郭靖其實並沒有正面回答我的問題。
「我真係可以去見佢?」不敢相信讓我想再三確認。
「嗯... 」郭請答道。
「咁你可唔可以大概講下佢哩三十幾年發生嘅事?」我問。
「欣欣畢咗業後做過一段時間記者，之後有一次因為採訪咗一間孤兒院佢覺得啲小朋友好慘，於是無耐就決定辭職然後全職去孤兒院嗰邊幫手，一做就做咗三十年喇...聽日我就係帶你去嗰度搵佢。」
「佢一直都係咁有愛心同咁鍾意小朋友...」從前的欣欣就已經是這樣的一個人。
「係呀，佢好受小朋友歡迎㗎~依家好多細路大咗就算有無成就都好，都成日返嚟探佢同買嘢比佢㗎，話佢係鎮院之寶都不為過~」郭靖笑著驕傲地說道。
「咁...佢哩三十年嘅感情生活呢?」我再問另一條自己一直關心的問題。
「勁囉，想追佢嘅男仔真係可以由一條邨排到去另一條邨，只不過無一個可以令佢say yes咁解...」郭靖苦笑著說道。
「連你陪咗佢咁耐都唔得?」我驚訝。
「你都知嗰張相係假㗎啦...感情嘅嘢從來無得勉強嘅，何況我同佢嘅性格本身就差天共地... 而且你明明自己最清楚背後嘅原因...」郭請無奈說道。
「唉... 除咗多謝我真係唔知仲可以講咩好...」我只能同樣無奈說道。
「又多謝? 我完全係為自己唔係為你囉... 」他露出了一個不屑的表情，不過我知是裝的。
「我知...但都係要多謝，同埋好彩欣欣可以有你一直陪住佢...」
「我地都六十歲喇，仲諗咁多哩啲做咩呀? 好好地開開心心過埋剩低嘅日子咪算囉~」不想氣氛再那樣沉重，郭靖突然轉了語氣。
「你啱，都咁大個人，其實仲有咩睇唔化?」
「係囉，講下你哩三十年有咩趣事我聽好過啦~ 其他人又點?」
這晚我和郭靖談到夜深才離去。到第二天，郭靖便駕車把我帶到山上欣欣所住的孤兒院。
越接近目的地，我就越緊張。三十多年沒見欣欣，不知她變成怎樣呢? 是不是真的預備好再見自己? 自己到時會不會惹她不高興?
終於，謎底很快便可以揭開
進入孤兒院不久，我看見了一個婆婆正蹲底安慰著一個哭得滿臉淚水與鼻涕的小朋友，感受到那種既陌生又熟悉的氣場，我知那便是她。
(欣欣...)
昔日活潑可愛的小妹妹如今已是一個五十多歲的阿姨，幸好她的臉上雖然難以避免佈滿了各式歲月的痕跡，但至少並沒有任何蒼老和老態龍鍾的感覺。不過除了臉上還能依稀看見當日的輪廓，我發覺自己竟再找不到二人相同之處，淚水又不爭氣開始緩緩流下...
「靖哥哥?」欣欣終於留意到不遠處站著的二人，微笑著打了個招呼。
「欣欣你好呀~」郭靖回禮。
「做咩今日咁好嚟探我呀? 哩位係?」欣欣看見我後問。
(哩位係? 佢唔知我喺邊個?) 對於欣欣的問題，我簡直不敢相信自己的耳朵，難度是在生我氣所以扮唔記得我?
「佢係李乘風喎，你個乘風哥哥，你真係唔記得佢?」郭靖略帶緊張地問道。
「乘風哥哥? 邊個嚟㗎? 你以前啲同學?」欣欣一臉天真的答案卻讓我發瘋。
「欣欣! 我係乘風哥哥呀，唔好玩啦，雖然三十幾年無見，但你點會唔記得我呀!」我再忍不住上前搭著欣欣雙肩開始詢問著她。
「先生，你冷靜啲先，我真係唔識你呀，你唔好咁啦，一陣嚇親啲小朋友呀!」欣欣有點生氣並把我的手撥開。
「乘風你冷靜啲先，我再解釋比你聽... 欣欣你去忙先啦，我同佢傾幾句之後再嚟搵你...」郭靖見我有點失控便把我帶離現場去到一個沒人的地方。
「點解會咁㗎? 佢有咩可能會唔記得我㗎! 郭靖你話我聽發生咩事? 佢係咪仲嬲緊我所以扮唔識我?」我緊張地捉著郭靖問道。
「佢唔係扮，佢係真係唔記得咗你... 對唔住，哩幾年我驚你擔心所以其實一直暪住你...」郭靖略帶歉疚地說。
「到底發生咗咩事?」
「大概三四年前左右，有一日欣欣突然頭痛暈咗入左醫院，但醒返後做過一輪檢查都發覺唔到有咩問題於是好快就出咗院。出院後欣欣似乎咩事都無，直至過咗一排我先發覺欣欣好似完全無晒關於你嘅記憶... 於是我再偷偷搵醫生，醫生話佢個腦掃瞄完全無異常，但聽完我講你地嘅關係後，佢話可能係欣欣一直太掛住你太痛苦，所以潛意式啟動咗自我保護機制，將所有關於你嘅記憶都消除咗，之前其實都有類似嘅案例發生過...
我本身有諗過嘗試幫佢恢復你嘅記憶，不過諗諗下又覺得話唔定咁欣欣可以開心啲，所以最後就放棄咗... 因為驚你會擔心同唔開心，而且咁或者對大家都好，所以我就一直無同你講，對唔住， 只係我無諗過有一日你突然會嚟澳洲...」郭靖解釋。
「唔怪得你肯帶我嚟見佢啦，原來佢一早已經唔記得咗我...」對於自己對欣欣造成的傷害，我真的很痛心和內疚...
「其實我帶你嚟見佢，仲有第二個原因，我都想知欣欣見返你後會唔會可以刺激到佢恢復返記憶...」郭靖又說。
「如果唔記得我對佢係好事，咁點解又要恢復返記憶?」我不太明白。
「因為近排我發覺欣欣除咗唔記得你嘅嘢，亦開始慢慢唔記得其他嘅嘢... 我問過醫生，佢話可能個自我保護機制失衡所以開始影響埋其他記憶，但如果可以令佢恢復返關於你嘅記憶破壞個防衛意式，話唔定可以刺激到佢個腦好得返... 不過我又諗如果佢真係記得返你，佢又會再一次痛苦過， 所以我都好矛盾...」郭靖擔憂地解釋著。
「其實今次我過嚟搵佢，係諗住只要佢願意，我餘下嘅人生都會一直陪住佢...」為了解決郭靖的矛盾，我如實說出自己來的決定。
「你講真?」郭靖果然立即面露喜色問道。
「嗯... 我同家寶都欠佢太多， 我地都好希望襯仲有時間，可以彌補得幾多就幾多... 我好希望至少佢餘下嘅日子，都可以開心幸福咁過...」
「咁就好了! 乘風，你一定要幫欣欣恢復記憶呀... 唔係我驚佢真係慢慢會連所有其他嘅嘢都唔記得晒...」郭靖激動地搭著我雙肩說。
「放心，為咗欣欣我一定會盡全力...」