因為我個仆街老豆 我被下了一個賓周會變短的詛咒: 73. 各自追求的幸福
四年後，一間古典的教堂門外。
「原來Miss Lui先係你嘅第一個... 唔怪得當日你寧願錫我都唔肯講啦! 我當日嘅犧牲總算不枉呀... 不過Missie都溝到，XX中學第一男神，你果然當之無愧!」其中一名兄弟肥仔一臉佩服地對新郎說道。
「千算萬算，我都真係無咁諗過…不得不寫個服字比你呀偶像!」另一個兄弟Johnny亦附和。
「邊夠你犀利呀~ 咁快個仔都就快讀小學，又攪掂咗昔日校花~」新郎笑笑口回應著，明顯地他亦深深以此為傲。
「我最自豪其實唔係溝到校花，而係可以令佢成為唯一一個無慘遭你毒手嘅校花，你唔好以為我唔知你啲威水史…」Johnny搭著新郎膊頭笑吟吟細聲說道。
「Shuuuuu!! 今日唔好講哩啲嘢，唔係我會死得好慘㗎!」新郎立即膽怯地望了一望遠處新娘的方向和其他兄弟。
「你地鬼鬼祟祟喺度講咩呀?」小強見二人咬頭接耳不滿問道。
「無嘢呀~」二人異口同聲答道。
「係呢，你仲未搵到郭靖?」Johnny這時又細細聲問道。
「未呀…Whatsapp 有send message比佢，己讀不回...」提起另一個兄弟，新郎亦只有無奈。
「唉…點解兄弟結婚都唔肯返嚟㗎…」Johnny失望說道。
「唔緊要啦，知佢過得幸福就得㗎喇~」新郎則露出一個無奈但又放心的笑容說道。
故事回到大半年前
------------------------------------------------------------------
有感於Miss Lui年紀已經不少，所以李乘風就算覺得自己年紀尚少，還是決定要向Miss Lui求婚。本以為一定成功，雖知Miss Lui卻沒有立刻答應。
「一日未知欣欣消息同佢過得好唔好，一日我都唔會應承你…」
雖然心裏萬分願意，但Miss Lui知道一旦自己應承了，欣欣便難再有機會，所以一日未確定到欣欣的近況，一日她都不願意答應李乘風。
「都已經三年幾， 個傻妹仲係唔肯理我…」事實上李乘風亦很氣餒，三年來他沒放棄過，但亦從未試過不失望。
「我唔理，哩個係我唯一條件…」只是Miss Lui對此十分堅持，絕不讓步。
「咁我再努力試下啦...」
沒辦法下，李乘風再次來到陳生陳太家中。
「陳生陳太，我求下你話比我聽欣欣近排點啦… 我知佢一定要搵過你地㗎…」李乘風哀求著。
「乘風… 唔係我唔想話你聽，但欣欣落過死令唔比我地同你講…唔係佢會半年都唔打比我地㗎...」陳太為難地答道。
「我求下你地… 我只係想知佢過得好唔好咋…」沒法下，李乘風直接跪了在地上。
「你唔好咁啦… 唉，好啦，我偷偷地比張相你睇你就明㗎喇…」陳太說完便入房拿了一張相片出來。
相中，欣欣正緊緊抱著郭靖，二人都露出一臉幸福的樣子。
「哩張相係半年前佢寄比我地㗎，但就話唔好意思同你講…」陳太說道。
「傻妹… 見到佢幸福我就開心㗎喇… 多謝你地呀陳生陳太!」看完相片，知道欣欣正幸福地生活還和自己好兄弟郭靖一起，李乘風替他們高興的同時亦一臉滿足地和陳生陳太說再見然後離開了陳宅。
而和Miss Lui說出自己所見後，Miss Lui雖然有所懷疑，但亦終於答應了李乘風的求婚。
------------------------------------------------------------------
「李乘風，你願唔願意娶呂家寶為你合法妻子，一世愛她、忠誠於她，無論她貧困、患病或者殘疾，直至死亡?」
「我願意!」
「呂家寶，你願唔願意嫁李乘風為你合法丈夫，一世愛他、忠誠於他，無論他貧困、患病或者殘疾，直至死亡?」
「我願意!」
「我現在宣佈，你們二人正式成為合法夫妻~」
「家寶... 我終於娶到你喇~ 以後你唔可以再離開我!」新郎情深款款地對新娘說。
「傻瓜~ 我根本從未離開過...應承我， 以後我地要代替K同Cream，幸福咁生活落去呀~」新娘同樣一臉幸福甜甜地對新郎說。
隨著眾親朋戚友的熱烈掌聲祝賀，李乘風和呂家寶在眾親友面前熱吻起來，並終於成為了真正的夫妻。
「家寶，李乘風，我終於可以親眼見証到你地一齊喇…. 我真係好開心呀!」望著新郎新娘幸福的樣子，姊妹Daisy哭成淚人，這刻她才終於可以從多年愧疚之中完全走回出來。事實上自那件事起，她亦因內疚而陪Miss Lui同樣單身了這麼多年。
「傻瓜~ 不過以後無人幫你煮飯喇，所以你都係快啲搵返個識煮飯嘅男朋友，然後好快到你㗎喇!」Miss Lui明白Daisy的心情笑著說道。
「Daisy其實你都算係我地嘅媒人嚟㗎，嗰陣唔係你教路，我可能都追唔到家寶~ 所以我地可以好似依家咁幸福，你都有唔少功勞，多謝你呀!」知Daisy的心結，李乘風亦故意想幫她解開。
Daisy心裏感激，但已哭得做不了任何回應。
「乘風，恭喜你呀，睇住你成家立室，你媽咪喺上面都一定老懷安慰~」這時陳生陳太走近了他們恭賀道。
「多謝你地呀陳生陳太，多謝你地由細到大對我嘅照顧， 對我嚟講你地就好似我另一個父母咁…」
本身因為自己已經無親無故，李乘風有想過找陳生作自己的主婚人，只但係他一想到自己和欣欣的關係，又覺得這好像不太恰當，於是最後便放棄了。
在和李乘風影完相後，陳生陳太走到一旁少人的位置。
陳太: 「乘風雖然無緣做我地女婿，不過由細睇到佢大見到佢依家終於都成家立室我都好替佢開心， 只係害苦咗我地個寶貝女啫… 唉，你話我地個傻女為咩呢? 好彩都總算完成到佢交帶嘅嘢。 佢真係好了解乘風，連佢結婚之前會跪我地佢都估到...」陳太欣慰的同時亦難免有點埋怨。
「子非魚焉知魚之樂? 欣欣有咁嘅決定，我地做父母嘅都只可以尊重…而且你無留意到乘風自從嗰晩甚至去到今日都無再問過我地欣欣嘅嘢? 照我睇，嗰日佢見到張相後露出嗰個滿足同安心嘅樣，好可能都只係專登做比我地睇，然後再經我地傳遞比佢想傳遞嗰個人知…」陳生的眼裏卻正閃爍著智慧老人的光芒緩緩說道。
「又係喎! 都係你睇得透徹… 哩兩個細路，真係由細到大都係咁…」陳太無奈說道，但卻再沒埋怨。
在和親友在教堂外影結婚相的時候，李乘風突然留意到遠處一個認識的面孔正拿著相機像在偷拍著甚麼。
「家寶，你等我一陣...」李乘風交待完便跑了過去。
誰知那人察覺到便想逃走。
「劉俊業，你唔好走!」李乘風一邊追一邊叫道。
幸好經過再三努力，對方終於不支放棄了逃跑。
「乘風哥...」劉俊業不好意思地叫道。
「做咩要走?」李乘風邊喘氣邊問道。
「見你想追我我咪走囉...」
「...」
「...」
「你知我今日結婚?」李乘風再問。
「唔知呀，咁啱經過見到有人結婚咪望下...點知就見到原來係你...」劉俊業眼神閃爍地答著，明顯不懂得講大話。
「咁你無嘢想同我講?」李乘風沒有拆破再問。
「恭喜晒...」劉俊業接著說了句。
「無了?」李乘風望著劉俊業再問。
「無喇...」劉俊業望著地面答。
「… 咁哩幾年你有無見過欣欣?」李乘風只好再直接問。
「無...」劉俊業帶點傷感地答。
「咁多謝你嘅祝福...拜拜。」李乘風說完失望地轉身離開。
「乘風哥!」不過過了一會劉俊業又突然追回他叫道。
「做咩?」
「我有樣嘢想同你講... 其實四年幾前你見到我同欣欣喺時鍾酒店出黎嗰次，係欣欣求我做齣戲去呃你㗎咋...」劉俊業帶著點內疚說。
「你可唔可以講詳細啲?」李乘風只是平靜地問道，彷彿並不意外。
「原因其實我都唔知... 有一晚佢突然喊住咁打比我，話求我幫佢一個忙，就係要同佢扮去時鍾酒店兩個鐘。我同佢喺上面乜都無做過㗎，之後佢收到個message後就專登扮拖住我咁離開咗間酒店... 佢當時千叮萬囑叫我唔可以同你講， 點知再過多個幾月，佢就突然同我講多謝然後拜拜話要去澳洲了...」劉俊業傷感地說。
「...咁點解今日又同我講?」李乘風續問。
「因為我見你都結婚，同埋我唔想你誤會欣欣係啲咁隨便嘅女仔...我唔知你地發生咗啲咩事，但我知欣欣真係一直都好鍾意你...由我中學識佢開始，佢就成日都講住你，而佢同你一齊嗰年幾，係我見過佢最開心最幸福嘅一段時間... 我知依家講哩啲都無意思，但我只係希望你唔好誤會佢同討厭佢...」劉俊業說道。
「多謝你話比我知... 放心啦，無論佢做咩都好，我哩世都唔會討厭佢㗎... 而且...我又點會分唔到佢嘅笑容係真心定係假?」李乘風的聲線亦同樣傷感。
「咁就好...」劉俊業鬆了一口氣。
「仲有... 如果你要send我嘅結婚相比佢，搵張近啲影㗎啦，你頭先行到咁遠影點影得清楚呀...我專頭send張比你交差啦。」隔了一會李乘風又說。
「你…點知㗎?」劉俊業十分驚訝李乘風知道他的目的。
「因為我係佢嘅乘風哥哥… 同埋劉俊業，我欠你一聲對唔住…」李乘風說完拍了一拍劉俊業的膊頭便轉身回去婚禮現場，只是劉俊業看不到李乘風的臉已滿是淚水。
(欣欣...雖然我唔知你點解會知... 但多謝你，多謝你為我做嘅一切一切... 當我每次感受到依家自己擁有嘅幸福，就會諗起係你背後犧牲換返嚟比我… 我覺得哩一世能夠有你一個咁嘅人愛住自己先係我人生最幸福嘅事...可惜，我唔知可以點報答你，唯有比你知道我過得好幸福，我知對你嚟講就係最大嘅回報...
至於劉俊業，如果唔係我，或者你依家已經好幸福咁同欣欣一齊緊…對唔住…)
因為我個仆街老豆，我被下了一個賓周會變短的詛咒，但同時間亦因這個詛咒讓我知道這個世界有兩個深愛我多於自己的女子，誰能說這不是另一種幸福?
在澳洲，一位女子正呆呆地望著電話。
“叮”
終於，一張相片從message中呈現在她眼前。望著相中幸福的二人，淚水沾滿了少女的眼框。
(太好喇! 乘風哥哥你終於可以得到自己嘅幸福... 咦，哩條袋巾... 咪我以前送比乘風哥哥嗰條? 劉俊業咁叻影得咁清嘅? 多謝你...多謝你呀乘風哥哥…)
看見這袋巾，少女終於忍不住仆在枱上哭了起來。
「咁真係好咩?」一把男子的聲音突然從後響起。
「嗯，對我嚟講咁已經足夠…同埋多謝你，要你一直照顧我又陪我做咁多戲，仲累你無得去乘風哥哥個婚禮...」聽到聲音，女子收起哭聲抹掉眼淚回答道。
「你又點知你依家感受緊嘅幸福唔等於係我嘅幸福? 而且我依家可以日日見住佢，比你肯定幸福得多…」男子笑了笑溫柔地說道。
女子聽到後身體震了震然後說道:
「你話，如果哩個世界真係有神，佢係咪真係好鍾意惡作劇?」
這晚，少女從櫃桶裏拿出了一個鐵盒，鐵盒入面有各式各樣的物件，全是某男子這麼多年來送給她或是和他有關的東西，有紙摺的星星、頸鏈、貼紙相、公仔、他送的飾物甚至石頭都有。然後她從中拿出了一張已漸發黃的紙張。
“我的志願 陳欣欣
我的志願是長大後要成為乘風哥哥的太太，因為乘風哥哥是全世界最好的男仔，我真的很喜歡他! 每次我哭的時候他總是能讓我笑，我害怕的時候他總會在我身邊陪著我，我危險的時候他總會站在我前面保護我。他溫柔、體貼、善良、自信。跟在他背後，我彷彿永遠都能看見他身體所散發出的光茫，我最喜歡乘風哥哥了! 雖然我知自己配不上他，但我還是希望自己將來能成為他的妻子，因為只有這樣，我才能永遠陪伴在他身邊，一直分享他的喜怒哀樂。我知這是一個平凡的志願，但對我卻是意義非凡!”
望著這張紙張傻笑了一會，突然，少女把內容全劃上了一條直線。然後在下面寫道
“我的志願是這一生都要一直喜歡乘風哥哥，然後用另一個方式讓他可以永遠幸福快樂!”
「乘風哥哥，一個月紀念快樂! 我有禮物送比你呀~」
「多謝欣欣~ 咩嚟㗎?」
「你拆開睇下咪知囉~」
「袋巾?」
「係呀~ 你估下點解?」
「好難估喎…驚我無帶紙巾?」
「傻瓜! 因為佢可以貼近你個心臟，以後無論點，佢都可以代替我陪住你，喺你個心附近留有一個我嘅位置~」
「咁都得?真係無你地啲少女心事乎~」
「以後你所有人生重要時刻都一定要帶住佢呀!」
「直接帶住你唔係更好?」
「嗯… 當然要帶埋我啦~不過都一定要帶埋佢!」
全故事 完