因為我個仆街老豆 我被下了一個賓周會變短的詛咒: 54. Connie
Connie是一個很乖很單純的女孩，所以她的世界其實亦很簡單，誰對她好她便會對誰好，但誰對她差，她亦不會對誰差。世間亦彷似只有對與錯，黑和白，沒有中間。既然選擇和一個人一齊，便應該一心一意，絕不贊同花心這行為。加上她乖巧、善良、孝順，這些特質讓她被公認為是絕對娶得過的好老婆。
因為住得近加上父母是世交，Connie和曹子仁從少便認識並且一起長大，當後者還是一個肥仔，常被同學欺凌時，Connie卻從沒嫌棄過他並一直都陪著他保護他，這讓曹子仁性格變得扭曲後仍是十分珍惜和重視Connie這個青梅竹馬。為了永遠把對方留在自己身邊不讓其他人搶走，他略施小計便騙得對方成為了自己的女朋友。
雖然曹子仁很希望得到Connie的第一次好讓她永遠不會離開自己，但傳統觀念極強的Connie對婚前性行為卻極其抗拒。不想傷害Connie所以曹子仁亦沒有勉強，更覺得Connie的pure是這個污穢世界下所剩餘的僅有清泉，對她亦是發自真心的疼錫和著緊。 也基於Connie真的很單純亦很信任自己男朋友，那怕曹子仁背著她做了很多事，她亦從沒懷疑過對方。
面對這樣的一個女仔，Vanessa亦確實有點難入手去進行一些挑撥離間。 她只能一方面嘗試拿取更多關於二人相處的資訊，一方面又主動邀請李乘風參與她和Connie間的活動讓他多刷存在感。這天她和Connie下課後，便邀約她和自己一起逛街。
「Connie，依家你男朋友咁紅，會唔會少咗好多時間陪你?」Vanessa又襯機落藥問道。
「其實一直都唔多㗎，始終唔同大學大家又咁忙，依家一星期都係見一日左右。」Connie像沒一件事地回應。
「咁你地都仲keep到? 你真係ok?」Vanessa覺得匪夷所思。
「我地由細識到大，感情基礎夠深所以都唔太大問題嘅，而且第日真係結咗婚就可以日日見啦~」
「你地一直要玩地下情，依家佢仲要咁紅，你真係唔驚佢出面會有第二個?」見Connie似乎真心覺得這不是問題，Vanessa又問。
「咁一齊得，就梗係要信任對方啦。我信我地咁多年嘅感情佢唔會對我唔住嘅~ 而且對方係咪真係緊張你，自己一定feel到㗎~」Connie仍充滿信心回應。
「咁如果，我講如果，有日你發現佢真係有第二個，甚至原來係一直有三四五六個呢?」越來越感嘆曹子仁上一世到底做了甚麼好事才能有Connie這一個女朋友，Vanessa 繼續問。
「我又真係無諗過… 如果真係咁我都唔知點算… 無咗互信，我地好似無可能再一齊，但就咁朋友都做唔成又好似好可惜咁… 就好似你唔會想無咗個家人，無論佢做咗啲咩…」Connie認真想了一會後答道。
「其實到底你當佢係愛人定親人㗎?」Vanessa疑惑。
「嘻，唔知呢，我估兩者都有掛~」Connie笑著說，好像這問答的答案毫不重要。
「佢對你真係好?」
「好呀，好似上兩星期我咪有日病咗無返學嘅，佢夜晚都立即嚟探我仲買粥比我食~」回憶起當時情況，Connie露出甜甜的笑容。
「嗯…」對此Vanessa再沒有任何方法。
「做咩今日對我地咁有興趣問咁多嘢呀?」Connie好奇。
「好奇問下關心你咋嘛~」Vanessa胡亂解釋。
「你近排又點呀? 近排好似同嗰個Kenny行得好埋?」Connie沒再多想便主動關心回Vanessa。
「穩定發展中囉… 明明大家都有feel但佢又好似無進一步表示…」說起這話題Vanessa亦有點無奈。
「可能佢想諗清楚先啫~ 唔衝動係好事嚟㗎。」Connie嘗試安慰她。
「希望啦… 係喎，一陣食飯李乘風都話join喎~」Vanessa話題一轉。
「好呀，不過近排你做咩好似成日搵埋佢嘅?」
「無呀，見佢失戀咗一排都仲未recover到咁，咪諗住搵佢多啲等佢唔好再成日仲諗以前囉… 同埋偷偷講你知你唔好同人講，我近排聽Kenny講，原來佢嗰陣同ex分手，係因為比人撓長腳呀…」Vanessa另一個方法是讓Connie同情李乘風，看看有沒有可能因憐生愛。
「咁慘!? 佢又一直唔同我地講嘅…」果然Connie立即為李乘風而難過。
「男人好棹忌哩啲嘢怕瘀掛… 所以你間中都關心下佢多啲啦~」
「好!」
晚飯期間，李乘風加入了她們。
果然Connie比往日熱情，常常主動聊李乘風傾偈，又問有沒有需要介紹女仔給他認識。
Vanessa看著李乘風一時高興一時失落的表情後，更加肯定了Kenny的說話，李乘風竟真的喜歡上乖女孩Connie。不過知道了曹子仁的真實一面自己也有了Kenny，她亦真心希望他們有機會發展得到幸福，於是晚飯後她便借故約了Kenny，叫李乘風先送Connie回家自己才好回hall 。Connie說不用，不過李乘風當然亦不會放過這機會。
巴士上
「其實唔係好遠咋嘛又咁早，唔駛送我啦…」Connie仍有點不好意思。
「無所謂啦，你都識講唔係好遠咯，咪當機會比我扮下gentleman加有機會同你傾下偈囉~」李乘風笑說道。
「咁你不嬲都好gentleman嘅~ 我同Vanessa都覺得你係一個好男仔~」Connie乘勢鼓勵著李乘風。
聽到Connie的稱讚，這刻李乘風心裏有點痛覺得受之有愧，不過很快又回復正常。
「我邊有咁好呀，好就唔會比人飛啦…」
「咁總有啲女仔係盲嘅…」Connie安慰道。
「又或者係男人唔壞女人唔愛呢，唔知點解壞嘅男人先可以令女人愛得心甘命抵…」李乘風望著Connie有感而發說道。
「我都唔明，或者有啲人天生都係比較…犯賤?」這問題Connie亦不明白。
「嘩! 你曳咗咁多嘅，以前你唔會用哩啲 terms㗎喎!」李乘風驚訝。
「肯定係近得Vanessa多! 哈哈」
望著Connie一臉純真地大笑，李乘風覺得她很可愛的同時，亦覺得要傷害她自己真的不折不扣是一隻魔鬼。
「咁如果… 如果有日你發覺你男朋都係一個壞男人呢? 你會唔會仲愛得咁心甘命抵?」不過計劃還是要進行。
「做咩你地近排個個都問我哩個問題? 今日Vanessa又係問過類似嘅嘢… 我覺得我唔會同佢再一齊，但我又唔想無咗個青梅竹馬，所以我都唔知點算… 或者可能好易會比佢氹返都唔定掛…」Connie想了想後又答道。
「但如果佢本質無改，你比佢氹返佢又再呃你，一次兩次三次後，真係可能連以前儲落嘅感情都會催毀埋。」李乘風認真分析。
「咁你覺得應該點算?」Connie認同。
李乘風:「都要睇佢衰咩嘅… 如果佢係暪住你有第二個，我覺得如果你自己接受到，分手後都有機會繼續做返朋友，只係你一定要同自己講唔可以再同佢一齊比自己有第二次受傷嘅機會。但如果佢純粹係啲陋習或者性格上嘅嘢，咁又不妨比下機會…」
「但真係嘅我覺得我都係會心軟…」Connie嘗試代入後得出結論。
「真係嘅，即刻搵第二個男朋友，咁咪唔會心軟囉~」李乘風說笑道。
「邊有你講得咁兒戲呀， 咁易鍾意一個人咩!」Connie卻認真答道。
「我都係亂up啫~ 你地咁恩愛唔會發生嘅~」
「又啱! 哈哈~」
就這樣，在Vanessa幫助下，雖然不至於讓二人發展出感情，但Connie和李乘風的確成為了越來越好的朋友。
又過了兩個月的時間，得到肥仔的線報，李乘風和Kenny都覺得差不多是時候進行計劃的最後一步。