因為我個仆街老豆 我被下了一個賓周會變短的詛咒: 22. 欣欣的燥動
轉眼間數個月又過去了，這天李乘風放學的時候突然收到陳太的電話。
「乘風，我係陳太呀，唔好意思，啱啱欣欣學校打嚟話欣欣喺學校出咗事受咗少少傷，不過應該唔嚴重，但我今日又上咗深圳返唔切嚟，欣欣老豆又唔喺香港，可唔可以麻煩你幫我去接欣欣返屋企先?」
「無問題呀，我去接欣欣，有咩問題我再話你聽呀。」李乘風答道。
陳太:「麻煩晒你，我應該八點前都會返到去㗎喇。」
李乘風這晚本身約了Miss Lui外出用餐，不過欣欣有事自然要取消，所以他簡單跟Miss Lui解釋過後便趕了去欣欣的學校。
去到學校，看見欣欣正一臉委屈坐在教聯室的一張椅子上，左手手臂和右邊膝頭都貼了膠布。
「欣欣?」
「乘風哥哥!」欣欣看見李乘風立刻開心大叫並想衝到他處，但一起身突然間想起了甚麼又立即收起了笑容一臉生氣地坐回椅子上。
李乘風有點奇怪，但還是決定先找老師了解一下情況。老師知道了李乘風和欣欣的關係後便把事情原委大概告訴了他，應該是欣欣和鄰坐的男同學不知因甚麼原因吵架，繼而追逐，最後欣欣把男生推倒在地上，男生不忿氣便起身把欣欣也推在地上，結果弄損了手腳。至於二人因甚麼原因爭吵，則二人都不肯說。
老師告訴李乘風可先把欣欣帶回家，詳情她明天會再打給陳太和她商討。不過她亦問到李乘風知不知欣欣近排有沒有發生甚麼事，因她發現欣欣近排心情好像很差，有點暴燥常常發脾氣，和以前天真活潑溫文爾雅的她很不同。
「欣欣，可唔可以話比乘風哥哥知到底發生咩事?」二人一起回家途中，李乘風問欣欣，可惜欣欣只是扁嘴不理會李乘風。
「欣欣?」見欣欣沒反應李乘風又問。
「欣欣係咪唔理乘風哥哥喇?」李乘風把手放到欣欣頭上輕輕摸著再問。
誰知李乘風話一說完欣欣便再忍不住立即抱著李乘風的腰在哭。
「係乘風哥哥唔再理欣欣咋!」
「點會呢? 乘風哥哥最錫欣欣㗎喎~」聽到欣欣的說話李乘風不解的同時心裏亦有一種難過。
「你哩幾個月去咗邊呀? 逢親放假我都見唔到你… 你係咪同你個新女朋友一齊? 你應承過我你有女朋友都唔會唔理我㗎，你講大話! 我憎死你，憎死你女朋友呀!」說完欣欣便推開了李乘風跑走。
李乘風聽到欣欣的說話呆了呆，回神過來便立即去追欣欣，在就快追到時卻看見欣欣完全沒留意路面情況突然衝出了馬路，而一架大貨車正高速衝向她的方向…
「欣欣!」
李乘風的叫喊和貨車的響鞍聲終於讓欣欣意識到危險，不過當她轉身看見大貨車正衝向自己時只能被嚇得目定口呆呆在原地... 幸好千鈞一髮之際，李乘風及時趕到並把她拉回行人路。
「欣欣你係咪傻咗呀! 你幾嬲我都好都要照顧自己安全唔可以亂過馬路㗎!你有咩事乘風哥哥點算， 你爹哋媽咪點算呀!」李乘風把欣欣抱緊在自己懷內，少有地對她大聲咆哮。
剛剛那一瞬間，他真的害怕了，害怕永遠失去自己這沒有血緣關係的最後親人。
「對唔住呀乘風哥哥…」看見李乘風這樣著緊自己，欣欣所有的怒氣和不滿都煙消雲散，取而代之，是濃濃的歉意，眼淚亦開始在眼框打轉。
「最緊要係你無事… 係乘風哥哥唔好，忽略咗欣欣，應承過欣欣嘅嘢做唔到… 你原諒乘風哥哥啦好唔好?」聽到欣欣之前的不滿，李乘風才想起自己自從和Miss Lui一起後每逢假日都往對方的家裏跑，這段時間確實忽略了欣欣，心裏充滿了歉疚。
「係欣欣自己唔好…明明同自己講過最緊要乘風哥哥開心就得，明明知你拍拖過得好開心，但有時就係控制唔住自己會掛住你想見你想你陪住自己， 頭先仲要發你脾氣… 乘風哥哥，欣欣係咪好衰? 我覺得自己好衰好討厭咁嘅自己呀，你會唔會以後唔要我喇…」同時欣欣在下了氣後醒悟到自己的行為很可能會令李乘風討厭自己因而哭著說。
「傻瓜~乘風哥哥點會唔要欣欣，喺乘風哥哥心目中欣欣永遠都係最乖最善解人意嘅~ 一定係乘風哥哥太過份激嬲咗欣欣欣欣先會咁… 所以最衰都係我~ 以後乘風哥哥會留意，唔會再忽略欣欣，欣欣原諒我好唔好?」聽見欣欣的哭聲李乘風心更酸更內疚。
「嗯!」欣欣終於破啼為笑。
「咁乘風哥哥同你返屋企啦~」李乘風邊伸出了手邊說。
欣欣有點臉紅然後便也伸出手拖著李乘風，二人繼續一起回家。
「咁欣欣可唔可以話比乘風哥哥聽解同嗰個男同學會打交?」在小巴上李乘風見欣欣回復了心情便問。
-----------------------------------------------------------------
事源其實是欣欣因經常見不到李乘風，心情亦因思念而變得越來越差。
這天她放學沒事便不自覺在書本上畫上了李乘風的臉容，身旁的男同學看見了自然頑皮心起便搶了欣欣的書本然後取笑道
「嘩 個公仔咁靚仔邊個嚟㗎?」
「比返我呀!」害怕心事被揭破欣欣既生氣又緊張想搶回書本。
「你話我聽係邊個嚟先啦~ 係咪你成日提起嗰個乘風哥哥?」男孩自然沒那麼順攤邊問邊左閃右避。
「快啲比返我呀!」欣欣繼續嘗試去搶。
「咁緊張你實係鍾意佢啦~ 你思春呀? 林欣欣思春呀~林欣欣思春呀~」男同學開始拿著書本邊走邊大叫。
欣欣聽見後滿臉通紅便也追著男同學想搶回自己的書本並阻止他亂叫，於是二人開始追逐了起來。
一直去到操場，二人終於都因沒氣力再跑便都喘著氣停了下來。
「其實你個乘風哥哥咁靚仔，實唔會鍾意你啦，你死咗條心吧啦~佢第日有女朋友就唔理你㗎喇，不如同我玩好過啦~」男子休息了一會又開始口賤。
誰知這說話正中欣欣死穴，一氣之下她便用力把男生推跌然後搶回書本。男生不甘被推又覺得自己沒面子，起身後便奮力一推把欣欣也推倒地上，擦損了手腳，這時其他同學介入驚動了老師。
-----------------------------------------------------------------------
「我可唔可以唔講?」欣欣想了想事情始末後臉帶點紅說道。
「唔想講就唔好講啦，不過要應承我以後唔可以再同人打交，得唔得?」每個人都有自己的秘密，李乘風並沒有強逼欣欣。
「知道…」
「勾手指尾~」李乘風伸出了手指尾。
欣欣看見笑了一笑亦伸出了自己的手指尾和李乘風打勾。
回到去，由於陳太還沒回到家李乘風便把欣欣帶回自己家陪她玩了一會直至陳太回來。
欣欣走後李乘風便打給Miss Lui把事情簡略報告了一下。
「欣欣打交? 點會㗎? 哩個小妹妹我雖然只係見過幾次，但都覺得佢又乖又識諗，好得人疼錫㗎喎…」Miss Lui有點不敢相信。
「我都好驚訝，咁多年佢一直都好乖好聽話未試過咁㗎…」李乘風也認同並表示擔心。
「你話佢有講過嬲你咁耐無陪佢? 仲嬲埋我?」Miss Lui嘗試分析原因便問道。
李乘風:「係呀…咁我近排真係陪少咗佢好多嘅…」
「嗯…你覺得佢守唔守到秘密? 或者過多排搵個合適時間，你間中可以帶埋佢上嚟我度玩嘅…」Miss Lui想了想後便提議。
「真係? 你唔介意?」李乘風有點喜出望外。
Miss Lui:「咁佢係你半個妹嘛，我知佢對你好重要，而且我都好鍾意哩個小妹妹~當然，大前提要佢守得秘密啦…」
「家寶，你真係好好~」李乘風感動。
「咪賣口乖啦~其實我最怕係佢唔只當你哥哥咁簡單啫…」Miss Lui說出了疑慮。
「傻㗎咩，唔會啦~」李乘風沒放上心仍處於開心興奮狀態隨口應道。
「希望啦…少女心事有時好難講，你自己小心啲啦。」Miss Lui作了提點後亦沒堅持。
「細路女啫，等佢第日遇到鍾意嘅男仔，到時唔理我哩個阿哥就真~」李乘風繼續笑著說。
Miss Lui:「提咗你，你自己決定啦~」
「家寶…」李乘風突然嗲了一嗲。
「咩呀? 你咁叫我多數無好嘢㗎喎…」經驗讓Miss Lui立即充滿戒心。
「我地都過咗幾個月唔見光嘅生活， 會唔會有機會間中都可以一齊出去抖下氣呀…」時間久了李乘風其實開始有點受不了現在的秘密生活。
「唔得呀，我知係辛苦你，但比人見到個後果太大喇… 乖啦，忍多年幾啦…」Miss Lui語重心長勸道。
李乘風:「真係無辦法?」
「你有無辦法確保出去唔會撞到識我地嘅人?」Miss Lui反問。
「嗯… 如果唔係香港呢?例如澳門?」李乘風提議。
「機會係微，但都係有危險喎…」Miss Lui不敢。
「唔會咁橋嘅~ 最多我地直頭係嗰邊先meet，避埋係香港嗰段路啦 …」李乘風繼續遊說。
「你比我考慮下先啦…」Miss Lui開始心軟。
「好~」