因為我個仆街老豆 我被下了一個賓周會變短的詛咒: 15. 偽拍拖
因為時間緊逼，整個暑假Miss Lui都在忙碌中渡過。雖然劇本、音樂、服裝、場景和道具等事項都交由不同老師負責，但由於Miss Lui是總負責人，所以每樣她也需要參與其中。幸好花了整個暑假的努力，所有事情都漸漸上了軌道。
由於原著故事太長，所以整個劇本只包含第一部的劇情，當中會有10首歌配合故事中不同的情節。當每章劇本寫好的時候Miss Lui都會立即交給幾位主角讓他們有空時自己先排練一下，然後每星期又會有兩日專精練歌。
日子一日一日過去，所有事情都進行得如火如如荼，轉眼間踏入十一月中，距離開show只剩下一個月的時間。
「停! 周紫盈，我知李乘風好靚仔你好欣賞佢，不過故事入面Rachel大部份時間都只係當佢係好朋友，你唔好成日露出一副迷戀佢嘅樣子先得㗎... 李乘風你都係! 你應該好鍾意Rachel先係，但你個眼神完全睇唔出，淨係當佢好似係普通朋友咁! 唉，你地兩個如果可以調轉角色演咁就好喇… 今日係咁先啦，你地返去再好好揣摩下個角色!」
經過多次排練Miss Lui還是不滿意男女主角的入戲程度，這亦讓李乘風和周紫盈有點灰心。
「點算好呀，Miss Lui好似好不滿我地表現咁…」離開學校時，周紫盈對李乘風說。
「做戲真係好難呀! 點先可以令自己入戲多啲呢? Miss Lui話我唔似鍾意你… 」李乘風亦難得地顯示出沮喪一面。
「乘風，你係咪好想做好哩套音樂劇? 」想了想，周紫盈突然停下了腳步問了個問題。
「咁梗係想啦!」李乘風亦停步回身答周紫盈。
「咁…不如哩段時間我地試下扮拍拖? 話唔定咁你可能慢慢會投入到鍾意我呢?」下定了決心，周紫盈大膽提出了建議。
「下? 哩啲嘢有得扮㗎咩? 同埋咁你好蝕底對你好唔公平㗎喎….」李乘風被周紫盈的提議嚇了一跳。
「但我地得返一個月，你仲有無其他辦法?」周紫盈又再問。
李乘風: 「咁暫時又真係無…」
「試下好過乜都唔試呀，而且我都唔介意…」周紫盈帶點害羞說道。
「咁…你唔介意都可以試下嘅…」苦無辦法又想把音樂劇做好，李乘風終被說動。
「由哩一刻起，你就係我男朋友，我會令你鍾意我~」周紫盈走近李乘風甜甜一笑說。
「咁但係你嗰part呢? 你點拿捏Rachel對Elven嘅態度? 扮你男朋友會唔會反而弄巧反拙呀?」李乘風又提出另一個擔憂。
「咁我又未諗到… 諗住問題解決一個得一個先嘛~或者你試下間中做啲好乞我憎嘅嘢?」比起可以做李乘風的偽女朋友，明顯地周紫盈並沒那麼著緊自己的表現。
李乘風:「例如?」
「唔知呀…或者你間中撩下鼻屎? 哈哈~我地逐樣逐樣解決問題先啦，有啲嘢急都急唔黎~」做了李乘風的臨時女朋友周紫盈確實完全不急了。
就這樣，二人除了男女主角，突然又多了一層偽男女朋友的關係，周紫盈對這新角色很投入，但李乘風卻明顯入不了戲，直至有晚Miss Lui知道了他們的小把戲後便給了他一點建議。
「下? 扮拍拖? 咁都比佢諗到? 哩個周紫盈… 動機不純啊~」Miss Lui聽完李乘風對自己交待後笑著說。
「動機不純?」李乘風不明白。
「遲鈍! Anyway，其實你要同佢投入唔難呀，將佢當成係你鍾意嗰個人你自然識點做㗎喇~」不再糾纏這問題Miss Lui給了李乘風一個意見。
(自己鍾意嘅人? 即係當佢係Miss Lui就得?)李乘風心想。
得到提點的李乘風之後努力把周紫盈幻想成是Miss Lui，果然立即便能入戲，他們不時會傾電話，行街睇戲，甚至拖過幾次手，慢慢地他開始能完美演繹出Elven喜歡Rachel的感覺。但正如李乘風之前所擔心，這方法有利亦有弊，甜蜜感讓李乘風投入，但同時亦讓周紫盈的表現變得越來越不堪，對著李乘風她永遠只能流露出濃濃的愛意。
距離表演開場只剩下最後一個多星期，這天所有台前幕後進行了一次總綵排。一開始Miss Lui已經不滿周紫盈完全扮演不到Rachel對Elven那種只是好朋友的感覺，但因為是總綵排便讓她繼續演下去，這違和感直至故事中後段時光倒流發生後因Rachel 亦開始對Elven有不同才慢慢消失。
這時已經到到故事尾聲，Elven在東壩深情表白後，Rachel正想拒絕，誰知一頭野牛突然出現衝向他們，Elven立即把Rachel拉向自己閃避然後再用身體擋在她面企圖保護她，幸好野牛一擊不中便逃走了。這時Elven把Rachel從懷內拉回出來，看見她一臉驚嚇的樣子便忍不住吻了下去。
由於是學校表演，接吻戲是不能出街所以只能借位演出，還要借得十分明顯以免惹人誤會。但這二人不知是太投入還是近來真的日久生情，這時竟然情不自禁真的在台上接吻了，立即引來全場一片叫囂聲 (當然還有部份是二人各自fans的責罵聲)，被這些聲音驚醒二人才意識到自己的忘情演出立即尷尬分開了，當Miss Lui看見這一幕心裏竟突然一痛。
「停! 攪咩呀你地? 知唔知你地代表緊學校? 台上做啲咁嘅嘢係咪想全部人同你地一齊陪葬? 知唔知為咗哩套Musical大家花咗幾多心機同時間? 周紫盈，講過幾多次一開始Rachel對Elven只係好朋友? 知唔知咩係好朋友? 你由頭到尾對住佢都係嘴角含春咁想點? 越做越差係咪以為我唔敢換角? 信唔信我立即換走你?」Miss Lui連珠炮發咆哮了一輪後把劇本扔在地上然後轉身便怒氣沖沖離開了現場。
「嘩，我未見過Miss Lui咁嬲㗎…」
「比你都嬲啦… 表演果陣如果真係咁錫咗， 啲家長仲唔發晒顛? 學校都唔知點交待…」
「個周紫盈真係越做越差，完全做唔到Rachel嗰種神粹…」
「係啦! 仲要無啦啦錫咗李乘風… 離晒譜!發姣發到咁...」
「咩呀，明明係李乘風格硬錫咗周紫盈喎!」
「明明就係周紫盈錫李乘風!」
Miss Lui離場後周圍開始竊竊私語，甚至引發輕微罵戰。
「好喇，今日先到此為止，大家執好啲嘢就走，我地明天繼續。」另一位老師見這情況便出來收拾殘局打圓場。
大家執拾完走得七七八八，但周紫盈腦海還是空蕩蕩躲在一間房間裏痛哭。和李乘風接吻本來是一件開心的事，但錯在那時機實在讓大家太難堪，而且Miss Lui的責罵亦讓周紫盈感到十分難受和害怕。
「唔好喊早啲返去休息啦…」找到周紫盈李乘風嘗試安慰道。
「對唔住呀乘風… 最衰都係我! 戲又做唔好，又諗埋啲屎橋…」看見李乘風周紫盈就像找到主心骨立刻衝前抱著他說道。
「又唔好咁講，我都有責任… 而且你個方法真係令我搵到感覺做好個角色，只係反而累咗你更加投入唔到，我先應該講對唔住…」李乘風輕輕拍著周紫盈背部安慰她。
由於之前二人都一直投入扮拍拖，所以沒人的時候一些普通的自然身體接觸二人都沒特別在意。
「咁點算好… Miss Lui頭先直程話要換角，我好驚呀…」周紫盈繼續抱著李乘風一邊哭一邊說。
李乘風:「我會搵Miss Lui傾下… 不過我地扮情侶哩個做法今日都要到此為止喇，反正我已經搵到感覺，再扮落去扮出事就真係大鑊㗎喇…」
「我明白…」雖然早知這角色扮演會有完結的一日，但要發生時周紫盈還是萬分不捨，只是她知自己並沒有其他選擇。
李乘風:「好啦，我送你去搭車先，唔好諗咁多早啲訓，明天先一齊再努力!」
「好…」
送完周紫盈後，李乘風並沒有回家而是去到Miss Lui屋企。
“叮噹”
「你嚟做咩呀?」打開門看見李乘風，Miss Lui仍語氣不善。
「Miss Lui你唔好嬲啦，我地知錯喇…」李乘風一副死狗樣道歉。
Miss Lui:「咁你地錯在啲咩?」
李乘風:「唔應該咁多人面前錫…」
「即係無人就可以錫?」Miss Lui的聲音提高了八度。
「唔係唔係…點都唔應該錫….」李乘風知講錯說話立即修正。
「點解呀? 幾好呀，戲假情真玩出真感情喇…」Miss Lui的語氣帶著濃濃的酸意。
「唔係呀，嗰陣我都唔知點解會咁… 或者哩幾星期我真係一直幻想咗佢係我鍾意嘅人，所以有啲精神錯亂…」李乘風嘗試解釋。
「咁邊個係你鍾意嘅人?」Miss Lui突然略帶緊張追問。
「下?」李乘風有點不相信自己耳朵Miss Lui會這樣直接問。
「問你邊個係你鍾意嘅人呀…」Miss Lui不耐煩再說了一次。
「我講咗你可唔可以應承我唔好嬲?」李乘風要為自己包定底。
Miss Lui:「你唔再講我就真係嬲喇!」
「我鍾意嘅人，一直都只有Miss Lui你…」李乘風再一次深情告白。
「咪同你講咗唔可以鍾意我囉!」Miss Lui表面上惡，但聽到李乘風的答案時心入面卻有點開心和甜絲絲的感覺，臉色亦好回不少。
「咁我真係控制唔到自己嘛…」李乘風委屈地說。
Miss Lui:「所以你哩幾星期都將佢幻想成係我?」
李乘風:「係呀，你唔記得上次係你教我將佢當成係自己鍾意嗰個人?」
Miss Lui:「頭先錫嗰陣都係?」
李乘風:「係呀…」
「明白喇…你返去早嘟訓啦」Miss Lui突然變得很平靜地說道。
「咁你係咪唔再嬲喇?」李乘風帶點害怕追問。
「
- 唔好再同周紫盈玩扮拍拖遊戲喇，咁只會令佢越做越差。
2. 同佢講，只要佢開頭將你當成係郭東城，佢自然知應該點對你㗎喇。
3. 至於你… 以後淨係喺表演嗰陣先可以將周紫盈當成係我，明唔明? 唔明就再自己諗下諗明為止…
4. 早抖，明天見喇。」
說完Miss Lui便直接關了門。
關門後，Miss Lui頹然坐到tatami上。她知道自己剛剛在綵排時那樣失態發那麼大脾氣，最大原因並不是因為學生在台上接吻，也不是因為周紫盈演得差，而是因為看見李乘風和周紫盈接吻了。
(嗰陣點解個心會咁唔舒服?唔通我真係鍾意咗佢? 我到底應該點做好…)