［愛情純愛］既然忘記唔到佢，不如試下中意我⋯？: 147. 裂縫

X⋯X⋯X

我同孫慧伶仲有另外兩個男同學喺視藝室做埋份project WS

孫慧伶話今日視藝室冇人用，所以我地可以喺呢度做埋份嘢

份Project WS星期三就交，今日做完之後如果有嘢要改嘅話都仲有一日可以再改

「搞掂！」坐我隔離嘅男同學講道





「做完～」孫慧伶好似鬆一口氣一樣

「Nice～」另一個男同學講道，「咁份嘢到時你交？」

「嗯嗯！好呀冇問題～」孫慧伶笑一笑點點頭，「到時我交啦～咁放喺我度啦！」

大家見Project做完都執嘢準備走，另外兩個男同學因為佢地比較熟，佢地兩人執好嘢就先走，視藝室內就剩低我同孫慧伶

「走得，你落嚟Art room搵我？」我拎出手機send咗個message比蔣倩盈





免得只有我同孫慧伶，孫慧伶又唔知要同我講啲咩奇怪嘢⋯而且，同孫慧伶獨處，我怕蔣倩盈會誤會啲咩

「你走未呀？」孫慧伶先開口問我，打破視藝室本來嘅寂靜

「等人。」我淡然地回答

我企喺一個大木櫃前，我除咗初中上視藝堂嚟過呢度之外，高中因為唔係讀視藝，所以都冇嚟過

喺我準備拎起書包孭上身嘅時候，孫慧伶忽然間大步地朝我行過嚟





「後面個櫃門！小心⋯！」孫慧伶叫咗我一聲嘅同時，伸手拉咗我一下

「嘎—」「啪！」

孫慧伶撞上喺佢身後嘅木枱，比佢拉住嘅我因為佢撞到後面嘅枱而比佢絆咗一下，我向前行咗一步，雙手下意識一下子㩒咗枱上，喺佢雙手旁邊，孫慧伶嘅手推住我嘅胸膛，另一隻手㩒喺枱邊

喺木枱傳嚟「嘎—」一聲同時，我嘅身後傳嚟一聲巨響，有嘢重重地跌喺我身後嘅空地上

我同佢嘅視線對上，我不禁摒住呼吸，我地兩人都因為突如其來嘅拉近距離而嚇呆咗

「啱啱⋯頂層個細櫃門要、要跌⋯」孫慧伶驚魂未定地道

「咔—」

視藝室嘅木門傳嚟開門聲，我同孫慧伶同時向門口望去





「⋯！」我不禁瞪大眼，然後頓時收回手，向後退咗兩步

企喺門口嘅，係落嚟搵我嘅蔣倩盈，佢隻手推住視藝室嘅門，愣住企喺原地

「我⋯」偏偏喺呢個時候，我語塞了

我要由邊度開始同佢解釋？我要點樣同佢解釋成件事只係一個意外⋯？

蔣倩盈忽然抬眼望我，又望一眼孫慧伶，孫慧伶都有啲手足無措；蔣倩盈回過神後第一件事係右腳向後踏咗一小步，然後轉身走出視藝室

「蔣倩盈⋯！」我見到佢一聲不吭轉身離開，我嘅心頓時慌張起嚟，連忙一手拎起書包就追上去

我跑出視藝室，見到蔣倩盈行得好快，一眨眼就行到去樓梯口，轉彎落樓梯





「蔣倩盈！」我想叫住佢，但佢愈叫愈走，什至加快咗腳步

我頓時加快腳步追佢，一直追喺佢身後，當我落到地面嘅時候，蔣倩盈行到學校門口將大門拉開行出去

我跑上去捉住門柄，一下將門拉開追出去學校外，蔣倩盈急步行喺前面，我跑上去一下子將佢拉住

「蔣倩盈！你聽我解釋！」我拉住佢嘅手腕焦急地講道

「唔想聽！」蔣倩盈一下子將我隻手甩開，望都唔望我一眼

「真係唔係你諗嘅咁樣！」我又再解釋，我覺得我都已經唔係熱鍋上的螞蟻，我已經係火山上的螞蟻

我跑到蔣倩盈嘅面前擋住佢嘅去路，佢抬眼望我嘅一刻，我嘅心臟狠狠地揪咗一下

佢瞪着我嘅雙眼都紅起嚟，淚水將佢嘅雙眸濕潤起嚟，望住我嘅眼神盡是失望





見到佢嘅眼淚，我一個字都講唔出口，全都卡喺喉嚨

蔣倩盈抽一下鼻子，然後繞過我就向前行

我回過神嘅時候，蔣倩盈小跑咗兩步後又急步行起嚟，我追上去想同佢解釋，腦海中全都係啱啱佢強忍着淚嘅表情

我跟喺蔣倩盈身後上車，佢企喺樓下嗰層，喺我地平時番學搭車會企嘅位置

我行到佢面前，佢毫不猶疑地撇開臉，寧願望向車窗外十年如一日嘅街景都唔望我，唔想聽我嘅解釋

我嘗試伸手拖佢，但比佢一下子甩開

當巴士駛到去我地平日落車嘅站時，蔣倩盈比風更快地落車，然後又開始急步行起嚟





「蔣倩盈！」我再次伸手將佢一手拉住，今次我冇比佢甩開我嘅機會，我直接用力捉住佢嘅手腕，「你聽我解釋先啦！」

「你要解釋啲咩？係誤會？係意外？係唔小心？」蔣倩盈抬頭瞪着我，用淚水汪汪嘅雙眼，不悅地望住我，「係邊樣？」




IG Link: https://www.instagram.com/nd_cotttoncandy/?hl=zh-t