［愛情純愛］既然忘記唔到佢，不如試下中意我⋯？: 136. 自我懷疑

Lunchtime嘅時候，我同佢地三個一齊準備出去食lunch，我企喺位拎手機同銀包時，見到岑諾新喺外面行番嚟

「同佢講聲先⋯」我拉番書包拉鍊，打算喺佢入番嚟嘅時候同佢講聲

「倩盈！」詠妍同樂恩忽然行過嚟拉住我

「咩呀？」我一臉疑惑咁望住佢兩個，詠妍同樂恩指一指門口

我沿住佢手指指住嘅位置望去，見到岑諾新企咗喺課室門口，佢同孫慧伶企喺課室門口講緊嘢





「你仲企喺度做咩呀？」樂恩連忙拉住我隻手晃咗兩晃，「你快啲過去宣示一下主權啦！」

「佢地講兩句啫⋯」我望住門口嘅方向講道，「可能講緊功課上嘅嘢呢⋯」

「講咩笑得咁開心呀？」希童嫌棄地望咗門口嗰邊一眼，我又望咗一眼，孫慧伶正笑得開心，「企喺人地課室門口同人地男朋友講嘢，唔覺好奇怪㗎咩？」

岑諾新背住我呢邊企，所以我睇唔到岑諾新嘅表情

「咁同一間學校又同一級，佢地又同一科，都好難唔講嘢嘅⋯」我見希童比我更憤憤不平，我無奈地笑咗一笑，伸手輕拍希童嘅膊頭





唔知佢地講緊咩呢⋯我又不禁有少許不安嘅感覺⋯

「唔好理啦，我地去食飯啦～」我提手放到佢地嘅面前上下晃兩下

我伸手輕輕地推佢地一下，我地四個行到去課室門口，岑諾新咁啱邁步入嚟

「我同佢地去食飯！」我對岑諾新講道

「好呀。」岑諾新點點頭，我都冇留意佢有咩反應，我就直接從佢嘅身邊行過





我腦海中仍然停留喺啱啱望向門口，見到岑過諾新同孫慧伶講嘢，孫慧伶笑得開心嘅一刻

我冇見到岑諾新望向佢嘅眼神同表情，但唔知點解喺我心裏好似已經有一個答案一樣⋯

「睇下食咩～」樂恩將餐牌遞比我地

我接過餐牌，但心情完全不在線上一樣，我完全冇心情睇餐牌⋯明明係望住餐牌，但心裏卻冇辦法從啱啱嘅事上抽離出嚟

我點解突然係咁樣⋯明明之前都冇咩特別諗呢啲嘢，明明同岑諾新一直都好地地，明明我知道佢中意我呀⋯

但點解見到佢地咁樣久違地企埋一齊嘅時候，我又開始自我懷疑⋯？因為知道岑諾新嘅嗰份「曾經」？定因為我心底裏覺得佢地合襯？

「你諗好食咩未呀？」詠妍用手肘輕撞我一下

「吓？哦⋯未呀⋯」我回神過嚟望住餐牌，睇下食咩好，「我食呢個三文魚丼飯。」





我將餐牌放番喺一旁，一回頭見到佢地三個都望住我

「做咩⋯？」我下意識笑問道

「唔開心呀？因為啱啱⋯」希童望住我，細聲地問道，「我地都係講啫，佢地可能真係講緊功課嘢呢～」

「你咁信唔過佢㗎咩？」樂恩笑一笑講道，「你自己都話啦，同一間學校同一科同一級嘛～」

我一聲不吭地點點頭，努力地扯起嘴角微笑

「喂，你口不對心呀？」詠妍又用手肘撞我一下，「你啲情緒寫晒喺面度啦⋯厄邊個？」

「咩呀⋯」比詠妍一眼睇穿嘅我移開視線，渾身不自然地拎喺放喺枱上嘅紙巾，然後又放番低，「冇囉⋯」





「冇？你睇下你宜家成個人都唔自在咁！」詠妍輕皺起眉頭

「最衰就係你⋯好地地同我講咩張景彥同孫慧伶最近關係唔好呀⋯」我望咗詠妍一眼，又耷低頭拎住手機捏嚟捏去，將手機殼拆出嚟又套番喺手機上

「咁都冇關係㗎～你地同佢地都係以前嘅事啦～」樂恩一臉天真地講道

「嗯，孫慧伶係佢嘅ex，但岑諾新都揀咗你啦～佢唔似會番轉頭嘅人。」希童都講道

我同詠妍對望咗一眼，因為希童同樂恩佢地完全唔知道成件事嘅來龍去脈，所以佢地將成件事諗得太簡單

「你對自己有啲信心啦好唔好？」詠妍望住將不安感寫出面嘅我輕輕一笑，「你又唔係好差～你又唔係醜樣，又唔係性格唔好，你怕咩啫～」

「我冇怕⋯」我細聲地回答道

我冇怕，只係擔心啫⋯





「佢冇比足安全感你咩？」希童問出一個重點問題，令我都靜咗落嚟

安全感嗎⋯岑諾新佢其實有比到安全感我⋯佢主動問我拎髮圈戴到手上，主動咁將我po喺佢嘅public story⋯其實當下真係覺得安全感滿滿⋯

明明我地只係講咗話試下中意對方，呢啲事唔係必然⋯但佢都一件不漏咁做足⋯

其實，係唔係我唔夠信任佢⋯？




IG Link: https://www.instagram.com/nd_cotttoncandy/?hl=zh-t