［愛情純愛］既然忘記唔到佢，不如試下中意我⋯？: 130. 道歉

我對於佢嘅提問有啲震驚，我冇諗過原來佢會知道我同蔣倩盈一齊嘅原因

「係又點，唔係又點？」我反問道，「同你都冇關係。」

孫慧伶忽然間雙眼一紅，淚水就喺佢嘅眼眶打轉咗兩圈然後滑過臉頰

「你做咩成日都要用咁嘅態度對我⋯？你就真係咁討厭我咩⋯？」孫慧伶忽然擺出柔弱嘅態度對我，「點解你就忽然間變到同之前判若兩人一樣咁⋯？」

「因為你已經唔係我女朋友，係你先放棄我。」我認真地回答佢嘅提問，「而我亦唔再中意你，就係咁。」





孫慧伶定睛望住我，同我對視着，我毫無半點心虛同佢對望着，我講嘅都係事實

「你原諒我可唔可以？」孫慧伶紅着雙眼望我

「我冇嬲過你。」我坦白地道

孫慧伶用手背抹眼淚，佢嘅右手鬆開咗門柄，朝我行咗兩步伸手將我攬住

「鬆手。」我有啲慌張，但同時心裏有啲嬲





我嘅雙手捉住佢攬喺我腰上嘅雙手想將佢推開，「孫慧伶，我叫你鬆手⋯！」

一切嚟得太突然，我都有啲比唔切反應，我冇諗過佢會突然間有咁嘅舉動

「對唔住⋯！」孫慧伶忽然間講出三個字，我頓時愣住，雙手推開佢隻手嘅動作亦隨即停咗落嚟，「新，對唔住⋯」

我冇諗過佢會為之前嘅事同我道歉，但我感覺到佢係真心同我道歉，我知道佢係⋯

「我接受你嘅道歉，但唔該你放開我。」我嘅雙手放到背後將佢嘅手腕捉住，稍微用力地將佢緊抱住我嘅雙手拉開





被我推開嘅孫慧伶企喺我面前，雙手仍然懸喺半空，但佢下一秒竟然又行近我，雙手搭喺我嘅腰上，捉住我嘅裇衫

「孫慧伶你想點呀？」我一下子將佢嘅雙手推開，壓抑住心底嘅怒氣，「唔好愈嚟愈過份，夠啦真係。」

「新⋯」孫慧伶弱弱地叫咗我一聲，但佢咁樣叫我，我只係諗起今日蔣倩盈第一次唔係叫我全名，「我真係好後悔我錯過咗你⋯」

「玩夠啦孫慧伶，真係夠⋯」我平伏番心情，平靜地講道，「我同你真係唔會再有可能，我亦接受咗你嘅道歉啦已經⋯」

我輕輕地將孫慧伶推開，然後伸手拉門柄開門離開store room

Store room嘅門先開咗一條縫，我又比佢一下子拉佢，呢一刻嘅我已經唔耐煩到極點，我皺起眉頭望向佢同時，一下子將佢隻手推開

「我真係唔想同你咁樣糾纏落去，你放過我得唔得？」我用盡平淡又冷漠嘅態度對佢

我真係冇辦法同佢咁樣僵持落去，亦唔想同佢糾纏，佢自己揀同張景彥一齊，宜家佢對我嘅舉動又算係啲咩⋯？





「唔得⋯我做唔到⋯」孫慧伶搖搖頭

「當初係你揀分手，我唔係冇留你，係你堅決要同我分開。」我平淡地講道，腦海中浮現出當初我仲同佢一齊嗰陣嘅畫面，「所以宜家你後悔又好點都好，我同你都唔會有可能。」

孫慧伶嘅情緒平靜落嚟，佢安靜地用手抹眼淚

「所以，你要一啲餘地都唔留⋯？你真係中意咗佢⋯？」孫慧伶開口問我，啱啱嗰股任性好似又慢慢消失

「嗯⋯」我微微點頭

「你真係有真心咁，中意過我⋯？咁快就中意咗佢⋯」孫慧伶有啲死心不惜，仍然要問一個唔會有佢理想中嘅答案嘅問題

「嗯，我有，曾經有。」我冇否認呢個事實





真心中意⋯天知地知，我知，蔣倩盈都知，曾經我有幾中意你；同你分開我有幾唔願意，我心入面難受咗幾耐

中意蔣倩盈，係我決定放低你之後，喺同蔣倩盈相處嘅過程中先衍生嘅感情

所以我冇好似孫慧伶講嘅一樣，咁快就中意咗蔣倩盈⋯

孫慧伶定睛地望住我，我從未見過佢因為我而傷心，今次係第一次⋯但我嘅內心冇為佢而動容，或者我真係完全放低咗佢

「嗯⋯」孫慧伶微微點頭，佢抿唇後笑咗一笑，「我知道啦⋯今日係我任性過份咗，對唔住⋯」

「嗯。」我微微點一點頭

我伸手拉下門柄，打開store room嘅門，直接離開store room、離開視藝室

X⋯X⋯X





孫慧伶一人企喺視藝室嘅store room內，store room嘅門「呯」一聲自然地閂上

孫慧伶努力地平伏自己嘅心情，佢曾經以為只要自己願意再次靠近，岑諾新就會自然而然地接受番佢

心底嘅後悔係真，孫慧伶知道岑諾新嘅好，所以先會後悔錯過咗岑諾新




IG Link: https://www.instagram.com/nd_cotttoncandy/?hl=zh-t