［愛情純愛］既然忘記唔到佢，不如試下中意我⋯？: 127. 再選一次的話⋯

「做咩？」我望住佢，然後我將手伸到後頸，我摸到佢隻手掂喺我嘅衫領上

「你個衫領反起咗。」蔣倩盈講道，我默默地收回手，由佢幫我將後面嘅領整好，「Okay啦～」

「唔該。」我伸手摸一摸自己嘅衫領，衫領已經整番好

「大佬，食飯啦去～」楊朗然行過嚟，蔣倩盈嘅手剛從嘅嘅衫領移開，「唔好卿卿我我啦，食飯啦⋯」

「邊個卿卿我我呀⋯！」蔣倩盈嘅臉頰泛起淡淡嘅紅霞，伸手拉一拉我嘅衣角





「我去食飯啦⋯」我望向蔣倩盈，蔣倩盈微微點頭，然後鬆開手

我同楊朗然一齊移出課室，落去小食部食飯，平時我地都係出去食，好耐都冇試過同佢地一班人一齊喺學校食飯

「之前我仲以為你個心入面得孫慧伶添，睇嚟都唔係。」楊朗然喺踏出一步落樓梯嘅時候忽然講道

我默默地望咗楊朗然一眼，但我咩都冇講，做咩好地地又提起孫慧伶⋯

「我冇咩特別意思，只係怕你做咗個渣男啫～」楊朗然笑一笑講道，「我之前仲以為你搵佢做水泡。」





「你指蔣倩盈？」我下意識就開口問，明明我就知道佢講緊嘅「水泡」係指蔣倩盈

「唔通呢？唔通我講你個Ex呀？」楊朗然無奈地講道，「睇唔出你會中意蔣倩盈，我以為你中意嘅係你個Ex嗰種斯斯文文，有啲氣質嗰種。」

其實我冇特別指定中意啲咩類型，只係因為我之前好中意孫慧伶，所以先比咗一個錯覺楊朗然，以為我只係中意孫慧伶呢類女仔

而且，孫慧伶先冇大家想像中咁美好⋯

「蔣倩盈都幾好。」我講道，諗起蔣倩盈，我嘅嘴角都不自覺地試揚，「好過孫慧伶。」





「哦～好識講嘢喎～」楊朗然即刻趁機調侃我，「大佬，我想問你好耐，比A0嘅你揀多次初戀女朋友，你會揀邊個？」

「呢個係咩問題嚟⋯」我輕皺起眉頭，心裏有啲無奈

「你揀呀！揀邊個？」楊朗然一臉好奇咁講道，喺佢冇瀏海遮住嘅額頭上都刻住「好奇」兩個字，真係好奇到出面，「你嘅答案，我唔會同人講。」

見楊朗然咁樣問，我都不禁認真咁諗，再揀一次嘅話，會揀邊個做初戀女朋友⋯我諗我應該會揀⋯

「蔣倩盈。」我認真咁諗咗一陣之後回答道

楊朗然一臉訝異，大概係因為佢冇諗過我會答蔣倩盈而唔係答佢孫慧伶，但呢個答案，但我認真諗完之後得出嚟嘅答案

「我仲以為你會答孫慧伶⋯！」楊朗然訝異地講道

「佢地完全唔一樣。」我淡然地講道，「同蔣倩盈一齊，比同孫慧伶一齊嘅時間開心。」





「竟然⋯！？」楊朗然仍然係一臉震驚，「你咁中意人，你竟然會覺得同蔣倩盈一齊開心啲！？」

「真心㗎。」我仍然淡然地講道

我真心覺得同蔣倩盈一齊開心過同孫慧伶一齊，不過算啦，佢冇同佢兩個相處佢唔明白點解我會揀蔣倩盈

「點解？」楊朗然追問我

「你唔明。」我嘅嘴角微微上揚，「蔣倩盈同佢太唔一樣。」

「唔一樣？」楊朗然唔明白，佢輕挑起眉，聲線帶着點疑惑

「嗯，唔一樣。」我冇解釋，只係笑一笑講道





楊朗然疑惑地望住我，但見我冇打算解釋便冇追問落去

「不過大佬呀，你唔好傷人地心呀～」楊朗然提醒我一樣拍咗我膊頭兩下，「就算你真係曾經好中意孫慧伶都好⋯」

孫慧伶迎面朝我地行過嚟，我同孫慧伶嘅視視即使冇對上，我都感覺到佢嘅視線落喺我身上

喺孫慧伶差唔多行到我身旁嘅時候，我淡然地開口對楊朗然講：「你都識講，係曾經，過咗去就冇必要再番轉頭。」

嗯，我係有意無意咁，講比孫慧伶聽⋯我唔會為佢而番轉頭，佢再點樣靠近我都好，我都唔會番轉頭搵佢

楊朗然留意到啱啱喺我地旁邊行過嘅孫慧伶，佢呆咗一呆，楊朗然望一望我，又望一望已經行過咗我地嘅孫慧伶

「大佬⋯」楊朗然小心翼翼地叫咗我一聲，唔知幾時開始佢就成日都叫我「大佬」

「我都未擔心，你擔心啲咩？」我無奈地望佢一眼講道，「反正都點都好都唔會番轉頭。」





「睇嚟你已經比蔣倩盈迷到一個點啦啵～」楊朗然用手肘輕撞咗我兩下

「都唔係比佢迷住嘅⋯」聽到楊朗然咁講，我覺得有啲唔好意思，「係相處起嚟嘅感覺⋯？」

唔係比蔣倩盈迷住，只係單純地覺得同蔣倩盈相處舒服過同孫慧伶相處，蔣倩盈就係會知道遷就，就算我話唔緊要跟佢，佢都會問我意見；孫慧伶則係要我遷就，我唔遷就嘅話就係我嘅錯

楊朗然唔會明白，佢地兩個人比我嘅落差有幾大⋯




IG Link: https://www.instagram.com/nd_cotttoncandy/?hl=zh-tw