［愛情純愛］既然忘記唔到佢，不如試下中意我⋯？: 123. 不會讓你跌

蔣倩盈望住我，猶疑緊點答我好，我其實都有啲私心想見多佢一陣，下意識就搵咗嵐嵐做借口

「一陣。」我都唔等佢回答就主動地拉起佢隻手

我拎出鎖匙開門，蔣倩盈拎住玩具店嘅膠袋行喺我身後跟我入屋，我望到放喺鞋櫃前嘅一對皮鞋，岑諾嵐喺屋企已經，而且佢嘅房門虛掩着，佢應該喺房做緊功課

「噓⋯」我將手指輕抵喺唇前，示意蔣倩盈唔好出聲

我行到岑諾嵐嘅房門前，蔣倩盈企喺門邊貼住牆企，岑諾嵐唔會見到佢





「叩叩。」我喺門虛敲咗兩下，然後先推開佢嘅房門

「哥哥你番嚟啦？」坐喺書枱前嘅嵐嵐回頭望向我

「嗯，我仲順便買咗你想要嘅公仔番嚟。」我對嵐嵐講道

「真係㗎！？」嵐嵐一聽到便即刻從櫈上跳起身，跪坐喺櫈上

「真係㗎！」蔣倩盈拎住膠袋從門邊探頭出嚟





「姐姐！」嵐嵐即刻落地跑過嚟

「睇下～哥哥今日特登去買咗你中意嘅公仔比你呀～」蔣倩盈微微彎下腰，先將我買嘅狸貓公仔從膠袋中拎出嚟

「嘩～」嵐嵐即刻興奮地接過狸貓公仔，然後抬頭望住我，「多謝哥哥！」

「嗯。」我微微點頭

「嵐嵐呀～你今次咁叻女，姐姐都買咗嘢比你啵～」蔣倩盈嘅手又伸到膠袋入面，嵐嵐一聽到，注意力頓時都集中喺蔣倩盈身上，「睇下～中意嗎？」





蔣倩盈將熊啤啤拎出嚟，遞到嵐嵐嘅面前，嵐嵐頓時雙眼閃出光一樣

「姐姐你點知我都中意熊啤啤㗎！？」嵐嵐頓時伸手接過蔣倩盈買嘅熊啤啤公仔，仲要比咗一個大大嘅擁抱蔣倩盈，「多謝姐姐！」

「下次都要加油知唔知呀？」蔣倩盈笑一笑講道

「嗯！知道！」嵐嵐用力地點頭，「多謝姐姐！」

「偏心到你呀岑諾嵐⋯」我無奈地講道，「哥哥都買咗公仔比你，又唔見你攬我？」

「多謝哥哥！」嵐嵐頓時跑到我面前攬我一下

「嗯，番去做功課啦⋯」我無奈地輕輕拍一拍佢嘅頭，叫佢番去做功課

我行番去自己房，蔣倩盈跟喺我身後





「坐啦⋯」我拉開電腦椅比蔣倩盈坐

我將房門虛掩着，坐喺床邊就將領呔解鬆，當我抬頭嘅時候，見到蔣倩盈直勾勾地望住我

「做咩⋯？」我有啲疑惑地問道，停下咗解呔嘅動作，低頭望一望自己嘅呔，「你⋯尷尬⋯？」

「冇⋯」蔣倩盈微微耷低頭，輕輕抿唇，手不自在地掃一下馬尾

我見到佢嘅唔自在，佢冇講，但我都係睇得出嘅⋯我默默地將呔整番好，將領結推到去頸喉鈕前

「我冇尷尬呀真係⋯」蔣倩盈見到我嘅舉動連忙笑着講道，「你想除嘅話，真係可以⋯」

「唔緊要，唔除都可以⋯」我望住佢尷尬嘅樣，我自己都有啲尷尬





我同蔣倩盈忽然間都靜咗落嚟冇講嘢，氣氛都變得尷尬

「你洗唔洗飲啲咩？我去望一望有咩飲⋯」我企起身打算逃離呢個尷尬嘅空間

「唔、唔洗⋯！」蔣倩盈一下子企起身捉住喺佢身邊行過嘅我

我擰番轉頭望佢，我見佢一直捉住我，便成個人轉身面向佢

蔣倩盈默默地朝我行近咗一步，雙手捉住我嘅衫領，用力地將我嘅衫領向下拉，我一時比佢剎我一個措手不及，比佢連人帶衫領拉咗落去

佢企喺我嘅面前微微踮起腳尖，將我朝佢拉嘅時候剛好錫到唇

蔣倩盈佢都⋯太大力啦掛⋯？

喺我伸手輕輕攬住佢之際，佢卻乖乖地將我鬆開，攬住我同時將頭埋喺我頸窩中





「岑諾新⋯」佢抬起頭定睛望住我，柔聲輕喚我一聲

佢咁樣叫我一聲，我頓時覺得有啲毛管戙，不禁吞咗啖口水

「嗯⋯？」我唔敢亂郁亂講嘢，只好用喉嚨發音

「冇咩～」蔣倩盈朝我笑一笑，「冇咩冇咩～」

望住蔣倩盈嘅笑容，我嘅嘴角都不自覺地上揚起嚟，到底係佢嘅笑容有感染力定只係單純地因為我中意佢⋯？

「蔣倩盈⋯」我叫咗佢一聲，然後喺唔比心理準備佢嘅情況下將佢一下子抱起

「喂⋯！」蔣倩盈有啲慌張，佢嘅雙手緊緊地捉住我嘅膊頭，怕我會錯手將佢跌到地上一樣





「我唔會跌親你，唔洗咁慌張。」我將佢輕輕拋一拋起，再抱番實佢

「喂⋯！」蔣倩盈更用力咁捉住我，「嚇到我心都離一下啦⋯！」

「我會捉實你。」我笑一笑講道，我見到佢嘅臉頰都變得紅紅的，「唔會要你跌親。」

蔣倩盈郁咗一郁，確保自己唔會跌落地

佢撇開臉唔望我，喺佢撇開臉嘅一刻，我留意到佢連耳根都紅起嚟，睇嚟係真係怕羞面紅




IG Link: https://www.instagram.com/nd_cotttoncandy/?hl=zh-tw