［愛情純愛］既然忘記唔到佢，不如試下中意我⋯？: 117. 意料之外

心裏忍唔住就會擔心佢，一個message都冇睇，到底佢做咩⋯？琴日佢明明就係唔開心，但卻一隻字都冇同我講過關於佢心事嘅內容

明明之前嘅我同佢都可以坦白講，但宜家卻相反了⋯

「你唔舒服？醒咗記得覆我」我喺我同佢嘅對話框中輸入道

「佢番嚟啦。」希童忽然間輕輕力地拍一拍我

正打算㩒「發送」嘅指尖懸喺半空，我抬起頭望向課室嘅門口，見到岑諾新孭住書包推門行入嚟課室





「原來佢冇事呀⋯」我見到佢嘅一刻，心入面鬆咗一口氣，「太好啦⋯」

岑諾新行番埋位，企喺座位旁邊將書包除落嚟，我抬起頭定睛地望住佢，望住佢將書包掛喺枱邊

佢拉開座位嘅櫈坐低，察覺到被我望住嘅佢望向我，同我嘅視線對上

「你唔舒服？」我關心地問道，見到佢嘅一刻，心頭大石都放咗落嚟

「嗯⋯今朝起身嘅時候有啲頭痛⋯」岑諾新微微點頭，「連手機都冇睇就翻瞓。」





「唔緊要啦，有冇食藥呀？」我頓時追問道，「宜家好啲啦？」

「冇事，已經冇事啦。」岑諾新講道，我心裏再一次鬆一口氣

「我都係唔好喺度做電燈膽比較好⋯」希童有啲尷尬咁講道，然後行去搵樂恩

「Yo！兄弟！」楊朗然過嚟一下子拍岑諾新嘅膊頭，「做咩偷懶唔番學呀？」

「我宜家咪番咗嚟囉⋯」岑諾新無奈咁望咗楊朗然一眼，「講到好似我逃學咁⋯」





「我好擔心你嘛兄弟⋯」楊朗然搭住岑諾新嘅膊頭講道，「好擔心好擔心⋯」

「你唔好咁gay得唔得⋯」岑諾新無奈地將楊朗然嘅手推開

「人地蔣倩盈關心你就可以，我做兄弟嘅就比你嫌棄⋯！」楊朗然不滿地講道

「你想做我女朋友咩？」岑諾新望向楊朗然，「但我地只可以做好兄弟。」

「噗⋯楊朗然你唔好妒忌我啦～」望住佢兩個嘅交流，我真係忍唔住笑咗出聲

「邊個妒忌你呀？」楊朗然對我講道，然後望向岑諾新講正經事，「不過今日你冇交嘅嘢，陣間記得交番，你知我地物理阿sir幾煩㗎啦⋯」

「交咗，上嚟之前去教員室交咗喺佢簿櫃。」岑諾新企起身，搭一下楊朗然嘅膊頭後行去locker嘅方向

見到岑諾新番咗嚟，我成個人都輕鬆晒





我起身跟喺佢身後，行到佢嘅身邊，佢啱啱蹲低開locker拎嘢時，我就行到佢嘅身旁

「做咩跟埋我過嚟？」岑諾新一瞬間就察覺到係我

「冇呀～想話⋯不如今日一齊食lunch咋嘛～」我笑一笑講道

「好呀，仲以為你有咩想講添。」岑諾新將locker門閂上，拎住啱啱喺locker中拎出嚟嘅嘢起身

「冇咩想講呀～就係今日有啲擔心就係啦，你又冇睇我message⋯」我露出擔心嘅表情對岑諾新講道，「不過你冇事就好啦～」

「今朝早頭痛到連睇手機嘅力都冇，所以先冇覆你又冇同你講。」岑諾新微微一笑對我講道

「真係冇唔舒服啦？今日晏就想食咩呀？」我問道，「你想嘅話可以同你一齊食得清淡啲～」





「唔洗，我真係Okay。」岑諾新微微搖頭，「你睇下你想食咩啦。」

「我食咩都可以呀～怕你唔舒服咋⋯」我都係有啲擔心，怕佢會唔舒服，「今日我地食得清淡啲啦～」

「你話事啦～」岑諾新笑一笑講道，然後拎住疊書行番埋位

⋯

喺上堂對番英文Listening嘅答案時，我抬頭望一望show喺螢幕嘅答案，然後拎住紅筆嘅手就喺exercise book上面打一個剔

「上一題答案係咩？」坐我後面嘅女仔拍一拍我問道

「嗱。」我直接將我本exercise book遞比佢睇

我稍微側身將本簿遞過去 嘅時候，眼睛嘅餘光見到岑諾新一手托住下巴，一下拎住紅筆對緊答案





我偷偷地望向佢，認真嘅佢令我最心動⋯我偷瞄佢一眼，佢拎住筆喺簿上寫下答案

佢忽然間離我好近一樣，以前我同佢之間嘅距離好遠，就算企喺對方身旁都好，總覺得我地差天共

佢習慣我喊到雙眼紅紅，我亦習慣佢嘅冷淡對待，我地都各自喺心中留咗一席位比一個人，大家都唔願意真正放手

我以為我會一直中意張景彥，亦以為佢會一直中意孫慧伶⋯結果原來，係只要大家都肯放低同踏出一步，會有你意想不到嘅結果出現

岑諾新偶然望向我，我地嘅視線對上嘅一刻，我同佢都好似會不自覺地嘴角上揚

⋯

我同岑諾新去咗我地平日去開嗰間餐廳食飯





呢間餐廳都幾抵食，又平又好食，我地呢啲學生絕對負擔得起




IG Link: https://www.instagram.com/nd_cotttoncandy/?hl=zh-tw