［愛情純愛］既然忘記唔到佢，不如試下中意我⋯？: 115. 又是他

食完雪糕之後，我地行出雪糕店

我望一望時間，都係就嚟6點，還可以的～

岑諾新將我送到屋企樓下，伸手摸摸我頭之後就同我講拜拜

「番到去同我講⋯」我上前攬住佢

佢身上嗰種無法言喻嘅味道，令我感覺到安全感⋯有啲貪戀⋯佢身上嘅氣味⋯





「你要番去啦。」岑諾新對我講道，佢輕拍咗我嘅手臂兩下，「差唔多時間啦。」

「唔緊要嘛⋯」我喺佢嘅懷中蹭咗兩蹭，「仲未想番去⋯」

「聽日仲會見嘛⋯」岑諾新對我講嘢嘅聲線都溫柔咗一樣，「又唔係唔見。」

「你做咩咁想我快啲番屋企咁嘅⋯」我抬頭望向岑諾新，「你唔係想見我咩？」

其實我明明知道答案，但都要問佢⋯





我明明知道，係因為我上次見到我媽媽嘅反應，令佢怕會喺比我媽媽再見到時，我又答一句「係朋友。」

我鬆開佢然後拖住佢嘅手，好想話佢知如果再見到嘅話，我唔會再講佢係我朋友⋯

「快啲番去啦。」岑諾新對我講道

「好啦⋯」我點點頭，不捨地鬆手，「我番去啦⋯」

「聽日見。」岑諾新無奈一笑對我講道





「拜拜，聽日見！」我講完便轉身朝大堂行去

我番到屋企坐番喺書枱前，望住手機發一下呆，我純粹拎住手機放空

手機震咗一下，我回過神，望向亮起嘅螢幕時，見到係岑諾新send過嚟嘅message

岑諾新：番到屋企啦

「Okay～」我回覆道，「食完雪糕，今晚唔洗食飯」

岑諾新：食少啲，我應該都食得落

「我想講，我仲未諗到嗰題點做⋯」

岑諾新：send比我睇下，睇下我識唔識





我將題目send咗比岑諾新，呢份功課佢都要做，所以佢遲早都會做，宜家當係一齊諗咗答案先？

我一邊再睇一次書，一邊等着岑諾新嘅回覆，順手地喺IG story隨手影咗題目，打上caption：我要諗到幾時先諗到答案⋯

「冇理由㗎⋯我上次真係見到書有⋯」我邊喃喃自語地講道，邊掀着書搵答案，「唔通我睇錯？」

「Di、Di⋯」放喺手旁嘅手機震動咗兩下，我估係岑諾新回覆我

手機螢幕亮起就自動用face ID解鎖，彈出嚟嘅通知卻唔係嚟自岑諾新嘅message通知，而係張景彥⋯

佢又搵我做咩⋯佢reply咗我嘅story⋯

張景彥：書有答案





「我都知，但搵唔到答案」我禮貌上回覆道，雖然都係有啲唔情願

我見到張景彥typing，佢地班係唔係已經做咗呢份功課？

張景彥：有，喺P.6263左右

「Thx」我簡單地回答道，然後頓時打開書P.62頁睇一次

「真係有喎～」我今次真係見到有呢題嘅答案，我連忙拎起筆寫低答案

「搵到啦！」我send咗個message比岑諾新，「喺P.62」

岑諾新：我都搵到，打算同你講嘅時候你就話搵到（笑喊）

「你快啲寫定喺功課上面先！」我回覆道，「順便幫你做埋功課」





岑諾新：宜家寫低先～

岑諾新都會用呢個「～」附號⋯？佢平時都好少用呢個附號，平時佢講句嘢都好平淡咁，估唔到佢用呢個，有啲反差嘅感覺⋯？

手機彈咗一個message通知出嚟，我一望，又係張景彥嘅message

張景彥：搵唔搵到？

「搵到，Thx」我對佢好禮貌，每一句都加個Thx一樣

我對佢咁禮貌咁客氣，代表我同佢真係真係，唔係好熟

張景彥：我地班已經交咗呢份（笑喊）





我就咁連㩒咗兩下佢send嘅message，like咗當覆咗就算，反正都喊係啲咩好重要嘅嘢，要講唔該嘅都講咗，要幫嘅都幫咗

我將最後一題嘅答案都寫好，然後將份功課收番入書包入面，順便執一執書包，將聽日冇堂嘅書拎出嚟放入書櫃，將筆袋掉番入書包入面

「Okay～」我自言自語地講道，然後將書包放番喺門邊




IG Link: https://www.instagram.com/nd_cotttoncandy/?hl=zh-tw