［愛情純愛］既然忘記唔到佢，不如試下中意我⋯？: 96. 遷就

「咁你想去邊都重要㗎嘛～我開心啫，你都要開心先可以㗎～」蔣倩盈好似知我諗咩一樣對我講道

「你識讀心術？知我諗緊咩？」我不禁一笑問道

「吓？唔知呀～」蔣倩盈笑一笑，「你諗緊咩呀？」

「冇。」我微微一笑講道，「冇諗啲咩，你諗好去邊同我講。」

「哦。」蔣倩盈遲疑地點點頭，「你有冇邊度想去呀咁？」





「冇，你想去邊，我跟你就係。」我講道

我都幾習慣就對方嘅想法，或者因為同孫慧伶一齊嘅時候一直都係咁

「咁呀⋯我再諗下啦～」蔣倩盈帶着小跳步朝我行咗兩步，然後一下子攬住我，「你有特別地方想去嘅話可以同我講～我可以陪你去～」

「好。」我點點頭講道

或者，因為同孫慧伶一齊嘅時候，習慣咗一切都要遷就佢，佢想去邊就要去邊，唔想去邊就唔去邊；我想去嘅地方係佢唔想去嘅地方嘅話，就唔可以去；食飯要跟佢，唔記得佢唔中意食咩嘅話，佢會發我脾氣





驚喜對孫慧伶講都唔算啲咩，佢仲可以挑剔我一輪，雞蛋入面剔骨頭⋯喺佢面前，我永遠都要諗唔同嘅方法氹佢開心，做得唔好比佢嫌棄，做咗都要比佢挑剔

「咁⋯我番去啦～」蔣倩盈抬頭望住我

「嗯。」我微微點頭

「你番到去同我講。」蔣倩盈先喺我嘅頸窩上蹭咗兩下後再放手，呢個動作成為咗佢嘅習慣一樣，每一次攬我佢都會咁樣喺我頸上蹭兩下

我同佢分開後一個人番屋企，番到屋企嘅時候嵐嵐已經喺屋企





「哥哥！」嵐嵐打開大門，大概係聽到我嘅鎖匙聲所以出嚟開門

最近媽媽開始比嵐嵐一個人放學番嚟屋企，始終我媽都要番工，嵐嵐嘅成績就算唔去補習都跟得上，所以媽媽直接減咗補習班嘅堂數

「番到屋企」我拎住書包番房同時拎出手機send咗個message比蔣倩盈

蔣倩盈：Okay～我都喺屋企啦～

「我知，送到你去屋企樓下」我回覆道

蔣倩盈：係係～你最好啦，送到我番樓下

「我冇咁講，你覺得咋」我回覆道

蔣倩盈忽然間send咗張相過嚟忽我，我一㩒開嚟睇，見到係佢嘅自拍，同Boomerang⋯單起眼微笑着，仲要比咗個Yeah





「乜鬼嘢⋯」我無奈地講道

「哥哥，你笑咩呀？」嵐嵐行入嚟我房，睇嚟又係要我教佢做功課之類

「嗯？」先啱啱坐低喺電腦椅上嘅我疑惑地望向嵐嵐，順手地鎖上手機螢幕，「咩笑咩？」

「哥哥你啱啱唔係笑咩？」嵐嵐行到嚟我身旁站着，「你啱啱明明係喺度笑呀～」

我啱啱笑啦⋯？感覺我最近好似笑多咗⋯

大概係因為蔣倩盈嘅笑容有感染力，每次見到佢嘅笑容，我都會不自覺地嘴角上揚笑起嚟似的

「唔識功課？」我避開啱啱嘅話題問道





「唔係呀～媽媽喺你番嚟之前打過電話番嚟，叫你幫佢收衫呀～」嵐嵐嘅雙手捉住我嘅書枱邊講道

「嗯。」我企起身朝廚房行去，「岑諾嵐你唔洗做功課？」

「做晒啦～」嵐嵐笑笑口講道，跟喺我身後行入廚房，喺零食袋中拎咗包薯片後行出廳坐喺梳化上邊睇卡通邊食薯片

「唔好食咁多。」我喺廚房探頭望出去對佢講道，「今晚食唔到飯，媽媽又鬧。」

「知道～」嵐嵐望向我乖巧地點頭

我將手機放喺洗手盤隔離乾嘅位置，方便我睇message，順手拎咗支晾衫叉將掛喺管上嘅衫都收落嚟

我攬住收落嚟嘅衫，拎埋手機行出去梳化，順手將啲衫接好

放喺一旁嘅手機一震，我拎起手機望一望，我啱啱將手機解鎖，岑諾嵐即刻八卦地起身蹲喺梳化上行到我隔離





「姐姐搵你呀？」嵐嵐一臉好奇咁問我

「睇卡通片啦小朋友。」我無奈地講道

蔣倩盈：啾咪（心心）

「佢係特登㗎係咪⋯」我喺心中默默地講道然後耷低頭，嘴角又一次不知不覺地上揚

見到佢呢個message，就覺得好似比佢錫咗啖一樣

「啾咪」我將佢嘅message copy and paste send番比佢

唔知佢睇到我個message嗰陣會有咩反應，佢會唔會面紅⋯





「面紅嘅佢，應該會有啲可愛⋯」我不禁喺心入面幻想佢面紅嘅模樣

蔣倩盈會係臉帶紅霞微微一笑，定係會一臉羞澀地移開視線？




IG Link: https://www.instagram.com/nd_cotttoncandy/?hl=zh-tw