［愛情純愛］既然忘記唔到佢，不如試下中意我⋯？: 93. 鄰座

我喺手上拎住嘅漢堡包上咬咗一口，眼尾嘅餘光中卻見到岑過新笑咗一笑，我帶着少許疑惑抬頭望向佢

「你嘴邊都有嗰個醬。」岑諾新笑咗一笑後，直接拎起紙巾幫我抹嘴角

我怔了一怔，心跳有啲快、臉頰有啲熱、人有啲唔自在；我悄然地將視線移開

「飲啖汽水冷靜下先⋯」我啖心中講道，然後就伸手拎起嘢飲杯，即刻飲啖嘢冷靜下個人先，「咦⋯呢個味⋯」

飲落去唔係我叫嘅雪碧呀⋯我鬆開比我咬住嘅飲管低頭一望，入面係可樂⋯





我抬頭望向岑諾新，岑諾新一聲不吭，只係托住頭望我

「我杯汽水好飲啲？」岑諾新淡定地問道

「吓⋯？冇呀！我唔小心拎錯咗⋯！」我忽然之間有啲不知所措，瞬間將佢杯嘢飲放番低喺佢面前

岑諾新耷低頭食嘢，咬咗一啖漢堡後順手地拎起佢嘅汽水飲咗一啖

「間接咁⋯」我喺心中不禁講道，臉頰瞬間比啱啱更熱





但岑諾新好似咩都冇察覺到一樣，平靜地將汽水杯放低繼續食嘢，只有我自己尷尬

我同佢對上視線，我尷尬地笑咗一笑然後微微耷低頭

「尷尬⋯」我笑着細聲地講道

「做咩尷尬？」岑諾新嘅嘴角微微上揚，仲要明知故問

事源係今日朝早，早會後嘅班主任時段





⋯

朝早，班主任時段

「我地班都好耐冇調位啦，先前大家話想調位，咁今日我地就調位啦，應該夠時間嘅⋯」我地班嘅班主任Miss Yip企喺老師枱前講道，「事不宜遲，照舊執好嘢出嚟抽籤決定坐邊。」

Miss Yip拎咗個紙箱出嚟，平時我地班調位都係咁樣調，由我地自己抽番自己坐嘅位置

大家因為對調位呢件事已經期待咗好耐，所以大家好快就執好晒自己啲嘢行出去抽籤

「希望今次我可以同你一齊坐啦～」詠妍拉住我隻手講道

「我都想同你一齊坐，上天保佑！」我對詠妍做出雙手合十嘅動作，「次次都同你分得好遠，希望今次可以坐近啲。」

行前面幾個人都抽完籤，我行上前伸手入紙箱中，拎到一張紙後便將手抽番出嚟





紙上寫住「4-4」，即係第四行第四個位

第四行係班房入面最好嘅行數，因為係正課室嘅中間，對住老師枱，望出去可以望晒螢幕同黑板

我攬住書包行到自己嘅新座位擺低啲嘢，詠妍排喺我後面，我一放低嘢就行出去睇下詠妍抽到坐邊

「你坐邊呀？」我問詠妍

「嗱。」詠妍將張紙遞比我睇，上面寫住「5-3」

「好近呀我地坐得⋯！」我自己都有啲震驚，呢個座位距離大概係我同詠妍同班以嚟坐得最近嘅一次

希童嘅座位喺「3-3」，樂恩嘅座位喺「5-4」





同佢地都坐得好近，都係喺附近～

我望向出面排緊隊抽籤嘅其他人，其實我唔太在意其他人坐邊，我比較想知道岑諾新會坐邊

宜家抽緊座位嘅係楊朗然，下一個係岑諾新，我見楊朗然望咗張紙一眼後便行到去第六行第五個位坐底

「佢會坐邊⋯？唔好同佢隔太遠就好⋯」我喺心入面咁諗嘅時候，岑諾新嘅手已經伸咗入去紙箱入面

我望住佢拎咗張紙出嚟，打開望咗一眼，然後直接行去佢嘅新座位

咦⋯？等陣先⋯岑諾新行喺第三行同第四行之間，然後將書包放低喺我右手邊嘅位置，佢嘅座位係「3-4」⋯？

已經安頓好一切坐喺位嘅我同佢對望，我嘅心跳⋯頓時就加快跳動嘅速度

「Wow～」坐喺我地附近嘅人即刻用眼神再加聲音起哄





「好有緣呀你兩個～」坐喺岑諾新前面嘅希童望住我講道，「抽籤都抽到一齊坐～」

我同岑諾新都望一望希童，然後又對上視線，有種⋯唔知講咩好嘅尷尬⋯

仲要坐到咁近⋯坐喺隔離係咩事⋯

「我只係想坐得唔好離咁遠，唔洗喺正隔離呀⋯」我喺心中無奈地講道

我喺調咗嚟呢個位之後都冇乜點望向佢嗰邊，同佢講嘢都會唔自在⋯一定比人抽硬水⋯

然後喺上中文堂嘅時候⋯

「今日邊個冇帶中文書？」Miss Chan喺教書前問道





有幾個人企咗起身，示意自己冇帶書，而企起身嘅人，包括咗宜家坐喺我隔離位嘅岑諾新

「今堂要用書呀，你地同附近嘅人一齊睇啦要。」Miss Chan拎起放喺枱上嘅書，「抄番今日教呢篇範文一次，聽日交呀。」

岑諾新嘅附近，基本上都係女仔，就連坐喺佢附近嘅兩個男仔都冇帶書

我微微耷低頭望書，唔想望向佢嘅方向，假裝自己咩都唔知道，雙手一直因為有少許唔自在嘅感覺而輕輕地掐住筆




IG Link: https://www.instagram.com/nd_cotttoncandy/?hl=zh-tw