［愛情純愛］既然忘記唔到佢，不如試下中意我⋯？: 89. 意外

「呀！」「嘩呀！」

詠妍都未行過一步，我唔想發生嘅事直接發生咗，我真係直接同孫慧伶撞到正一正，但撞到唔係重點，重點係佢手上嘅保溫杯入面裝住嘅唔係暖水，係熱水，熱水喺我地相撞嘅一刻從佢嘅杯中溢出

「你點呀？」詠妍慌張地捉住我隻手，樂恩喺我身後扶住我

因為喺啱啱撞上之後我下意識向後行咗一步，唔小心踩到樂恩

孫慧伶都比熱水燙到，保溫杯比佢嘅反射動作掉到地上，佢兩個freind喺佢身旁連忙扶住佢；保溫杯跌到地上嘅一刻，熱水嘅水花灑出嚟，彈到佢同時彈到我隻腳





我條裙前面濕咗，大腿都覺得熱熱的，但最痛嘅係我隻左手，熱水喺最近距離溢出落喺我隻手上面

「快啲去沖水！快啲快啲！」詠妍同希童拉住我跑起嚟去廁所

詠妍一直㩒住水龍頭等佢可以keep住出水，希童捉住我隻手放到水下沖，樂恩拎住紙巾濕水然後㩒喺我腳上

「紅晒。」詠妍望住我隻手講道

「好彩係左手⋯而且好彩我縮得快⋯」我輕皺起眉頭，因為喺水打喺我手嗰陣會感覺到刺痛





孫慧伶同佢兩個friend企喺同我地相隔三個嘅洗手盆前沖水，我望一望孫慧伶，然後望番自己嘅手，好痛⋯

「痛唔痛呀？」希童一臉擔心地問道，「你隻手都紅晒啦⋯」

「刺痛囉⋯」我已經冇力去比表情，「要沖幾耐？好肚餓⋯」

「我同希童去買飯先啦，詠妍你陪佢沖水啦⋯」樂恩企起身講道

「嗯，你地去啦。」我望向佢地點點頭





希童同樂恩轉身小跑起嚟走出廁所先去買飯，我同詠妍對望咗一眼

「叫咗你扭番好個蓋㗎啦！」其中一個女仔對孫慧伶講道，「宜家整親啦！」

「比張景彥知道嘅話點算？」另一個女仔細聲地講道，但都唔知係佢「細聲」得太大聲定我聽力太好，我都可以聽到佢講咩，「心痛死佢。」

詠妍稍微回頭望咗孫慧伶一眼，然後望向我時反咗一個白眼

「應該Okay啦⋯」我講道，「番去啦⋯」

「係唔係真係Okay㗎？」詠妍半信半疑地鬆開㩒住水龍頭嘅手，捉起我嘅手

「真係Okay啦～番去啦～」我對詠妍講道，「好肚餓啦～等希童佢地買番嚟，佢知我地食咩㗎啦？」

「佢知㗎啦～」詠妍行喺我前面，幫我拉開廁所門，「洗唔洗去醫療室睇睇？」





詠妍一打開廁所門，我呆咗一呆，因為岑諾新就企喺廁所外面

「呃⋯我番去睇下佢地買好飯未！」詠妍連忙對我講道，然後朝課室行番去

我企喺岑諾新面前，微微耷低頭，好似做錯事嘅小朋友一樣

「你仲喺度嘅？唔係同楊朗然佢地出去食飯咩？」我下意識就轉話題

「楊朗然留堂，我陪佢喺學校食。」岑諾新講道

「躂、躂—」

忽然傳嚟嘅腳步聲打斷咗我同岑諾新嘅對話，我朝聲音傳嚟嘅方向望去，見到張景彥行到過嚟，佢見到我先係一怔，然後放慢腳步行到我面前





「孫慧伶仲喺入面⋯」我頓時對張景彥講道，指一指女廁嘅門

我抬頭望咗岑諾新一眼，又回頭望一望女廁嘅門，然後喺望向岑諾新後微微耷低頭

「番課室啦，肚餓，喂喂喂！」「去醫療室。」

岑諾新拉起我嘅手就直接朝住後梯方向行去，我甩都甩唔到佢隻手

「唔、唔洗啦！都沖咗水啦～」我喺岑諾新拉住我落樓梯嘅時候講道，「都冇事啦～」

岑諾新停低落嚟，轉身望向我，一下子就將我隻左手捉起

「你隻手紅晒，仲冇事？」岑諾新望一望我隻手，一臉認真咁對我講道，「去醫療室。」

「我真係冇事，沖過水好好多啦⋯」我講道，然後下意識回頭一望，喺我再望番過嚟時，只見岑過新定睛望住我，「孫慧伶佢都燙到，水好熱⋯」





「同我冇關係。」岑諾新拉住我就行

「真、真係唔洗去醫療室⋯！」我用右手捉住佢嘅手臂，岑諾新又一次停咗落嚟回頭望我，「我真係冇事！沖咗水之後真係冇事啦！只係有少少痛，Okay啦～」

岑諾新冇出聲，只係一臉嚴肅咁深呼吸一下，佢仍然捉住我隻手

「你嬲呀⋯？」我抬眼望向岑諾新，到底我點解要咁心虛，「我啱啱冇諗過會直接撞到，已經諗住避開，但又避唔切，所以先撞咗落佢度⋯點知佢會拎住杯熱水啫，佢燙到我都唔想⋯」

「嗯。」岑諾新淡然地嗯咗一聲，然後拎起我隻手，「真係冇事？真係唔洗去醫療室？」

「嗯⋯」我微微點頭，「唔洗去醫療室。」

「番去食飯。」岑諾新呢一刻先將我隻手放低，緩緩地鬆開我隻手，經過我身旁踏上梯級








IG Link: https://www.instagram.com/nd_cotttoncandy/?hl=zh-tw