［愛情純愛］既然忘記唔到佢，不如試下中意我⋯？: 80. Level跑

「嘟、嘟、嘟、嘟嘟嘟！」阿sir開咗CD機，聽到嗰個已經熟悉到不得了嘅音樂時，大家都自覺地邁步跑起嚟

冇錯，今日係PE體能考試，今日考嘅係惡夢般嘅Level跑！

呢個就係我今日唔想上PE堂嘅原因⋯我好討厭Level跑呀真係

通常去到Level 5，場上面都係得番男仔喺度跑，女仔都唔會跑到好多，可能因為PE呢科對男仔比較有利？

每次跑完Level跑之後都會覺得冇咗半條命一樣，每一下「嘟」聲間嘅間距愈嚟愈短，就要跑得愈快去追，所以會愈嚟愈攰





「跑到幾多？」企喺我同樂恩中間跑希童細聲地問我地

「照舊，Level 5走。」詠妍細聲地對我地講道

我地每次Level跑都會約定喺跑到幾時就走，免得剩留自己一個喺場上跑；不過好彩嘅係喺Level跑之後就會係自由活動時間，今堂唔洗打排球啦～

最近嘅PE堂都打緊排球，搞到我隻手青一塊紫一塊，手腕都紅晒，但今堂唔洗打排球實在太好啦～

「嘟⋯嘟⋯嘟⋯嘟⋯」提示聲每隔幾秒就響一響，「Level 4。」





「仲有一個Level就到Level 5啦！」我邊朝住球場另一邊跑同時邊細聲地講道，鼓勵一下自己亦鼓勵佢地三個

我地女仔呢邊已經又走咗兩個，場上跑緊嘅女仔得番七個⋯好攰呀⋯！快啲到Level 5啦！

「嘟⋯」

喺佢嘅提示聲響起時，我嘅腳尖剛好踩到黃線，但都未有時間喘氣就已經要跑番去對面

「嘟⋯嘟⋯嘟⋯」





我、詠妍、希童再加埋樂恩，我地四個一齊跑，同一時間踩線，同一時間再回頭跑

「呼⋯」我不禁呼一口氣，因為不停換氣令嘴唇變得有啲乾，身上因為出咗汗而黏黏的，感覺超級唔舒服

我朝男仔嗰邊望咗一眼，幾乎大半班跑男仔都仲喺場上跑緊，岑諾新都仲喺場上跑緊，一副柔韌有餘嘅模樣，好似好輕鬆咁

「嘟⋯嘟⋯嘟嘟嘟！Level 5。」

我地四個一聽到「Level 5」，跑到番去踩完黃線即走

「哈⋯哈⋯好攰呀⋯！」樂恩拎起放喺小食部枱上嘅水樽

「班男仔係咩構造⋯？咁跑得嘅⋯！」希童朝樂恩伸手，樂恩飲咗啖水後將水樽遞比希童，希童飲咗一啖

「我都想飲水⋯」我望住希童手上拎住嘅水講道





希童飲多咗啖之後將水樽遞比我，樂恩一直拎住個樽蓋等我地飲完水

「我又要飲⋯」詠妍喺個水樽啱啱掂到我嘴邊嘅時候已經伸手等

一枝水要四個人分，樂恩都唔介意，我地大家都唔介意飲對方口水尾，係好感情嘅表現～

「你條仔仲跑緊。」希童用手肘撞咗我一下

我地行番出去球場，佢之前可以跑到幾多Level？好似都有Level 7，Level 7對我嚟講已經係地獄嘅感覺

「嘟⋯嘟⋯嘟⋯」

岑諾新同楊朗然一齊跑，從對面跑緊番嚟，岑諾新望咗我一眼，好快又移開咗視線；佢地一同以緩步跑一樣嘅輕鬆表情跑到去對面，一同跑番嚟嘅時候佢地兩個忽然間High five





「佢兩個搞咩⋯」詠妍無奈嘅聲線傳到我嘅耳中，「真係好基友⋯」

「嘟⋯嘟⋯嘟嘟嘟！Level 7。」「嗶嗶⋯！」

阿sir吹響哨子嘅一刻，代表Level跑考試完結，跑到最後嘅人亦代表住達標完成，唔洗再跑圈補數

岑諾新行番嚟嘅時候同我對上視線，佢同楊朗然朝廁所行去，岑諾新從我身旁經過嘅時候佢拎起衣領抹汗

我回頭望向岑諾新，佢同楊朗然並肩而行，搞到我諗起啱啱詠妍話佢兩個係好基友，我不禁笑咗出嚟

跑完圈補數之後，就直接放我地自由活動，我地男女混合一齊挽數字球，係好啱多人一齊挽嘅遊戲嚟～

不過都唔係真係全班一齊挽，因為總有人會自己去打波或者挽，所以我地呢度其實只有大半班

「報數～」手上拎住排球嘅班長講道





我地圍咗個大圈然後報數，班長先發球，順帶一提，我係12號！

「22！ 」班長將排球拋起嘅同時嗌道

大家即刻四散，邊個係22號？

「停！」




IG Link: https://www.instagram.com/nd_cotttoncandy/?hl=zh-tw