［愛情純愛］既然忘記唔到佢，不如試下中意我⋯？: 74. 關係改變

我邊行邊睇手機，手機突然間彈咗個通知出嚟，蔣倩盈喺IG po咗story，佢@咗我

「幾時影⋯」我打開佢嘅story一睇，就見到張我摸緊貓嘅相，我連佢幾時影咗我相都唔知，「張相，係女友視覺⋯」

咁好啦，我都順手咁po一張男友視覺

X⋯X⋯X

啱啱po完相嘅我好快就好到一個新嘅通知





「岑諾新@咗我⋯？」我有啲疑惑，但心裏都好好奇佢@咗我啲咩，「會唔會係repost我嘅story⋯？」

我帶住好奇心㩒落去佢嘅頭像，因為啱啱好reload咗一次，所以佢係第一個頭像

佢嘅story入面咩字都冇，只有一張我拎住匙羹餵緊貓嘅相，咁樣影過嚟好自然，笑容同舉動都好自然

「偷影我！？」我入去我地嘅對話框，將佢嘅story like咗，然後再回覆佢

Message嘅下方好快就彈咗個seen出嚟，佢打算覆我啲咩呢





岑諾新：光明正大咁影

佢又真係光明正大嘅，我都睇到佢影我，只係當時冇覺得佢真係影緊我啫

「哦好囉～」我回覆嘅時候嘴角都不禁上揚起嚟

「咚咚—」手機又彈出一個訊息通知

爸：聽晚得唔得閒？好耐冇見，一齊食飯？





爸：我問咗媽媽啦，佢話可以

⋯

「食飯！」我媽拎起筷子

「食飯。」我拎起筷子夾餸到碗中

我抬眼望咗我媽一眼，我媽就好似平時一樣，食兩啖飯又望一望電視

「爸爸話聽晚一齊食飯，佢話佢問咗你。」我用筷子夾起飯放到口中，「佢放工之後過嚟？」

「嗯，係呀。」我媽望一望我，然後點點頭，「你同爸爸都好耐冇見啦係咪？」

「嗯⋯」我微微點頭





我爸媽唔係住埋一齊啦已經，正確嚟講，我爸媽已經離咗婚，喺我細個嘅時候就已經離咗婚

聽我媽媽講，話佢地之所以會去到離婚呢一步係因為爸爸係個事業心好重嘅人，重到忘記咗家庭⋯令佢地兩人之間嘅爭吵不斷，所以大家決定分開

不過，我爸媽離婚之後，佢地都冇再結婚搵新嘅另一半

「你聽日要唔要一齊？」我問道

「吓？唔一齊嘅話你地食咩？」媽媽微笑道，「不過爸爸主要想見你啫～」

「嗯⋯」我若有所思地點點頭

「你最近成日都出街嘅？」我媽帶着好奇嘅語氣問道





「嗯，係呀。」我唔知可以答咩，只好微微一笑，「同朋友一齊出去行下。」

我媽微微點頭，我冇打算咁快講比我媽知我拍拖嘅事，之後同岑諾新嘅關係穩定咗嘅話再同我媽講都唔遲，畢竟宜家我唔確定佢係唔係中意我

放喺手邊嘅手機螢幕忽然一亮，連續兩個message通知喺鎖屏上彈出嚟，我拎起手機望咗一眼，不禁一笑

「食飽啦。」我好快地食完飯，然後行去梳化坐低聽電視嘅同時睇手機

岑諾新share咗個IG po比我，係一個可愛貓貓集嚟

岑諾新：治癒（貓貓）

「可可愛愛就係貓！」我回覆一句後又打開新嘅話題，「啱啱食完飯～你食咗飯未？」

岑諾新： 就嚟食飯





「要去食飯嘅話，記得話比我知」

岑諾新：好，陣間同你講

岑諾新：你做好功課啦？

「做好啦，一早就做好啦～」

「今日派嘅中文統測你幾分」

岑諾新：81

「咁高分嘅你！？份卷90滿分





岑諾新：考指定篇章，有溫書就唔難

「我先考得72⋯」

岑諾新：都幾好

岑諾新：我食飯啦，食完飯再番嚟

我回覆咗一句「Okay」然後放低手機等佢，佢話佢食完飯之後再番嚟，希望佢快啲番嚟搵我啦～

我拎住手機同岑諾新傾咗成晚計，最近都係咁樣，講下啲日常嘢，聽日又可以見到面實在太好啦⋯！




IG Link: https://www.instagram.com/nd_cotttoncandy/?hl=zh-tw