［愛情純愛］既然忘記唔到佢，不如試下中意我⋯？: 72. 貓貓cafe

星期日，13:00

「喂喂！」我跑到去岑諾新嘅面前，佢比我仲早就到咗地鐵站，「你咁早嘅？」

「唔係。」岑諾新望一望手機，「都係到咗一陣。」

岑諾新今日著住一件藍色嘅Hoodies，孭住同上次一樣嘅斜孭袋

「做咩偷笑？」岑諾新發現咗我打量完佢之後偷偷地揚起嘴角





「冇呀～覺得你著便服好睇咋嘛～」我微微一笑講道，然後牽起佢嘅手，「你覺得我咁著好唔好睇呀？」

我今日著咗件白裇衫，外面加一件奶茶色背心針織衫，下身係黑色牛仔褲再加對低踭短靴

「好睇。」岑諾新臉上掛上淡淡嘅笑容，然後微微點頭，「想去邊？」

「唔⋯冇特別想去嘅地方⋯」我提議道，其實我都冇特別想去邊

「咁我決定？」岑諾新問我，「咁去咗食嘢先好唔好？」





「好呀～」我點點頭，原來岑諾新已經有想去嘅地方

咁我乖乖跟住佢就係啦～我地去到油麻地站落車，然後我一直跟住佢行，因為我都唔知要去邊

「唔知佢要帶我去食咩呢⋯」我嘅內心滿滿嘅疑惑

我一直留意住四周，估緊佢要帶我去邊度食嘢

我地行入一幢大廈，上到其中一層嘅時候行出升降機





「我地就食呢間。」岑諾新指一指喺右手邊嘅店鋪，回頭望一望我

我一臉訝異咁望住佢，嘴角都忍唔住上揚起嚟啦！心臟都跳過不停，對佢嘅好感度又上升咗一大截

店員推開門帶我地入去，一打開門就見到入面有好多貓貓，店員將我地帶到去一張二人枱坐低

店員提醒咗兩句之後就放低餐牌行開咗，喺我地坐緊嘅嗰張枱度有隻黑貓瞓咗喺度

「你點解會識嚟呢間？呢間貓貓cafe要book位㗎喎！」我按奈不住我嘅好奇心問道

我瞄咗瞓喺我眼前嘅貓貓一眼，不禁伸手輕輕地摸佢

「星期五搭車番去嘅時候見到你save低咗個po，面上都刻住『想去』兩個字。」岑諾新望一望我講道

我只係一個小小嘅舉動，岑諾新咁樣都留意到，心裏有種甜甜嘅感覺





「咁你都睇到呀～」我心裏甜甜的，笑着對佢講道

「如果你本來係打算同余詠妍佢地一齊嚟嘅話真係抱歉。」岑諾新嘅語氣完全唔似係覺得抱歉

「唔緊要呀！」我搖搖頭，「快啲睇下食咩～」

我同佢食嘢嘅時候，啲貓貓喺我地隔離行嚟行去，什至跳到大腿上，不過係跳到岑諾新嘅大腿上

我拎起手機幫佢同貓貓影咗張相，岑諾新嘅手輕輕地摸咗貓貓嘅頭兩下，佢嘅眼神好溫柔

「你都想摸頭？」岑諾新抬眼望咗我兩臉之後講道，「見你好羨慕咁。」

「我、我邊有！而且我做咩要羨慕啲貓⋯」我輕輕抿唇講道





「你想唔想餵貓？」岑諾新喺我地食完嘢嘅時候問我

「想呀！但可以咩？」我頓時雙眼放光

岑諾新買咗罐零食罐，店員將罐罐同一隻匙羹一齊遞比我

罐罐先啱啱拎到手，貓貓們嘅美食雷達頓時響起，匆匆忙忙咁跑到過嚟我身旁等食

「等、等陣⋯！」我見到貓貓們都圍住我時有啲慌張

店員幫我地將食完跑碟先收走，有兩、三隻貓貓即刻就跳咗上嚟枱面，其中一隻伸用肉球拍咗我一下，示意快啲比佢食

「你餵唔餵呀？」我餵咗貓貓們食咗半罐後望向岑諾新問道

我一望過去先發現岑諾新手上拎住手機對住我，見我望過去嘅時候將手機放低咗少少





「你餵啦。」岑諾新對我講道

一隻灰白色嘅貓貓似乎已經等唔切，直接雙腳企起咗起身，雙手扶喺我櫈邊

「慢慢食～」我餵完左邊就餵右邊，要確保每一隻貓貓都可以食到罐罐

雖然有啲貓比較猖狂，直接用肉球拍我隻手要求餵食，不過我都係會盡量等每一隻都食到，但貓貓真係太多啦！比貓圍住嘅感覺好幸福～

我偷偷地瞄咗岑諾新一眼，佢一隻手拎住手機對住我，另一隻手摸緊坐咗喺佢面前嘅白雪雪嘅貓

我地坐到完晒成個用餐時間先走，我地臨走嘅時候企喺門前用除塵轆痴一痴身上嘅貓毛，岑諾新行喺我前面推開厚重嘅大門

「食飽？」岑諾新牽起我嘅手，拉住我行出cafe





「飽！」我點點頭，「餵到貓貓好滿足～」

「開心？」岑諾新又問道

「開心！」我又點點頭，用笑容表達比佢知我好開心，「如果唔係你話你睇到，我都要懷疑你係唔係識魔法之類啦～」

「可能我真係識魔法呢。」岑諾新溫柔地放到我後腦勺摸咗兩下

佢望向我時臉上掛住淡淡嘅笑容，我感覺有股電流喺我身體流動⋯




IG Link: https://www.instagram.com/nd_cotttoncandy/?hl=zh-tw