［愛情純愛］既然忘記唔到佢，不如試下中意我⋯？: 62. 改變的心

岑諾新嘅嘴角微微上揚，然後搖搖頭

「放心啦，我習慣咗你嘅冷淡㗎啦～」我輕輕地拍咗佢嘅膊頭兩下，「你就係你嘛～岑諾新就係岑諾新呀～」

岑諾新聽到我嘅說話後點點頭，我睇唔穿佢嘅微笑，但我對佢嘅冷淡一啲都唔抗拒，對佢淡淡嘅微笑亦覺得不錯

「對唔住，今日提起佢啦⋯」岑諾新將我輕輕地拉入佢嘅懷中同時講道

「唔緊要，係我問起先。」我輕輕地捉住佢嘅衫角搖搖頭，「而且你本來中意嘅人就係佢呀～」





我知道，我明白，孫慧伶係佢中意嘅人，但我相信佢會努力中意我就足夠

「在意就講，嬲就講，對自己好啲，唔好收喺心。」岑諾新柔聲對我講道，「我就喺度。」

「你先係唔好收喺心⋯ 你都要同我講先得⋯」我稍微抬起頭望佢，「我都喺度呀～」

今日我地比平時攬得耐咗好多，我嘅心因為佢講嘅說話而心跳加速

唔知道佢喺面對我時、同我一齊時係唔係都會咁樣心跳加速⋯？





我感覺到自己嘅臉頰開始發現，頓時將頭埋到岑諾新嘅頸窩中蹭咗兩下

「你啲頭髮⋯」岑諾新嘅手放喺我嘅後腦勺上，輕輕地地將我㩒住，「好痕⋯」

岑諾新嘅手沿住我嘅腦後勺摸到落我嘅髮尾

「頭髮，好長⋯」岑諾新講道

「嗯？」我伸手摸一摸自己嘅馬尾，「長頭髮幾好呀～」





「嗯。」岑諾新細聲地嗯咗一聲，「你唔好再蹭⋯」

我不禁一笑，抬頭望向佢

「今日好似見咗好耐咁⋯」我嘅頭埋喺佢嘅頸窩中細聲地講道

「聽日會再見。」岑諾新對我講道

「我番去啦，7點幾啦⋯」我先鬆開手，向後行咗兩步，「聽朝見。」

番到屋企，就覺得屋企特別安靜，成個環境都係，心裏⋯不禁覺得有啲寂寞⋯

今日又到咗完結嘅時候，要去到聽朝早先可以再見，開心嘅時間過得特別快，而且特別虛幻

喺開心過後，覺得特別寂寞⋯





「快啲到聽日就好啦⋯」我喺心中講道

X⋯X⋯X

喺同蔣倩盈分開，送咗佢番去之後，我一個行番屋企

忽然間覺得喺我嘅左邊冇咗個人，我嘅左手冇拖住任何人嘅手，感覺有啲奇怪

周圍好似比起啱啱更加安靜，明明好多人喺街上行，但我感覺周圍出奇地安靜

「今日同佢一齊太耐⋯」我喺心裏明明地講道

拖住佢嘅手太耐，搞到宜家會覺得唔自在





我喺佢嘅面前提起孫慧伶，佢完全唔在意一樣，但我想佢在意⋯

佢在意嘅話先係一件好事⋯對我同佢嚟講都係

不過，蔣倩盈係一個喺某程度上識得收起自己心情嘅人嚟，佢就算真係唔開心真係在意都好，都只會講一句「唔緊要」

最近同蔣倩盈成日都一齊，佢最近亦笑多咗，感覺佢成個人都開心咗

同佢相處得愈多，就愈發現佢同孫慧伶嘅唔一樣：孫慧伶係個總係覺得我做得唔夠好嘅人，蔣倩盈則係個好易氹、容易滿足嘅人

只係用博一下嘅心態買張戲飛比個小驚喜佢，佢就已經開心一整日

如果係孫慧伶嘅話，佢大概仲會問我點解唔見到佢嘅story之後即刻去買之類

今日仲喺學校上堂嘅時候，我悄悄地望向蔣倩盈，明明佢臉上冇掛上笑容，但我卻覺得佢嘅嘴角微微上揚





今日嘅蔣倩盈嘅笑容都特別燦爛，雖然佢冇講，但我卻可以感受到佢嘅興奮，唔知道佢係因為睇到想睇嘅戲定因為我嘅驚喜

「但佢開心就好⋯」我喺心中講道

我開始希望見到佢開心，想見到佢嘅笑容

想佢同我一齊嘅時候都係開心，想佢知道我比張景彥好

想佢⋯中意我多啲⋯

我咁樣，會唔會太急進⋯？

X⋯X⋯X





我將今日嘅戲飛同單放喺之前嗰個盒中，冇錯，就係之前放同張景彥一齊出去時拎到嘅單嘅嗰個盒

不過由今日開始，呢個盒係放關於岑諾新嘅嘢㗎啦～同張景彥冇關係啦已經

「仲係好開心⋯！」我拎起放咗入盒中嘅戲飛

雖然番到嚟得番自己一個，感覺真係有啲寂寞，但係嗰份開心仍然喺我心中揮之不去

我好似已經好耐冇咁開心，上一次咁開心，可以開心成日係幾時？




IG Link: https://www.instagram.com/nd_cotttoncandy/?hl=zh-tw