［愛情純愛］既然忘記唔到佢，不如試下中意我⋯？: 58. 細心

「哦～睇唔出佢咁花心思為博紅顏一笑喎～」希童笑笑口講道

「講緊咩呀～」我無奈地笑道，但卻感覺到臉頰有啲熱，「不過的確幾開心～」

詠妍望住我，擺出一副睇穿一切嘅模樣對我笑咗一笑

食完飯番到學校之後，我同詠妍喺番課室前去咗洗手間

「睇嚟進展幾好，我倍感安慰。」詠妍一臉恩慰咁講道





「睇個戲啫，洗唔洗講到咁⋯？」我不禁無奈一笑

「你地嘅進度咁好係好事嚟！」詠妍認真地講道，「睇唔出佢咁花心思就真⋯」

「我都估唔到，因為見佢冇問我所以我本來打算直接喺今日約佢，點知佢話我知佢買咗飛。」我諗起今日喺車上面嘅情景，當下嗰種驚訝嘅感覺仍然喺我心底蕩漾着，「不過我的確覺得好開心，以前都冇試過會咁，佢同張景彥真係唔一樣⋯」

「我都話咗㗎啦～」詠妍自豪地對我講道，「佢真係好努力咁令你中意佢一樣。」

「呢層我唔知道⋯」我微微耷低頭，水流過我嘅手，「不過，我都開始想真係去中意佢⋯！」





詠妍有啲愕然咁望住我，然後微微一笑

「好呀～我支持你㗎～」詠妍拍一拍我嘅膊頭，「你終於都知道啦～」

「相處起嚟就感覺到好多唔同嘅事⋯」我甩一甩手上嘅水珠，「新鮮嘅感覺⋯」

「咁咪好。」詠妍用三個代替佢嘅心聲

⋯





喺放學前5分鐘，我一直望住掛喺黑板旁邊嘅時鐘，喺心裏倒數着放學嘅來臨

「叮噹叮噹⋯叮噹叮噹～」

放學啦放學啦！放學之後去睇戲！睇我一直想睇嘅嗰套戲！

喺老師一敬完禮落堂嘅瞬間，我頓時執好晒所有嘢，飛快地去開locker

我閂上locker嘅門然後企起身，一轉身就見到岑諾新拎住書本過嚟開locker；我望住岑諾新笑咗一笑，岑諾新望住我，嘴角微微上揚

我番埋位孭書包，岑諾新好似察覺到我嘅著急同興奮一樣，番埋位時加快咗步伐

我帶着小急步行到佢嘅座位，佢孭起書包，佢微微抬一抬下巴、側一側頭，示意宜家就走

岑諾新將櫈拍好就行，我跟喺佢嘅身後同佢一齊走，我同佢嘅步伐都不禁變得比平日快，好似佢都變得有啲期待一樣





今日好lucky地一去到巴士站就有車，我地同平時一樣行到上層，行到差唔多位置嘅後排坐低，就好似平時一樣

「你睇起嚟好開心。」岑諾新望咗我一眼後講道

「開心呀！」我笑着點點頭，「之前套戲未上前睇過預告，嗰陣已經好想睇，宜家終於睇當然開心！」

佢望住我興奮嘅模樣笑咗一笑，然後攬住書包聽歌

我地去到戲院時都未夠鐘，先4點30分

「你洗唔洗買嘢飲？」岑諾新問我，「定你要食爆谷？仲有時間。」

「唔⋯買嘢飲得啦⋯」我望一望佢，「你洗唔洗食嘢飲嘢？」





「買嘢飲就得。」岑諾新拉起我行到去小賣部，「你飲咩？睇唔啱嘅話去7仔買。」

「去7仔。」我拉住岑諾新行出戲院範圍，行去最近戲院嘅7仔

我直入行到去放嘢飲嘅大雪櫃前，沉思緊飲咩好，我一眼就望到放咗我視平線上嘅樽裝紅茶，我從雪櫃中抽咗一枝

「你飲咩呀？」我向後行咗一小步打算將雪櫃門閂上，因為啱啱佢好似喺另一個雪櫃前，「咦⋯？」

我望向右邊嘅雪櫃，但卻見唔到岑諾新個人，人呢⋯？

「呀⋯」我向後行咗一步，直接撞上唔知幾時企咗喺我身後嘅岑諾新

我回頭一望，岑諾新若無其事地伸手拎放喺雪櫃中嘅嘢飲，佢微微耷低頭望咗我一眼

「嘢飲我比啦～戲飛你比咗。」我伸手拎過佢拎住嘅嘢飲講道，然後行去比錢





岑諾新望住我嘅表情好似有啲愕然，但佢好快又收起咗愕然嘅表情，默默地行到我嘅身旁

「嗱。」我比完錢後將嘢飲遞比佢，「你嘅。」

等到可以入場嘅時候，我同佢就行入場先坐低

「哦～你揀咗中間呀～」我坐企喺位，呢個位剛好對正大螢幕嘅中間，位置啱啱好

今日係平日，再加上先4點幾，場內幾乎冇人，好似包咗場睇戲咁

岑諾新一坐低，自然地將嘢飲嘅樽蓋扭開然後放咗喺佢自己嘅右手邊，正當我伸手想拎起我嘅嘢飲開蓋時，岑諾新比我快一步拎起枝嘢飲，幫我將樽蓋扭開

「凍唔凍？」岑諾新將我枝嘢飲放喺我同佢中間嘅飲品位中





「唔凍。」我搖搖頭，畢竟仲著住長袖衫，所以還好，唔係真係好凍

「陣間凍嘅話同我講。」岑諾新對我講道




IG Link: https://www.instagram.com/nd_cotttoncandy/?hl=zh-tw