［愛情純愛］既然忘記唔到佢，不如試下中意我⋯？: 42. 一杯奶茶

「做咩又抄我講嘢啫！」我不禁笑起嚟講道

「有咩？」岑諾新扮唔知，輕輕一笑講道，「冇呀～」

⋯

「唔該。」我拎起放喺取單處嘅珍珠奶茶，插入飲管即刻飲咗一大啖

嘻嘻⋯我同岑諾新番到嚟呢邊之後，我拉住佢去咗買珍珠奶茶





「好耐都冇飲啦～」我滿足地講道，奶茶嘅香甜停留啖我嘅口腔中

岑諾新啱啱企喺鋪頭外面等我，佢話佢唔中意飲咁甜嘅嘢喎，所以得我一個飲～唉～真係唔識得欣賞奶茶～

「好飲好飲～」我雙手拎住膠杯，又飲咗一大啖，今次咬到煙韌嘅黑珍珠，「你試唔試一啖呀？真係好好飲！」

我將珍珠奶茶遞到岑諾新嘅嘴前，一隻手拎住杯，另一隻手扶住飲管

「真係好好飲，試下？」我微微側一側頭，佢望住我，好似猶疑緊飲唔飲，「一啖？」





我知佢應該唔想飲咁甜嘅嘢，不過好嘢要分享嘛～

點解突然間好似唔係要佢試下中意我，係我要令佢中意我咁嘅⋯？咦咦咦？

岑諾新望住我遞到佢面前嘅奶茶，又望一望我，我一臉期待地望住佢，無可奈何地耷低頭，飲咗一啖奶茶

「係唔係好好飲呢～」我笑着講道，岑諾新目無表地望住我，眉頭輕輕一皺

「好甜⋯好膩⋯」岑諾新吞咗啖奶茶之後緩緩開口講道





「你咁中意食蛋糕，蛋糕仲甜啦！」我反駁道，「唔好飲咩？」

「唔係唔好飲，只係太甜。」岑諾新解釋道，「好膩⋯」

「好囉～」我默默地又飲咗一啖，果然奶茶好香，「哼～都係我識欣賞奶茶～好香奶茶味，香香甜甜，唔好咩？」

「太甜，飲完一大杯之後夜晚都唔洗食飯。」岑諾新無奈地望住興致勃勃嘅我

我騰出右手拖住岑諾新嘅手，我咬住飲管飲奶茶嘅同時抬頭望向岑諾新，佢好似察覺到我望佢一樣，視線落喺我身上

佢輕輕一笑，好似平時一樣，笑緊啲咩？笑緊我中意飲奶茶⋯？

嘻⋯唔知道～我只係同佢分享一下我中意嘅嘢，話比佢知我中意啲咩而已

想中意佢嘅同時令佢中意我，就要同佢分享我嘅喜好呀～要抱住「想同佢分享」嘅心話比佢知，令佢對我嘅事感興趣





「番到啦我～」我望向佢笑一笑，微微側一側頭，「要聽日先見啦～」

「你有咁想見我咩？」岑諾新聽到我咁講後不禁失笑，「講到好似好期待咁呀。」

「要抱住想見嘅心呀～」我笑了笑講道，「咁樣唔係對『要試下中意對方』嘅我地更好咩？」

「唔知，係掛。」岑諾新聳肩，「試咋嘛，又冇話一定可以。」

「哦好囉⋯咁我都係唔留意你啦。」我扁着嘴講道，「反正都係試下咋嘛。」

「唔得，唔公平。」岑諾新微微一笑，拎起手機睇一睇時間，「聽日見啦，我番去啦。」

「嗯，拜拜～聽日見啦。」我對佢揮一揮手，然後轉身行向大堂





如果每一日都做一啲可以拉近關係嘅事，咁係唔係可以令佢中意我？

又或者，我每日都留意佢多啲，係唔係就可以唔再留意張景彥，可以放低？

我一換完衫，即刻就灘落床，打算灘一陣先再溫書同做功課；我灘喺床度睇手機，本來已經唔知可以睇咩好嘅我㩒開咗WhatsApp

「我係唔係應該主動咁搵下佢⋯？」我望住手機螢幕自言自語地講道，「點樣先會中意一個人⋯？」

宜家我對岑諾新嘅感覺係⋯「想中意嘅人」之類？我要做啲咩先可以令自己中意佢⋯？

我㩒入去同詠妍嘅對話框，打算問下佢我應該點做

「我應該係要令佢中意我，而唔係我去中意佢？（疑惑）」

我可以點樣中意佢？話比自己知佢好好？日日都同自己講一次好似要洗自己腦咁樣？單靠留意佢好難會覺得中意，特別係我同佢處於呢個特別嘅狀況⋯





「咚咚—」

詠妍：你都要想中意佢先有用，但實際上要點樣，我都唔知

詠妍：多啲同佢一齊？

「問題係我唔知我可以點做（疑惑）我地個關係又有啲特別」

詠妍：你唔好當佢係你男朋友，當佢係普通人

「好麻煩呀真係，我都唔知我可以點樣中意佢呀⋯」

「我地本來就一齊緊，突然間好疏遠好尷尬嘅話會好奇怪⋯」





詠妍：同佢做啲情侶會做嘅嘢囉～會唔會簡單啲？

「完全冇變簡單呀⋯」我望住手機自言自語起嚟，「點樣叫情侶會做嘅嘢⋯？我地又唔係真係情侶呀⋯」

講真嗰句，話就話叫錫過，但真係錫過兩次咁大把⋯我地做最close嘅事，應該都係攬⋯

「點先叫做情侶做嘅事⋯？」我坐起身盤着腿坐喺床上面，「我同阿彥一齊嘅時候都冇做啲咩好couple嘅事呢⋯？」




IG Link: https://www.instagram.com/nd_cotttoncandy/?hl=zh-tw