［愛情純愛］既然忘記唔到佢，不如試下中意我⋯？: 39. 你有心動嗎？

「唔好望啦⋯」岑諾新對我講道，然後回頭望向孫慧伶

孫慧伶掛住睇手機，都冇留意到前面有塊磚突起咗，就喺岑諾新望向孫慧伶嘅時候，孫慧伶比嗰塊磚絆倒，成個人向前跌

「⋯！」我嘅手比岑諾新突然用力地握住，我望向佢，佢嘅眉頭輕輕一皺

我望向孫慧伶，孫慧伶似乎冇跌親，只係絆咗一下，但都企得穩；我偷偷地瞄向岑諾新，佢好似好擔心一樣，但佢咩都冇講，默默地撇開臉拉住我行

「你望住我做咩？」岑諾新留意到我望住佢





「冇呀～」我笑着搖頭，「在意嘅話可以關心呀～」

「唔要，我同佢又冇關係。」岑諾新講道

「哦～」我點點頭，「好囉～」

「想講咩？」岑諾新用力地握咗我隻手一下

「冇呀冇呀～」我笑道，「真係冇～我冇想講話你仲中意佢之類嘅說話呀～」





岑諾新一臉無言咁望住我，我故意咁樣講想逗佢一下

「你講咗啦蔣倩盈。」岑諾新直呼我全名，「你叫我中意你，但又要提住佢，點呀？」

「你要受得起挑戰㗎嘛！」我理直氣壯地講道，鬆開咗佢隻手

「咁到底我要留意你定留意佢？」岑諾新又問道

「順其自然就得啦嘛～」我輕輕地拍咗岑諾新兩下，「不過我都會留意你多啲。」





「哦係咩？」岑諾新挑起眉望住我，先望咗我兩秒，佢嘅視線就落喺我身後，細細地對我講道，「張景彥行緊過嚟⋯」

我下意識就朝岑諾新望緊嘅方向望去

咩呀⋯張景彥都唔喺度，挽我呀？等陣先⋯

我嘅視線頓時落番喺岑諾新嘅身上，佢完全就係特登挽我⋯！

「又話會留意我多啲嘅？」岑諾新對我倜侃道，「一講張景彥就即刻望過去。」

「習慣嘅嘢一時間邊度改得切啫～」我聳肩講道，「你啱啱咪又係咁～」

你個岑諾新，有口話人冇口話自己

明明自己都係著緊孫慧伶多啲仲好意思話我，佢咪又係在意孫慧伶多啲～我都只係慣性回頭啫～





佢中意孫慧伶我知，我亦冇在意啲咩，我早就知啦～我同佢一齊又唔係因為我中意佢

只係，同病相憐罷了，我做唔起渣女

我會唔會喺某一日真係中意岑諾新，我唔知，唔敢講，又唔係我話可以就可以嘅事嚟

順其自然就最好啦，應該

⋯

「所以？你有冇少少心動之類？」詠妍緊張地問我

「冇⋯」我平靜地回答佢，「你估去街市買餸咩宜家？話心動就心動㗎啦咩？都要時間㗎～」





我見詠妍好緊張，但我都冇辦法呀

如果中意一個人係咁簡單，想放低一個人嘅時間好快就可以中意另一個人嘅話，我洗唔洗好似宜家咁？

「我就算同佢拖住手，我都冇心動。」我托住下巴，手指輕輕地敲打着枱面，「詠妍呀，我中意嘅人係張景彥嘛～」

岑諾新唔係唔好，只係佢唔係張景彥

我話試下中意岑諾新，「試下」，唔係「我一定可以中意岑諾新」

「試下」同「一定」，差好遠

張景彥喺課室外面經過，我眼尾嘅餘光可以望到，我仍然會不自禁地就向外望，目光不受控制咁落喺佢身上

「噗通—噗通—噗通」





仍然會因為佢而心動，我又可以點樣放低

我冇話唔放，只係唔可以即刻

一係時間，一係新歡，我揀咗新歡呀最後，但都需要時間⋯

「你就唔可以望多啲岑諾新咩？」詠妍同我一樣望住喺外面經過嘅張景彥，「張景彥佢過咗去㗎啦⋯」

「唉，你明唔明呀詠妍⋯？」我沒好氣地開口，收回視線望向詠妍，「唔係我唔做，而係唔可以即刻⋯」

詠妍為我好，我知；我仍然中意張景彥，我都知；岑諾新仲中意孫慧伶，我都知

「唉⋯我同岑諾新係講咗試下，但唔係講試下中意就中意到㗎嘛！」我細細聲地解釋比詠妍知，「即係，我仲中意張景彥就好似佢仲中意孫慧伶一樣，佢唔可能即刻就中意我，我亦唔可能即刻就中意佢，而且，我地都未放低⋯」





新歡，只係一個方法，但唔係一定得㗎嘛～

唉⋯我一開始真係唔應該聽詠妍講，真係比條屎橋我，搞到我宜家兩頭唔到岸咁樣⋯

「我都唔知我可以點中意佢⋯」我默默地講道，對詠妍講出我心中嘅想法，「唔係佢唔好，只係我唔知可以點啫⋯」




IG Link: https://www.instagram.com/nd_cotttoncandy/?hl=zh-tw