［愛情純愛］既然忘記唔到佢，不如試下中意我⋯？: 36. 所以你覺得⋯？

「做咩⋯？」我抬頭望向岑諾新，心中都係有種尷尬

「晏就一齊食飯？」岑諾新淡淡地問道

今日嘅佢對我都特別唔一樣，平日佢喺學校都會對我笑，但今日佢真係笑都唔笑，睇嚟我琴日咁同佢講真係太過唐突

岑諾新望向詠妍，就好似問詠妍拎permission一樣

「可、可以呀～」詠妍頓時講道，然後推咗我一下，「比你比你～」





我啱啱微微掂起腳尖然後比詠妍出力推咗一下，我成個人向岑諾新跌，岑諾新下意識就伸手捉住我嘅前臂扶住我，我成個人都好似要貼上岑諾新身上一樣

岑諾新微微耷低頭望住我，我亦抬起頭望一望岑諾新

我頓時移開視線望向詠妍，係唔係嫌我唔夠尷尬呀！？

「嘻⋯」詠妍調皮地對我吐舌一笑，然後起身朝課室門口走去離開現場

詠妍佢，絕對係特登⋯！





「點？」岑諾新問我

「吓？哦⋯好呀⋯」我點點頭

⋯

Lunchtime

「佢一直都唔講嘢係想點呀⋯」我有啲唔自在咁拎起汽水杯，有啲緊張咁咬着飲管，「我好唔好開口叫佢唔好在意，定當咩都冇發生過一樣同佢講嘢？」





好煩惱呀！

「你嗰日講嘅嘢係真係認真㗎？」岑諾新開口問道，佢突如其來嘅提問嚇咗我一跳

「嗯。」我點點頭，「係認真嘅提議嚟，就算唔想都冇所謂～」

「嗯。」岑諾新嗯咗一聲，然後又冇再講其他嘢

點呀到底⋯咩意思⋯？唔想嘅話其實真係可以直接講，我真係唔介意，真係唔會傷心之類

我地都各自耷低頭食嘢，我一手拎住手機，一手拎薯條，我都唔想抬起頭望岑諾新，陣間又覺得尷尬就唔好啦⋯

「喂。」岑諾新忽然輕輕踢咗我一腳，我抬起頭望佢，見到佢托住下巴望住我，「我唔可以確保，我一定可以中意你。」

「我都唔可以呀。」我微微一笑，「所以話只係試下。」





「嗯⋯」岑諾新若有所思地嗯咗一聲，然後又冇再講更多嘢

我望住岑諾新，我都睇唔出佢到底係肯定唔肯，畢竟佢冇比一個實際嘅答案，所以我都唔可以肯定佢想點樣

岑諾新嘅左手拎住手機，佢嘅視線一直都停留喺手機上

食完嘢之後，我同佢一齊離開快餐店番學校，點解今日好似好漫長咁嘅？

岑諾新行喺我前面推門，我跟喺佢身後出去，我悄悄地偷望咗佢一眼，只見佢收起咗手機，但今日嘅佢令我覺得佢真係格外冷淡

明明都係同平時一樣目無表情呀～點解我會覺得唔一樣？我錯覺？

「唉⋯真係難觸摸呀⋯我係唔係真係可以中意到佢⋯」我喺心中默默地講道，「咦⋯？」





岑諾新拖起我嘅手拉住我行，我一時間跟唔上佢嘅步伐

我小跑兩步追上佢，行喺佢身旁同佢並肩而行

「呃⋯如果你唔想嘅話你講我知呀⋯宜家咁樣我有啲尷尬⋯」我敵不過內心嘅尷尬講道，「對唔住⋯搞到好似我講咗啲咩令你好難做咁⋯」

我鬆開咗手，默默地停咗落嚟，岑諾新繼續行，行咗兩步之後又停低落嚟

「唉⋯」岑諾新輕嘆一氣，然後回頭望向我朝我伸手，「唔係要試下中意對方咩？做咩鬆手？」

「你同意？我仲以為⋯」我對岑諾新講嘅嘢有啲訝異，「仲以為你會拒絕我。」

「你講得啱，一係時間一係新歡。」岑諾新淡定咁講

如果有人聽到我地咁講，會唔會誤會我地係渣男渣女⋯





「不過喺其他人眼中，我地早就係對方嘅新歡。」岑諾新一本正經地講道，「事先聲明，喺你提出之前，我冇非分之想。」

其實岑諾新講嘅都係事實，喺其他人眼中，由我同佢喺埋一齊嘅嗰一刻開始，我就係佢嘅新歡，而佢係我嘅新歡

係正常不過嘅事，我之所以會尷尬，大概係因為我同其他人睇我地嘅角度唔一樣

「都係呀～」我笑一笑講道，行上前拖住佢嘅手，「試下啦～唔得就算。」

「先啱啱開始，你確定要講啲咁嘅嘢⋯？」岑諾一臉嫌棄咁望住我

「講定先啫～到時做唔到都冇咁尷尬嘛～」我笑笑口講道

太好啦，嗰種尷尬嘅感覺都消失啦～





「我去小食部買枝水，你番上去先。」岑諾新同我企喺接待處，佢指一指小食部嗰邊

「我同你一齊去呀～」我跟上岑諾新嘅步伐同佢一齊去

剛踏入小食部嘅門口，我就見到詠妍企喺收銀，手上拎住支嘢飲轉身




IG Link: https://www.instagram.com/nd_cotttoncandy/?hl=zh-tw