［愛情純愛］既然忘記唔到佢，不如試下中意我⋯？: 34. 試探

就算見到佢私下嘅另一面，我都冇覺得特別討厭或者厭惡，所以岑諾新的確係一個唔錯嘅選擇，對我嚟講亦係唯一令我唔會有愧疚嘅選擇

「煩呀⋯」我將頭埋喺枕頭中，「我真係要同岑諾新講⋯？」

我同岑諾新講嘅話，佢會唔會即刻諗都唔諗就拒絕我⋯畢竟佢咁中意孫慧伶，佢又點會為咗放低孫慧伶而中意我⋯？

就算比佢拒絕咗呢個提議，應該都唔會太尷尬

「我又唔係因為中意咗佢而咁樣講，只係一個提議呀⋯」我喺只有自己嘅睡房內對自己解釋道





我都未同佢講，我已經諗緊比佢拒絕咗嘅話點算⋯不過真係只係一個提議啫，拒絕咗都冇咩大不了

「或者我真係應該試下中意岑諾新⋯？」我坐好喺床上喃喃自語地講道，但講完之後我自己都不禁笑咗出嚟，「哈⋯到底我喺度講緊啲咩⋯？」

最衰就係詠妍，日日都係咁同我講，日日都提住要我認真考慮，搞到我宜家又多一樣嘢煩

果然，戀愛事，真係好麻煩⋯

⋯





數天後放學時

「等我一陣，要去搵一搵Miss。」岑諾新手上拎住生物科嘅功課

「嗯，好呀。」我點一點頭

我望住岑諾新不急不忙地行出課室，我同平時等佢一樣坐喺自己位等

課室內嘅人一個一個咁走，孭起書包同朋友一齊走、去隔離班等埋朋友一齊走，而我又係獨自一個人留喺課室等岑諾新





我冇唔想等之類嘅想法，亦都已經習慣咗等埋佢一齊走，一個人喺課室等佢個半鐘都試過，因為佢要補課嘛～

其實我都唔知自己點解咁怕獨自一人見到張景彥⋯怕佢上前同我講嘢嘅時候，要用一個從容嘅表情面對佢？怕喺佢口中聽到佢提起孫慧伶嘅時候，臉上掛着嘅幸福表情？定係怕自己一個面對佢嘅時候，自己仍然心動但佢卻係已經唔在意？

每一次見到張景彥，我嘅心都會怦怦跳動⋯我怕佢同我搭話，怕會同佢嘅視線對上，怕自然又會拎起更多，怕自己唔捨得放低⋯

愛情就係咁樣嘅一回事⋯甜蜜過後就係無比難受，痛苦、在意嘅什至只有你一人罷了，殘酷嘅遊戲⋯

我喺課室中遊走，行咗幾個圈後又坐番去自己嘅座位

坐咗一陣之後又默默地企起身坐喺枱上，耷低頭望住自己嘅雙腳前後踢

喺枱上坐咗一陣之後，又跳咗落地，朝課室門口行去

「呀⋯佢幾時番嚟⋯」我行到去課室門口，探頭望出走廊





走廊一個人都冇，亦唔似上次一樣傳嚟隔離班房補課嘅聲音，整層樓都好安靜

我邁步從課室踏出走廊，企喺走廊嘅矮牆前面，雙手搭住喺欄杆上，此時微風吹過，我嘅髮絲被風吹郁，今日嘅風格外柔和

「喂。」

一把聲音從我左邊傳嚟，我望過去，見到岑諾新行緊過嚟

「得啦？」我企好起嚟

「嗯，晏咗少少，sorry。」岑諾新直接行入課室

「唔緊要。」我跟喺佢身後行入課室





喺課室我冇將我要問嘅嘢問出口，我同佢一齊離開學校，就好似平時一樣搭車番屋企，佢亦好似平時一樣，落車之後先送我番去

由巴士站行去我屋企，應該都要10分鐘左右，所以應該趕得切問；岑諾新邊行邊睇手機，但我都係打算問佢

「岑諾新。」我先叫佢一下

「嗯。」岑諾新淡淡地嗯咗一聲，就好似平時只有我地兩個人嘅時候一樣

「你覺得，我係個點嘅人？」我先咁樣問作為開場白，要確定佢冇討厭我之類

「吓？」岑諾新嘅視線從手機螢幕上移開落到我身上，「做咩突然間咁問？」

「你答我就得啦。」我瞄咗佢一眼

「唔⋯」岑諾新好似真係認真咁諗，「係個有啲易喊，但又會為人設想嘅人。」





為人設想嘅人⋯講到我好似好偉大咁⋯我先唔係啲咩偉大嘅人，我都係一個會有私心、自私一面嘅人

「而且，仲係一個會好好嘅傾訴對象。」岑諾新望住我，臉上掛上淡淡嘅笑容

「嗯⋯」我點點頭，心入面諗緊要點樣開口同佢講

「做咩突然間咁問？」岑諾新好奇地問道，「唔通今日受到啲咩衝擊？」

或者詠妍真係講得啱，可以忘記一個人嘅方法得兩種

「一係時間，一係新歡⋯」我淡淡地講道

「嗯？」岑諾新似乎聽唔到我啱啱細聲講啲咩，佢望住我好似示意我講多一次一樣





「你有幾想忘記佢⋯？」我問道，「忘記孫慧伶。」




IG Link: https://www.instagram.com/nd_cotttoncandy/?hl=zh-tw