［愛情純愛］既然忘記唔到佢，不如試下中意我⋯？: 28. 創舉

「阿sir，跟住你又可以喺同隔離班老師開會嘅時候炫耀比佢地睇？」有個男同學大叫問道，引起班上嘅大家笑出嚟

「當然唔會啦！」阿sir頓時搖搖頭，「我點會咁衰呢？」

阿sir講係咁講，四班入面得我地班可以keep住合格率喺8成以上，阿sir不知幾開心，老師之間嘅鬥爭就係喺任教嘅一班度體現出嚟

「中五啦，生性啦你班人。」阿sir沒好氣地講道，「阿sir都明白，後生一定會想去挽，但挽還挽，拍拖還拍拖呀，都要努力讀書。」

阿sir語重心長地講道，阿sir一個40幾歲嘅人，其實都算好挽得㗎啦，雖然偶爾都會好囉嗦，不過都算係咁啦





「阿sir放心啦，我地班入面拍拖嘅人成績都幾好。」又有人加把口講道

我默默地耷低頭，我地班有3對情侶，都係班上嘅人，我唔想喺呢個時候成為話題⋯

「要keep到去下年中六呀！我指成績，要好好考埋個DSE。」阿sir又講道，「有拍拖嗰啲呀，唔好掛住拍拖呀！」

我又點會掛住拍拖唔讀書呀～我都唔係啲咁嘅人～

「岑諾新嗰啲呀！唔好拍拖拍到唔溫書！」阿sir特別點名叫岑諾新





但岑諾新嘅成績都喺中上，都唔算差呀～而我⋯我都係中游呀～咁我諗阿sir只係隨便咁叫一個拍緊拖嘅人

用左手托住頭嘅我朝岑諾新望咗一眼，岑諾新耷低頭，似乎佢想扮咩都冇聽到就算

我兩對視咗一眼，不禁無奈地笑咗一笑

「叮噹叮噹⋯叮噹叮噹～」

終於落堂啦～終於到小息，可以休息下啦～





一敬完禮，我即刻就坐低伏喺枱上瞓覺補眠，小息有15分鐘，恰一恰都好⋯

課室好嘈，傾計聲、郁枱櫈嘅聲都直接傳入我嘅雙耳中，我完全冇可能瞓到呀⋯

「嘖⋯」我喺心裏不耐煩地嘖咗一聲

有人整到我嘅頭髮，我頓時抬起頭，一臉不爽地抬頭

「冇心⋯」岑諾新手上拎住三本默書簿

呀⋯今朝早我收英文默書改正嘅時候，岑諾新話佢未改好小息先交；然後仲有兩個人都話未改完

「嗯⋯」我接過佢本默書簿，跟番學號順序放番入疊簿中，喺點名字上剔番佢個名同另外兩個男仔嘅名

我企起身拎埋疊簿，疊簿齊晒30本啦，所以可以交落去簿櫃啦～雖然我仲係有啲攰，但簿都係要交嘅





「去邊？」岑諾新一臉疑惑地問道

「交簿。」我帶着疲倦嘅聲線回答道，然後直接行出課室

落樓梯嘅時候我望一望放喺簿面嘅點名紙，諗起上一次嘅狼狽，我一隻手攬住疊簿，然後將張點名紙抽咗出嚟拎喺手上

「咁樣就唔會吹走啦～」我自己都覺得自己有啲醒

我落到平台位，就見到一個人迎面而嚟行上嚟，我同佢嘅視線剛好對佢，佢尷尬一笑，我微微一笑然後直接從佢嘅身邊經過

「啱啱我⋯」我喺走過咗之後先遲嚟嘅愕然

啱啱係我第一次喺見到佢嘅時候，唔係逃避而係同佢對視，然後微微一笑





我回頭望上去，張景彥早就行咗上去，我回頭時都已經見唔到佢嘅身影

「我係唔係離放低佢又近咗一步啦⋯？」我嘅內心有啲激動，畢竟係第一次唔會逃避

我帶着有少許激動再加上少許疲倦嘅心情番到課室，一踏入課室，我第一時間行番埋位坐低，然後伏番喺枱上恰一恰

我側着頭望向岑諾新，佢同楊朗然興高采烈地傾緊計

「好想話佢知我又做到一項創舉⋯！」我心裏有啲掙扎

Send message話佢知冇親口講咁好，佢體會唔到我嘅興奮

「咦⋯」岑諾新同我嘅視線對上，不過就好似平時一樣，佢應該係因為又同楊朗然唔知講緊啲咩而笑

「我想話我又做咗個創舉」我最終都係send咗個message比佢，因為佢正拎住手機





我將message send咗出去之後望向岑諾新，佢望一望手機然後望向我

岑諾新拎起手機回覆，我嘅手機上都顯示佢輸入中

岑諾新：咩創舉

我打咗幾個字之後覺得打字有啲麻煩，然後就自然咁拎起手機打算錄音比岑諾新話比佢知

岑諾新：你做咩要錄音比我，我地喺同一個課室⋯

「呃⋯打字麻煩」

我望向岑諾新尷尬地笑咗一笑，我係確保咗冇人聽到我講嘢同埋，我係哄到好埋個咪先細聲講





「你過嚟我講（笑喊）」




IG Link: https://www.instagram.com/nd_cotttoncandy/?hl=zh-tw