［愛情純愛］既然忘記唔到佢，不如試下中意我⋯？: 18. 審查我嗎？

「當然啦～」我微微一笑講道，我冇理由答佢唔中意㗎嘛，我答咗係佢哥哥嘅女朋友，但係唔中意佢哥哥嘅話咁咪好矛盾

「姐姐你會唔會嫌棄我哥哥咁木頭？」佢追問道

佢係審查緊我⋯？睇下我配唔配得上岑諾新定睇緊我適唔適合同岑諾新一齊⋯？

「呃⋯唔會呀。」我搖搖頭，佢嘅意思應該係岑諾新成日都目無表情

嵐嵐定睛望住我兩秒後，直接行到去廁所門口開門行出去，睇嚟嵐嵐佢係兄控⋯





「行啦。」岑諾新見我地行出嚟便講道，嵐嵐捉住岑諾新嘅手晃咗兩下

「哥哥！」嵐嵐抬頭望住岑諾新，岑諾新聽到嵐嵐叫佢便耷低頭望佢，「呢個姐姐真係你女朋友？」

「你講咩？」岑諾新一臉無言地望住嵐嵐

我無奈地望住岑諾新笑咗一笑，我都唔知可以講咩

「哥哥你真係中意呢個姐姐？」嵐嵐一臉天真地問道





「講緊啲咩喺度？」岑諾新一臉疑惑

「佢好執着於我地嘅關係⋯」我細細聲地對岑諾新講道

「哥哥，嵐嵐要知道⋯！」嵐嵐鼓起兩泡腮講道

「唉⋯」岑諾新默默地嘆咗一口氣，然後蹲低望住嵐嵐，「呢個姐姐，的確係哥哥嘅女朋友，咁得未？」

可能對岑諾新嚟講，要對住一個年紀比自己細一大半嘅妹妹解釋係好麻煩嘅事，畢竟小朋友嘅思想好簡單，只有一同二，唔存在中間值





就算宜家岑諾新解釋比佢知，佢都唔會明白到底係咩意思，十七、八歲嘅思想比起七、八歲嘅思想已經差好遠，更加唔好講佢地真係明白咩叫「中意」、咩叫「愛」；咩叫「失戀」、咩叫「水泡」，對佢地嚟講言之過早啦

「嗯。」嵐嵐點點頭，「好啦。」

嵐嵐行到我面前，拉一拉我嘅裙腳

「好啦⋯！既然哥哥都咁講⋯咁嵐嵐就批准你同哥哥一齊啦⋯！」嵐嵐扁着嘴講道，果然係兄控

岑諾新緩緩企起身，一臉無言地望向我，我都只可以無奈一笑

既然佢個妹要一個答案，咁話佢知就好，事實嘅真相太黑暗，佢唔需要知道，只要我同岑諾新清楚了解就得啦～

「你個妹真係好中意你～」我細細聲地對岑諾新講道，岑諾新只係默默地望咗我一眼，從佢嘅眼神中我睇得出佢嘅無奈

「都唔知係好事定壞事。」岑諾新淡淡地講道





「幾好呀～」我笑一笑講道

⋯

夜晚 2:35

我坐喺書枱前，靠書枱嘅燈光照亮成間房，咁樣嘅夜晚我都已經習慣咗

當房間枱外寧靜時，聽覺便會感銳起嚟，窗外沙沙作響嘅聲音特別響亮

我爬到床上將窗簾撥開望向外面

「呀⋯落雨啦⋯」我望住雨水滴喺玻璃窗上，然後滑落，喺窗上留下一條水痕





我中意阿彥嘅嗰一日，都係落緊雨⋯

望住窗外嘅雨，腦海中浮現出嚟嘅都係同阿彥一齊嘅時候嘅畫面，不自覺地諗起佢⋯或者係因為雨水嘅聲音會令人變得更感性之類

「佢笑起嚟，好幸福咁⋯」

X⋯X⋯X

「好似係雨天⋯」我諗起我同孫慧伶分手嘅嗰一日

「對唔住，唔係你唔好，只係我覺得我地唔適合⋯」

嗰一日，佢係咁樣同我講

「真係真係，真係唔係你唔好，你好好，一切都好好，只係我地大家都唔適合大家⋯」





佢係真係覺得唔合適⋯？真係？有啲問題，其實我早就得到答案，心中有數，但我唔想再去多諗，唔想去懷疑佢講嘅嘢

「新，好對唔住⋯你會搵到比我更好嘅人⋯」

我都已經唔知佢邊句真邊句假，亦唔想再諗佢嘅真與假，所以都係一笑置之就算

我拉開櫃桶，拎咗一疊以前同孫慧伶一齊嘅時候影嘅相

「唉⋯」我望住呢疊舊相，不禁嘆一口氣

我拎起第一張，雙手捉住相片一手向前拉，一手向後拉，將相片一下子撕碎

「嘶—嘶—嘶—」





相紙被撕開嘅聲音格外響亮，既然手機入面嘅相都刪晒，咁呢啲相都已經冇存在嘅意義




IG Link: https://www.instagram.com/nd_cotttoncandy/?hl=zh-tw