［愛情純愛］既然忘記唔到佢，不如試下中意我⋯？: 14. 革命友誼的我們

「放學嗰陣佢一眼都冇望我，嗰一刻我真係覺得自己原來真係咩都唔係⋯！」我忍唔住開始將心底嘅難受一下子講出嚟，「我想知點解佢要咁對我⋯！明明我唔係佢心目中嘅嗰個人，點解要同我一齊⋯？點解要話我知事實？我寧願一直都咩都唔知⋯我有好多嘢都冇喺最後問佢，佢宜家開心我應該替佢開心定點？我想放啦，但又好似做唔到一樣，佢點解成日都會喺我面前出現⋯？」

岑諾新耷低頭，細聽着我嘅抱怨同難過

「佢話你知唔係仲好咩？」岑諾新緩緩地開口問道

「咁咪做咗條刺拮喺我度⋯」我講道，「我係唔係真係放得低⋯？」

「你今日先下定決心要放低，邊可以一日就放低？」岑諾新淡淡地講道，我稍微將頭抬起，岑諾新面無表情





佢真係可以做到零感情流露⋯都唔知道咁樣嘅佢係算厲害定點，平日喺學校嘅笑容只係應付其他人一樣，喺我面前嘅佢好似已經係最真嘅佢

「你真係唔會唔開心一樣。」我輕輕一笑，「喺學校仲可以咁自然咁笑住同人傾計。」

「習慣咗啫，而且喺學校有邊個明？」岑諾新反問道，但佢講嘅好似又係真，「除咗你知，已經冇人知。」

「我唔想避開佢，想好似對普通人一樣，但係真係好難⋯」我鬆開攬住佢嘅雙手，「最後難受嗰個又係我⋯」

「今日先第一日，都要時間適應。」岑諾新平靜地對我講，「喺下定決心嘅第一日就要放棄？」





「冇話要放棄。」我默默地嘆咗一口氣，「我只係呻下咋嘛⋯」

「哦。」岑諾新點一點頭，然後拉住我行，「行啦番去啦。」

我比佢拉住我，我追上佢嘅步伐行番去佢身旁，同佢並肩而行

「喂喂！」我嘅右手緊握咗佢嘅左手一下，指尖輕打着佢嘅手背，佢望向我同時我伸出左手嘅尾指，「我地都唔可以半途而廢㗎！」

「你同自己講啦！」岑諾新輕輕一笑，雖然覺得無奈，但都係伸出尾指





我嘅尾指勾住佢嘅尾指，好啦，唔會半途而廢，因為承諾咗

「唔好半途而廢呀！」我鬆開尾指，對岑諾新講道，「我地都⋯」

「嗯。」岑諾新輕輕一笑，「不過，我地幾時去食嗰個蛋糕？」

佢真係⋯好中意食蛋糕

⋯

星期六

「遲到啦遲到啦！」我企喺門前匆匆忙忙咁著鞋

「你去邊呀？」我媽坐喺梳化上回頭望向我





「約咗人呀，我要遲到啦！」我拎起掛喺門後嘅鎖匙，將個斜孭袋撥番去身後

「你明知自己會遲到就早啲起身啦⋯」我聽到我媽無奈咁講，「番唔番嚟食呀？」

「晏啲話你知！」我抬頭望一望個鐘，「唔講啦！我真係要出門口啦！」

我踏出門口，將大門同鐵閘閂上，即刻趕去同岑諾新約好嘅地方

「嗨！」我跑到去岑諾新嘅面前，尷尬咁講出開場白，「你咁早嘅？」

「你遲到。」岑諾新望住我，拎出手機，將手機嘅螢幕面向我，「我地約幾點？宜家幾點？」

「嘻⋯我都係遲咗10分鐘啫～我冇心㗎！」我尷尬地笑道，伸手將岑諾新嘅手機螢幕鎖上，「我已經跑過嚟㗎啦！」





「知啦，行啦！」岑諾新邁步就行，完全冇等我嘅打算，睇嚟佢真係好想食嗰個蛋糕卷

我同岑諾新並肩而行，冇拖手，冇尷尬，就好似普通朋友一樣走着，睇下手機講兩句咁

「睇下嗰間嘢喺邊先～」我拎起手機，睇一下嗰間蛋糕店嘅位置

「吓？你唔知嗰間嘢喺邊㗎？」岑話新一臉錯愕咁望住我

「唔知呀～」我笑一笑，然後順便睇下點行過去，「我都係嗰日搵到㗎咋～」

「我對於我今日食唔食到蛋糕有啲擔心⋯」岑諾新細細聲地講道

「你唔好以為你講得咁細聲我就聽唔到⋯」我輕輕挑眉望向佢，「一定行到去嘅～我地落車嗰度行3分鐘就到啦！」

「最好係。」由佢嘅語氣都聽得出佢唔信我





「真係㗎！佢呢度係咁寫㗎！」我將手機遞比佢睇，但岑語新只係一臉沒好氣地望住我，點點頭

講開又講，本來我同佢真係冇咩交集，連朋友都稱唔上，最多就只係同班同學嘅關係，我地係上到嚟高中先同班，不過一直都冇咩點講嘢，我同佢一啲都唔熟

不過「拍拖」之後，一開始我地講嘅嘢嚟嚟去去都係關於張景彥同孫慧伶呢兩個人，慢慢先講下其他嘢，嚟到宜家可以咁自然咁出街都算係熟咗好多

宜家嘅話，我同佢私下都算係朋友掛⋯？我地成日都話我地係革命友誼

有交集嘅嗰一日，係我同阿彥分咗手兩個星期嘅事⋯




IG Link: https://www.instagram.com/nd_cotttoncandy/?hl=zh-tw