是咁的，我係一個保險agent: （2）

————————————————————
試卷一 - 保險原理及實務
PASS 合格

試卷三 - 長期保險
PASS 合格
————————————————————

經理Alan打電話黎：「叻仔吖，兩份卷都一take pass搞掂哂，恭喜哂！」





「我都啱啱上網睇到成績，好嘢，唔洗再考過」

Alan：「今晚有無嘢做？陪我去一去銅鑼灣遊艇會吖？啊！溫馨提示著返件裇衫」

咦？！成日睇啲保險佬sell紫醉金迷好搵到錢咁樣。唔知今晚去遊艇會係咪慶祝我考到牌呢？唔知仲會唔會又送禮物又食大餐咁樣呢？

。。。。。。

大閘門衛：「先生，請問你嘅會員編號？」





Alan：「W975F，隔離依位係我朋友」

就係咁樣，我地步入遊艇會嘅酒吧。經理Alan帶我行去埋邊一個對海嘅露天座位，奇怪嘅係，依個位置一早坐咗兩公婆係到，似乎今日Alan唔止約咗我一個喎。

Alan：「Hello 曹生曹太！唔好意思呀，接埋個新同事過黎遲咗少少。我黎介紹，Harris、曹生、曹太。」

「Hello...」我心諗咁突然嘅，仲以為帶我上黎飲酒盡興，突然介紹兩個陌生人比我識嘅？

曹太：「我唔該你就真呀Alan，麻煩哂你介紹簡醫生比我老公吖，幫隻膝頭做完檢查同手術之後即刻放心哂，醫生仲話傷口比想像中復原得快。」





曹生：「Thanks Alan. Harris 就係你之前係電話提過個位新同事？果然年輕有為吖，同你一樣咁後生。」

Alan:「係呀曹生。咁今次嘅賠償手續Harris都會幫你手，我哋兩個一齊處理你嘅個案你唔介意嗎？放心，我會主導住個賠償程序嘅，當比個機會後生仔學下嘢吖。」

曹生：「無問題吖，咁辛苦你地啦。另外Alan啊，上次你提過退休儲錢個啲計劃，嚟緊下個月上嚟我公司傾吖，麻煩你幫手準備啊。」

Alan：「多謝支持。咁Harris你比張卡片曹生同交換電話吖。」

於是乎，抄完曹生牌之後，佢地就只談風月不談公事。聚舊傾咗個半鐘左右曹生曹太就離席了。

就係咁，係毫無準備下，我就經歷咗人生第一次client appointment. 雖然係處理公事，但係九成時間都係吹水傾計為主，依種感覺都幾特別。

曹生曹太走咗之後，Alan帶我轉場落去遊艇會另一間餐廳，今次就真係得我地兩個人喇。

Alan：「嗱，正式飲返杯先！恭喜哂吖，依餐賀一賀你嘅！」





「多謝大佬！話說頭先曹生個case點跟㗎？我保單都未簽過唔識跟㗎喎！」

Alan：「唔洗擔心，你轉頭同曹生message打聲招呼同約佢收返啲文件先，其他手續我會處理，返到office順便教埋你點跟啦。今次帶你出黎其實係想送份入職禮物比你嘅。」


入職已經有禮物，咁又幾開心喎，唔知係咩黎呢？！

Alan繼續講：「現階段送物質嘢比你又未係時候，入職第一份禮物送個客人比你啦。前個排同曹生曹太傾開退休嘅話題，頭先你都聽到曹生話下個月想聽下退休安排嘅計劃啦，咁你係等正式入職嘅依段時間入面好好地溫下公司嘅計劃內容，到時呢張單就交比你簽喇。」