《將軍孤島》: 05 第一章：《狂人病變》

第一章：《狂人病變》

從停車場逃出新天的我們，向著新都城一期走去。

由於我們的住所最近停車場，加上街道上隱匿著無數怪人的危機，雅琪跟禮欣決定把他們先帶到我的家再從長計議。

「喂...點解..我要拎六包米.....」牙賢神情沮喪地問。

「唔好嘈！」朗怡扶著國雄對牙賢說。





「咁你唔好食！俾我吖！」莉亞伸出手來。

「唔好....對唔住...」牙賢低下頭道歉。

「哈哈，辛苦你喇牙賢，冇計啦個個男士都傷晒，得你無事無痛，幫幫手啦～」禮欣端著一個紙皮箱說。

「小問題啦！係呢..你嗰箱咩嚟？咁大箱唔重咩...」牙賢問。

「呃...係........秘密！哈哈哈哈哈...」禮欣尷尬地笑著。





「吓....？」牙賢滿頭問號。

「晨宇，你見點？」雅琪問。

「隻手仲好痹，不過好返好多。多謝你哋嚟救我哋...」

「其實我哋本身唔係嚟救你哋，而係隻女怪人無啦啦發癲踢道門，我哋見唔對路先走。」世凡說。

「咁你哋又會落B1嘅？」我問。





「你女朋友話G樓可能會有怪人，叫我哋經停車場上地面，點知未出𨋢就聽到禮欣把聲。」

「哈！」禮欣不經意笑了一聲。

「果然係最佳伴侶！」

我們霎眼就來到位於新都城一期的升降機大堂，只要再經過平台就能回到家裡。

平時升降機大堂都會站著一個保安為住客開門，現在已經空無一人。

「升降機往上行」

「一樓，First floor，升降機門開啟。」

來到平台，我們住在三座，一直往前行一分鐘就會到達。





在平台行走時，我們發現不少居民都在平台接近邊緣的位置隔著鐵絲網俯瞰著地面，一大群人聚著討論。

我們不經意聽到一些對話。

「聽講三期嗰邊有狂人出現啊。」

「依家嘢食又冇，出去又會俾人殺，想我哋點啊？」

「我FreeHK都沒有服務呀....」

「我想返工呀」

「咦，佢哋拎住好多嘢食喎..」





「係喎！」

「喂！你哋邊到拎返嚟㗎！？」

「俾啲我吖！我屋企冇嘢食喇！」

「𡃁妹，你箱嘢分啲嚟吖！」

禮欣舉起釘槍盯著那人：「要食自己落去拎。」

「靠嚇啊？」

一支鐵釘射到他的腳前。

「痴那線！」那人往人群中逃去。





又有一名居民：「喂你哋睇吓...後面嗰幾個男仔傷晒呀..」

「係喎...唔通佢哋同班狂人打過？」

「會唔會有病毒㗎！！」

人群立即往後急退數步。

「有啊！過嚟吖，咬死你哋啊。」莉亞發怒說。

居民的表情由惶恐不安變成膽裂魂飛，爭相走避著。

來到三座前，大廈的保安還在，看來是無家可歸。





「軍叔！」

「哇你哋咁多嘢食呀...小心啲出面班人呀..」

「你呢？返唔到屋企？」雅琪問。

「係呀，我住觀塘，都唔知點...」

「上埋嚟啦，我哋拎咗好多米同罐頭，我哋隔離單位仲係空置，你上嚟訓住先啦。」

「吓...咁點好意思呀..」

「陣間一封封十日，你餓死咗我仲唔好意思呀！上嚟啦，識咗你廿幾年，俾你睇住大，唔係咁唔俾面呀！」禮欣慫恿著。

「多謝你啊多謝你啊陳小姐！」軍叔泫然欲泣地說。

軍叔正式加入，其實讓他加入的原因除了被他看著長大外，另一個原因是他以前是皇家海軍香港中隊，亦即是英國海軍。

「幾樓？」世凡問。

「37！」「41！」我跟雅琪異口異聲地說。

「吓？？」世凡怔了一怔。

「41，陣間俾出面班人知我哋住幾樓就大鑊。」雅琪解釋。

「要行落去？」朗怡問。

「係，落幾層應該唔會太辛苦。」

「但....國雄佢哋傷晒喎...」朗怡扶著國雄，擔心地說。

「總好過夜晚俾人殺晒。」

「..佢..有道理....我行到..放心..」國雄反過來安慰朗怡。

「升降機往上行，going up」

「叮噹—」「41樓，forty first floor」

我們從後樓梯慢慢落到三十七樓，終於勉強平安回到家中。

在進門前，我們發現兩部升降機也從地下上到四十一樓。

「啲嘢食放晒入廚房先，辛苦晒～」禮欣指著門口右邊的廚房。

「咁你箱嘢呢？」牙賢眼見禮欣走入大廳。

「呃....個箱太大，我放入房先...哈哈哈哈...」禮欣急步走回房間。

「吓..？黑人問號？？」

一番整理後，我們點算了一下大概有多少糧食。

「一共十包米、十四罐午餐肉、六罐五香肉丁、六包三色豆。」莉亞數著。

「睇嚟要執多啲嘢食返嚟，如果唔係好快就要食三餐白米或者白粥......」牙賢失望地說。

「總好過冇啦，我哋只係好彩喺卸貨區執到，如果唔係食都冇得食。」雅琪說。

「好！咁依家處理咗佢哋傷勢先。」雅琪續說。

我的雙膊被男怪人大力壓著，導致雙手麻痹發不出力來。

「你應該只係俾佢壓到血液流唔到去雙手同埋輕微嘅神經受損，休息吓再睇吓情況點。」雅琪說。

「就係咁？」

「就係咁。」

「攬下我都得啩....」我細聲在雅琪耳邊說。

「你隔離仲有個重傷，等下啦死仔....」

接著到國雄，他三受重傷躺在梳化上，是我們之中最傷勢最嚴重。

「講嘢痛唔痛？」

「痛....」國雄臉容扭曲地說出。

「睇嚟你都幾嚴重.....應該受咗唔輕嘅內傷...除咗即刻去醫院做手術之外，我都唔知點幫你...」

「我..抖下就..得」

「試吓Call白車？」牙賢說。

「你Call到我真係跪喺到拜你。」朗怡反一反白眼。

「咦....沒有服務嘅....明明啱啱仲有㗎喎...」牙賢拿起一部最新的iPhone，但已成為一部iPod。

「所以你都係出少句聲當幫忙啦唔該！」朗怡有點生氣。

「算啦算啦，一人少句，依家我哋更應該齊心合力！」禮欣從房間裡走出。

「我哋係咁相處，唔駛見怪～」莉亞說。

「你箱咩嚟㗎？整咁耐嘅？」牙賢問禮欣。

「呃...你都一人少句啦哈哈哈哈....世凡你見點？」禮欣轉換話題。

「我冇乜嘢，多得雅琪幫咗我包紮，依家已經冇乜痛。」

「好彩你個傷口都唔大，只係傷咗背脊少少。」

「係。不幸中之大幸。」

「走嗰陣俾怪人爪到？」

「嗯........」

「................」氣氛瞬間變得幽靜。

「唔緊要啦，暫時休息吓再睇吓點先啦！」

「咪住...國雄你條頸.....」雅琪怔了一下。

「我條頸..做咩..？」國雄用手嘗試摸出頸的異樣。

「你俾佢爪到。有幾條好細嘅爪痕。應該係佢捏住你條頸嘅時候，太大力造成...」

「點會咁㗎.......」朗怡瞬間慾哭無淚。

「唔好意思...我知我唔應該多嘴...但呢位先生內出血可以好嚴重，佢好快會出現頭暈，低血壓，循環休克同心血管衰竭等等嘅症狀。如果唔及時治療，佢好快會死。」軍叔嚴肅地說。

「咁可以點樣救佢！！」朗怡激動地問。

「幫我準備少少嘢，冰袋、繃帶、枕頭，仲要兩塊可以固定佢雙手嘅木板。」

「有！全部都有！」禮欣打開一個櫃桶。

「梓強，幫姐姐去雪櫃裝啲冰入去，識唔識？」

「嗯嗯。」梓強點點頭，走向廚房。

梓強意外地冷靜，從惠康回來也一直跟實朗怡，看來朗怡照顧小朋友有一手。

「木板應該冇...如果煮嘢食嘅針板頂住先得唔得？」

「都得，最緊要係固定住佢雙手，佢應該係粉碎性骨折。」軍叔查看著國雄雙手的傷勢。

「哥，你入我房拎個枕頭出嚟吖。」

「我拎啦，你好好休息。」雅琪摸一摸我的頭。

「咿——」雅琪走到禮欣的房裡。

「個衰妹........」

「唉，算啦，佢頂咗咁耐，都算係佢嘅戰利品。」雅琪望著十多包卡樂D薯片。

需要的東西都找到了，軍叔為國雄包紮著。

「冰袋放喺個肚到，三個鐘換一次冰，最起碼要敷到聽日。跟住聽日要熱敷，盡量散走啲瘀血同埋可以起到活血嘅作用。」

「仲有，個枕頭放喺你隻腳下面墊高，盡量保持下肢屈曲，咁樣可以減輕腹壁張力，幫助止血。至於你隻手都要用板固定住，你骨折好嚴重，如果唔想冇咗對手，我勸你唔好亂郁喇！」

「哇...軍叔你好勁啊！」禮欣驚喜交集地說著。

「以前算係當過兵，識少少咁囉！哈哈！」軍叔摸著頭笑說。

「我果然冇睇錯人！」

「唔好咁講！你哋嘅大恩大德，我一定會還！其實我本身都唔知點算好...聽新聞講寶琳一落樓就會俾警方槍殺，我好徬徨唔知點，好彩你哋肯收留我。我做咗咁耐，知道呢到啲住客好孤寒，多得你哋....」軍叔輕抹眼淚。

「軍叔，你以後就係我哋嘅一份子，多多指教！」雅琪輕拍軍叔肩膀。

「嗯！多多指教！」

「好！咁係時候交換一下大家手上嘅情報。」雅琪說。

大家坐在飯廳開始了一場簡單的情報交流。由於我跟國雄和世凡則因為身上帶著傷，暫時坐在客廳梳化上聽著。

「大家可以講吓對怪人嘅印象、攻擊方式、以至生前係點樣受襲成為怪人，都可以一論講出嚟。」雅琪對著他們數人說。

「我哋本身喺惠康補緊貨，突然聽到出面好嘈，好多人跑緊，我就知道唔妥，所以叫埋朗怡一齊入返倉避吓，我哋返去嘅途中有隻男怪人追住我哋，我哋好驚，咁啱有個好大隻嘅男人經過，佢想幫我哋打走佢，點知....佢就俾隻怪人感染咗，無耐就一齊追住我哋...」莉亞憶述著在惠康的經過。

「佢係咪俾唾液噴中？」雅琪問。

「唔清楚....但佢變成怪人之後，我見到佢冇咗個口罩...因為佢成面鬚，好易睇得出佢冇咗個口罩。」

「即係佢有可能係同怪人糾纏嘅時候整甩咗個口罩，而導致吸入唾液受到感染。」雅琪推測著。

「可能係....之後我哋遇到世凡，諗住一齊入倉避，點知變咗怪人嗰個鬍鬚佬跑得勁快..世凡唔小心俾佢爪到...」

「即係一個唔操腳嘅健身佬。」我說。

「你先頭話有隻怪人好細力，好似同細路仔打交咁，就係佢？」我問世凡。

「係，就係佢。」

「咁依照大家見到嘅情況，可以粗略得出一個假設：就係只要生前愈健碩嘅人，變成怪人就會愈低殺傷力；相反，生前你係一個廢人，只要變成怪人，你就會變成一隻好可怕嘅怪人。」雅琪說。

「你兩個做乜望住我.....」牙賢看著凝視著他的莉亞和朗怡。

「冇，望你靚仔。」他們異口同聲說。

「多謝...............」

牙賢收到兩對白眼。

「咁大家對佢哋嘅攻擊方式有冇咩印象？」雅琪問。

「晨宇，不如你講先，你算係我哋之中打敗過最多怪人嘅人。」雅琪望向我。

「好。」

「依我觀察，佢哋最主要嘅傳播方式係用唾液，一但怪人使出完唾液，對方冇受到感染嘅話..佢就會進入攻擊模式。」

「即係得唔到你就要殺咗你...好病嬌啊！」牙賢帶點興趣地說。

「不如你收聲先啦死抖M。」隨即被莉亞秒殺。

「對唔住.....」

「條友真係愈鬧愈興奮...」朗怡受不住了。

牙賢又說：「但係....我哋先前係惠康打嗰隻女怪人，佢好似冇噴過口水喎？」

「有。佢噴落梓強到。佢跑過嚟嗰陣件外套後面濕晒，係我除咗佢。」朗怡回答。

「咁停車場嗰三隻呢？」牙賢再問。

「佢噴到我成個口罩到係口水，只係我換咗。」我說。

「原來係咁......」

「咁你有冇咩偉論發表吓啊？見你都有打。」朗怡說。

「緊係有啦！我啊！我發現佢哋有啲好大力㗎！」

「呢個咪即係頭先雅琪講嗰樣囉！你到底有冇聽㗎？」

「吓....但隻女怪人係異常地大力....仲有佢後嚟發癲踢道門，力度仲大過我哋打嗰陣....」牙賢戰戰兢兢地說，生怕再被朗怡罵。