念念不忘 都冇迴響: 儀式 二

過完惜別會咁另外一個重頭戲就係grad din啦。老實講一開始我有思考過唔去grad din,雖然個原因我唔係特別記得，但係我好似覺得好晒錢?同埋嗰陣時考完DSE好樣衰?反正最後我問咗幾個人意見佢都覺得我應該去，咁我覺得人一世咪一世就算啦，最後都死死地氣交咗錢去。

對比起惜別會，遊爍嵐對grad din個重視程度係幾何級咁提升，因為佢本身係一個小小比較貪靚嘅女仔(雖然佢唔承認)，不過佢成日話grad din係你全個中學生涯有機會最靚嗰日，亦都係好多人同你再下一次影相嘅時機，所以要留個好嘅印象俾人。

幫我準備grad din嘅時候，我唯一可以取經就係陳珊蕾，因為陳珊蕾自從考完DSE之後醉心於研究化妝，我身邊唯一識化妝嘅人就好似係佢。唔知點解陳珊蕾又咁好心幫我準備，咁好心幫我準備，有一日佢去咗我屋企試妝，果日遊爍嵐都有跟埋上嚟，咁我就當然非常樂意啦。

最後我跟住佢兩個嘅意見化咗個妝，咁其實眾所周知你grad din果陣如果係人生第一次咁隆重咁打扮，出到嚟其實一個字：柒。

我grad din大部份嘅相都係唔敢睇返嘅。我真係唔知我河內嘅自信咁樣見人。嗰陣時啱啱去完幾個Grad trip真係肥到一個點，再加埋唔識拿捏化妝嘅力度等等，成件事我係真係冇眼睇。





果晚都影左幾多相嘅，不過最可惜係遊爍嵐唔知點解愛上左用前鏡頭影相，因為佢覺得見到自己個樣出錯嘅機會率會細啲，咁其實係人都知前鏡頭個像素係低好多，所以出到嚟我哋啲相勁朦。我都有少少無話可說，可能係天意啦睇唔清都係好事。

好老實講，嗰晚我又冇特別覺得遊爍嵐特別靚，我反而覺得佢平時可能仲好少少。可能係冇驚喜感?佢自從考完dse都開始打扮自己，所以嗰個樣係成日見。又或者係因為我比較鍾意以前嘅佢，所以而家反而睇唔慣。

遊爍嵐後來好熱愛用colour con,咁其實大家都知一戴左，個樣個變化其實都幾大。所以後來我曾經覺得，有時即使我好認真咁望入遊爍嵐對眼，都見唔番當年我心心念念嗰個少年，其實成件事都幾可惜。

反正完左grad din之後我全班又去左party room 玩通宵，雖然精英班都有搞類似嘅活動，但係遊爍嵐同陳珊蕾都係冇去到嘅。有事我會喺度諗如果我同遊爍嵐繼續係同班同學，好有可能因為嗰個小圈子文化，同埋要陪佢，所以好多活動我都唔會參加。雖然咁講有啲衰，但係我覺得鍾意佢已經佔用左我中學嘅大部份時光，少少好彩我同佢最尾唔同班，如果唔係可能我真係全個中學生涯都係佢，就會錯失咗好多好青春嘅回憶。