念念不忘 都冇迴響: 見面 二上

我生日見左次之後，本來我都想約佢暑假見面，但係我儲咗好耐啲勇氣之後，第三波疫情爆發，令到我七八月都見佢唔到。嘿，講到好似因為疫情令我見佢唔到咁，其實個事實係我根本唔夠主動約人，故事實係即是我好掛住佢，我都唔知我係真係掛住佢，放唔得以前啲回憶定係點。

反正全個暑假都因為準備O camp d 嘢令我好頭大，呢個狀況維持到九月十月，其實工作係沒完沒了嘅，我過住一種表面上多姿多彩，實際上有苦自己知嘅生活。有時我會覺得遊爍嵐係一種寄託，可能我一直都放佢唔低，係因為佢俾過一啲好好嘅回憶我，或者佢根本冇我想像中咁好，但係我真係好想世界上有一個咁好嘅人存在，令我繼續有動力去面對世界。

反正去到佢生日嗰陣時前幾日，講起佢今年生日有啲咩安排，遊爍嵐唔知點解話想去海洋公園，佢話因為生日可以免費去所以唔想晒。

講返先，其實我當年同遊爍嵐去咗幾次行公園之後，佢就唔見咗銀包，搞到張銀卡都冇埋。唔係要扮偉大，但係當我知道呢個消息之後，我都特登去咗前一日佢放學test果個班房行咗轉，想搵返個銀包。呢件事俾謝嬭陵知道左之後，佢話想像到如果我真係搵得返，我會面部表情扮到好唔在意咁理返佢，之後可能講一句：

「咁啱行過見到。」





嗰陣時我先知道原來謝嬭陵咁了解我，因為我正正就係啲咁嘅人。

反正當我知道佢諗住去海洋公園，好自然我就問吓佢會同邊個去，點鬼知佢竟然話諗住自己去。之前上網見過有張圖，係講人孤獨嘅程度，而自己一個去將來樂園好似係第九定第八級孤獨。我思考左基本上一日之後，就決定打電話問吓佢肯唔肯比我同佢去，佢好自然應承咗。其實後來我有諗過佢係咪專登同我講佢諗住一個人去海洋公園，咁樣我就會主動提出訊號去？不過我覺得咁大機會率係我諗多咗，應該係掛。