念念不忘 都冇迴響: 夏天 二

果兩日summer camp其實我同D組員都麻麻都夾，可能因為我組爸係我中同，佢同佢果屆我一個比較熟嘅師姐有啲過節，所以成件事都有啲尷尬，加埋我全副心神一係就系個mock exam,一係就系游爍嵐地，我全程都唔係玩得好開。

反而開始上大學D堂果陣，我同游爍嵐久違地可以平排坐，一齊上堂果種感覺真係超難得。我地一齊share左個google doc,一路抄motes一路系下面講無聊耶。

我有一次lunchtime果陣同佢講開，我同佢講，覺得我地中五果陣疏離左好多，佢又從來都唔主動搵我；佢話，佢本來都唔係一D主動嘅人，同埋佢話從來都唔覺得我地疏遠過，佢知道我地依然係朋友，緣分未斷，依然會接軌。後來我理解到其實佢個人本身個性格就係咁，佢根本真係唔係D主動嘅人，同埋佢係果D可以十年冇聯絡都依然當人朋友嘅人；相反我比較注重交流，覺得朋友一定要有心聯絡大家，比對方知道其實你地依然有動力，想維持一段關係。果陣我未歸納到我地價值觀唔同，我只係覺得佢份人冇乜心肝，但係偏偏又係我最鍾意嘅人，所以我都係繼續用自己嘅方法對佢好，我覺得我冇負過佢，已經好足夠。

陸陸續續上左好多堂，我地都講番更多耶。本身就係好熟悉嘅人，一齊相處都係一如以往嘅舒服。因為上堂我地一齊去左香港唔同地方，每日都固定係C大見。我記得我觀察到每次你見到我向我走來，都會慢慢變到笑逐顏開。每次你走，我都會送到你有車為止。

全個camp其實我就冇乜太大得着，人又唔係真係識到邊個，我有思考過係咪我太投入認識你，所以忽略左其他人，個答案其實都好清楚。不過我又覺得無乜所謂，反正可以同你過，其他閒雜人等，都早已唔喺我眼內。