回到過去，破我未婚妻個處: （59）

「五筒！」

「八索！」

「碰！」

客廳傳來打麻雀嘅聲音。

神早流流打麻雀，好少有喎。



我休返條褲，行出去望下。

客廳圍左四個人喺度打麻雀。

老豆、老母、阿叔、Shirley。

「咦，阿輝你醒啦？」阿叔同我講左聲早晨。

我驚訝到講唔出說話…



阿叔…阿叔佢返生左？！

「太好啦！阿叔！你無死到！」我興奮到過去攬住佢。

「頂你，甩緊牌架，唔好挨住啦！」

「阿叔，你真係買左嗰期六合彩？」

「訓醒未呀你，買左n年，中左n年啦，你好似啱啱先知咁。」



「我真係未訓醒，阿叔你講嚟聽下。」

「十年前有一個自稱由未來嚟嘅你，俾左六個冧巴我，又話Shirley個腦有個瘤，講真一開始我真係唔信，殊不知當日下晝六七點嗰陣，我收到醫院通知，話Shirley入左醫院，醫生check完話佢個腦有個瘤，咁我即刻趕喺九點三前，跟住串冧巴買。」

「當時我訓喺醫院，聽見阿明話要去買六合彩，都唔知好嬲定好笑。」Shirley補充話。

就喺同一時間，我腦海浮現阿叔中六合彩、陪Shirley出入醫院、再到Shirley好返，阿叔為左紀念而紋左嗰六個數字等等嘅記憶。

「阿叔你手背係咪紋左個六個號碼？」

阿叔伸個手背俾我睇。

6，23，30，33，43，44。

無錯，就係呢串數字。



「所以你地後來都無結婚？」我問。

「你係咪發燒呀，問埋啲明知故問嘅問題？我地之前咪有諗過下，但你老豆講到要同我兄弟決裂，加上我又覺得結婚只係一張紙，結唔結都好閒，咁咪無結到。」

「係呀，結左都可以離，只要大家喺埋一齊，結唔結都一樣！六萬！」Shirley打出六萬。

「食糊！清一色！哈哈哈！」阿叔攤大手板收錢。

「搞錯呀！咁都俾你食到糊！算啦唔打啦，打左成晚都無贏過錢，返屋企訓教！」Shirley唔服氣。

「打多圈啦，最多讓下你啦。」阿叔氹Shirley。

「唔打啦，你唔記得我下晝約左出版社傾嘢咩，再唔訓教陣間會無精神。」Shirley打一個喊露。



「好啦好啦，咁阿哥我地走先，得閒再打。」

阿叔中左大獎，搬左去大屋，無再住喺耀東邨。

見到自己成功改變過去，令阿叔返生，真係感到好開心。

但有樣嘢好奇怪，對上一次穿越，我都係俾同一串冧巴佢，點解佢就無返生，而今次佢又返生呢？

「鈴鈴鈴——」呢個時候，電話響起。

Kevin打過嚟。

佢問我有無破到處。

我答佢話我已經破左Veronica個處。



「Yeah…」聽到電話另一邊隱約有把女聲，唔知係咪Veronica開心得滯嗌左出嚟。

Kevin亦情緒激動，猛咁同我講多謝：「輝哥多謝你！以後你有咩需要我幫手，我一定會幫手！輝哥好多謝你！多謝！」

本來係一個穿越過去，破自己條女個處嘅劇本，家下個處就成功破左，但故事已經變左味。

之後嗰幾日，佢地都無再同我聯絡，我估大概去到簽字嗰刻先會再見。

喺穿越前，得知道小曼突然結婚嘅消息，呢幾日我都有打過去，問下佢結婚啲嘢。

不過對方都無覆機，淨係喺同學group度，約我地今晚去諾士佛臺度飲嘢，當係pre-wedding party。
 
大家見到佢，個個第一句就問佢點解突然閃婚。



佢都只係答一句：「遇到啱嘅人就結架啦。」

然後個個又湧住問新郎哥係個咩人，我想搭嘴都搭唔到，加上心情鬱悶，出唔到聲就喺度飲酒。

「佢係好細心好溫柔嘅人，對我好好，好照顧我，係一個值得依靠嘅人。」

「哎呀，唔係問呢啲呀，係問佢有無車有無樓？」Kelly問埋八婆嘢。

小曼尷尬一笑：「都…都有嘅。」

「有就得啦，結完發現唔鐘意，第時離婚可以分佢一邊身家，哈哈。」馬騮講笑咁講。

「咁會唔會太兒戲？」我。

其他人靜左兩秒，然後森仔笑笑口咁講：「馬騮講下笑啫，小曼梗係真心鐘意先同人結架啦。」

「不過話時話阿輝，你唔係就嚟結婚啦咩，但我地幾個家下都未收到請帖喎。」森仔問。

「我地臨時決定唔擺酒。」

「下？點解呀？」

「無咩點解嘅，突然唔想擺咪唔擺囉，算啦，我啲嘢唔好講住，今日我地係嚟慶祝小曼出嫁，大家快飲返杯賀下佢先啦！」我一口氣乾左手上一杯白酒。

大家飲到十二點幾先散場，馬騮同高佬威照舊飲到貓左，要人call uber送返屋企，森仔同Kelly住大埔唔同路，佢地自己去搭車。

而今日Eric無嚟送小曼返屋企，所以得返我同佢搭巴士過海返筲箕灣。