回到過去，破我未婚妻個處: （40）

電話都係得返20%，我試下打俾中學同學，問佢地方唔方便借宿一宵。

我先打俾爆我結婚單嘢俾我老母聽嘅馬騮。

打左三次，無人接電話，可能訓左教，跟住我打俾高佬威。

今次有人聽電話。

「喂阿輝，咁夜揾我咩事？」



「今晚方唔方便嚟你屋企住一晚，我俾屋企人趕左出嚟。」

「下，點會咁架？」

「喺電話講唔清楚，你今晚方唔方便收留我？」

「我都想幫你，但我依家去緊機場，我老細漏左份重要文件無帶，要我臨時臨急漏夜搭飛機，送去高雄俾佢。」

「咁呀...咁算啦，我唔阻你啦。」



森仔同Kelly搬左去大埔，無再喺筲箕灣呢頭住。

因此，住附近又同相熟嘅朋友咁就剩返小曼一個。

「點呀？三更半夜打過嚟，係咪有咩事？」

「你屋企有無人？」

「有，我呢個人咪喺我屋企。」



「我意思係問，你係咪自己一個喺屋企？」

「係呀，我不嬲自己一個住架啦，你第一日識我？」

「咁我可唔可以上嚟你屋企住一晚？」

「嗯？發生咩事？」

我將自己處境話講對方聽，佢聽完亦同意俾我上佢屋企住一晚。
 
之前我提過，小曼雙親喺佢好細個就離異，佢自細就同嫲嫲相依為命，然而其實大概喺十年前，佢阿嫲就因病去世。

所以，小曼中五就要自己一個人生活，自己照顧自己。

佢就住喺西灣河，沿住電車軌行上去，好快去得到。



我上到佢屋企，對方開門俾我入去。

佢屋企同以前一樣，打掃得好整齊、好乾淨。

以前有段時間佢幫我補英文，我屋企有人唔方便嘅話，我就會上嚟佢屋企，計落自己都有好多年無上過嚟。

「除鞋入嚟坐啦。」

小曼頭髮濕濕地，膊頭搭住一條藍色毛巾，身上著住寬鬆嘅T-shirt同短褲，似係啱啱沖完涼。

「多謝你俾我喺度住一晚。」我坐到客廳嘅梳化。

「搞咩呀，咁大個人俾老豆趕出門口，講出嚟怕唔怕笑大人個口。」



我歎一口氣話：「我老豆知道左我同Veronica結婚嘅事，佢嬲到出煙，仲極度反對，要我中止頭婚事，又話如果我唔肯就以後唔認我做仔，我地嗌霎左幾句，跟住我就俾佢趕左出門口。」

「唔係呀嘛，咁大獲？」

「唉，其實我都明老豆點解咁嬲，佢都係唔想步阿叔嘅後塵。」

「咁話時話，你究竟破到Veronica個處未？」

我搖搖頭答：「未，試左四次都唔得。」

「你係咪路架！咁多次都未搞掂？剩返唔係好多次機會，你唔係真係想死呀嘛？」

「下…你話我剩返…」

我說話未講完，小曼就補充解釋話：「我意思係你就嚟結婚，再唔搞掂佢，就無機會。」



「呢層我都知…」

「鈴鈴鈴—鈴鈴鈴—」

小曼嘅電話喺度響。

佢行入房聽電話，一講就左半粒鐘。

「十二點打嚟仲傾咁耐，唔洗問肯定係Eric啦。」

「關你咩事，八卦。」小曼傾完電話行出房。

「你就爽啦，食親都係靚仔。」我講笑咁講。



小曼dum條毛巾過嚟：「夜啦，早啲沖涼訓啦！」

「呢條毛巾你用過架？」我接住毛巾。

「食啦你，新毛巾嚟架，你沖完涼自己熄燈訓，我眼訓要訓先。」小曼打一個喊露。

「咁今晚我訓邊？」

「訓廳囉，唔通訓我間房？」

「都好喎，我訓你間房，你就訓廳。」

「你就想，諗下好啦，費事同你講，我訓先，早抖！」

小曼返入自己房，我就拎住毛巾行入廁所。

一入到去見到個沖涼房，掛左個淺藍色bra同底橫。

非禮勿視，我下意識擰轉面，拿拿聲行去敲門，叫小曼拎返佢啲底衫褲出嚟。

「點呀，你唔係諗住真係入嚟訓下話？」

「唔係啦，你入嚟廁所睇下先。」

佢行入廁所，見到自己啲底衫底褲晾曬出嚟，拿拿臨一手收走曬，場面十分尷尬。

「拿，係你唔記得收，我無心睇到架。」我都有啲唔好意思。

「死變態！」對方兩邊面珠墩紅到好似蘋果咁。

講完呢句，佢就拎住兩件衣物，急急腳返入房。

真係無辜，無啦啦咁樣俾人鬧。

沖完涼都差唔多成點，我求其抹乾個頭，就攤落客廳張梳化度訓教。