回到過去，破我未婚妻個處: （31）

收左工後嘅我，又約馬騮出嚟打波。

之前大敗俾Kevin，條氣硬係有啲唔順，諗住練多幾次，增加下實戰經驗，等下次穿越嗰陣覆卓。

「唔得啦，唔得啦，我要抖下先。」馬騮「粗身大勢」，同我1on1鬥左兩場波，就滿頭大汗，氣來氣喘。

我同佢坐到場邊休息：「抖下陣間再嚟過。」

「下？仲嚟？我好攰…」馬騮用毛巾抹走額頭嘅汗。



「我啱啱先有返啲手感，梗係唔好俾佢停。」我飲一啖水講。

「以前讀書又唔見你咁熱衷打波。」

「以前唔知打籃球咁過癮呀嘛。」

「講開又講，今個禮拜五中同聚會，你去唔去？」馬騮問。

「係喎！呢排忙結婚啲嘢，差啲唔記得左呢個禮拜五有同學聚會！」



「聽講阿德都去，咁你無理由唔去啦。」

「阿德都去？佢返左嚟咩？」

「係呀，上個禮拜先返左香港。」

「哦...好！抖夠啦！繼續開波！」我放低水樽，拎起籃球。

「咁快？都未抖完。」



「唔好咁『屙哥』，快啲開波啦！」

我地喺球場再打多一陣先散band。

身水身汗嘅我沖完涼就訓覺。

今晚我無著齊全套裝束上床，因為經過三次穿越，我發現每次穿越都係相隔一個禮拜，所以我知今晚唔會穿越。

而事實亦的確如此，我一覺訓到天光，無見到白光，亦無聽到「wee-wee」聲。

接住嗰幾日，生活除左返工，就係搞婚禮嘅啲嘢，空閒時間就喺度諗策略、諗方法，諗點樣破十六歲嘅Veronica個處。

至於小曼都係好少覆機，想約佢出嚟食lunch都約唔到。

差唔多成兩個星期都唔見人，直至去到星期五個同學聚會先碰上一面。


 
同行十幾個舊同學，一齊嚟到旺角某間韓燒食飯。

從前一班三十幾人，畢業之後每次聚會都約唔齊人，有一半人到場已經算俾面。

同自己比較熟嗰啲朋友今日都有嚟，大家坐埋喺一檯。

「阿輝，你定左幾時擺酒結婚未？」坐我對面嘅森仔問.

「下個月28。」

「咁好快喎，到時你派帖，我同阿森一定到。」

森仔隔籬嘅係Kelly，佢地兩個從中學就拍過到依家。



「咁你兩個呢？拍左拖咁耐，諗住幾時結婚？」我問。

「結婚呢啲嘢好閒啫，都唔急嘅，過多兩年先。」森仔答。

「我地諗住儲多兩年錢買到樓先。」Kelly夾一舊燒肉餵森仔。

「阿輝，唔該你遞一遞你右手邊嗰碟牛肉過嚟。」坐喺我隔籬嘅隔籬嘅馬騮伸手過嚟。

「你個肥仔食左好多碟啦喎，仲未夠喉？唔怪得變到咁肥。」森仔話。

「你地都唔係食嘅，一係掛住傾計，一係就玩電話，你地唔洗咪我食，費事曬嘢。」馬騮接過我手上一碟生牛肉。

佢口中掛住玩電話嗰位，就係坐我隔籬嘅高佬威。

條友成晚都望住電話，都無乜點食過嘢。



「成晚眼都唔眨望住個電話，食啲嘢先啦。」我夾舊豬肉俾佢。

「Shh-唔好嘈，我睇緊個市。」原來佢睇緊美股。

「話時話，點解小曼今日咁遲嘅？」Kelly問。

「係囉阿輝，點解佢咁遲都未到嘅？」森仔問我。

「我都唔知...」

「仲有阿德呢？又話會嚟嘅？」馬騮嘴裡咬住牛肉，講到lur下lur咁。

「Sorry咁多位，我遲左。」



一講曹操，曹操就到，小曼終於出現。

佢坐埋去Kelly隔籬個位。

「做咩咁遲架，你再遲多幾分鐘，啲嘢就俾馬騮食曬啦。」Kelly講笑咁話。

「哈哈，因為診所嗰邊有啲嘢做，所以遲左。」小曼答。

小曼坐喺我對面最右手邊個位，相隔比較遠，我地都傾唔到咩計。

過左一陣，見佢出去拎嘢飲，雖然我檯面樽可樂未飲完，但都跟埋出去。

「喂！你呢排好忙呀？約親你食lunch都揾唔到人嘅。」

「係呀，呢排診所人手唔夠，所以比較忙。你呢，結婚啲嘢搞成點？訂左酒席未？」

「訂左啦。」

「咁最近仲有無穿越？破到人地個處未？」小曼刻意降低聲量。

「上幾個禮拜同你睇完Kolor隔無幾日，我又穿越左一次，之後隔左個禮拜再穿越一次，前後加埋三次，但都係未破到。」

「乜你咁渣架，三次都搞唔掂，快快手手諗個方法搞掂佢啦。」小曼打開雪櫃，拎左樽可樂遞俾我，佢自己就攞左支雪碧。

「我試左好多方法架啦，不過你知啦，2009年嘅Veronica係mk妹嚟架嘛，mk妹好難入手。」

小曼望一望我個頭，笑左一聲：「哈哈，所以你特登剪個咁mk嘅髮型嚟迎合佢？」

「係呀。」我撥一撥前面執陰。

「好柒，唔太啱你。」

「唔係呀，都幾型。」我吹起前面執陰。

小曼笑左一笑。

我地手上各自拎住汽水，行返埋個位。

「Hello，好耐無見。」

同我地打招呼嘅人就係阿德。

我中學時期最好嘅朋友，小曼嘅前男友。