回到過去，破我未婚妻個處: （29）

「點呀，又話有運輸署打俾我？我部電話響都唔響喎。」

頂…...

半個鐘頭前，我將Veronica嘅電話號碼俾左十六歲嘅我，千叮萬囑叫對方踏正下晝兩點，就扮運輸署打過嚟，條友搞咩仲未打過嚟。

我額頭冒汗，心裡感到焦急。

過多兩分鐘，Veronica手上嘅電話終於響起。



佢接聽電話：「喂？你係邊位……咩話？運輸署？你揾我咩事……我都無車牌，你係咪打錯……」

我鬆一口氣，笑一笑講：「點呀？你依家信啦。」

「你真係有預知能力？」

我點點頭：「我見同你有緣，所以頭先我先提你一次。」

「咁真係多謝曬喎，係啦，下期六合彩開咩冧巴？」佢問。



「呢個係天機，我唔可以透露，不過如果你想知，我不妨就將我啲預知能力，過少少俾你。」

「嗯？你話你可以俾啲能力我？」Veronica追問。

我心中暗喜，睇嚟對方已經上釣：「無錯！只但係過程需要你一啲付出，唔知你肯唔肯？」

「付出？我要點做？」

「如果你想得到我嗰超能力，咁你就要蝕底少少。你要同我做一次愛，咁我先能過到啲能力俾你。」



性交轉運都有人信，我呢招「性交換超能力」，照計都氹得到眼前呢個無知mk妹落搭。

「下？你當我憨鳩？假如上下床，就有超能力，隨便隨便將啲超能力傳嚟傳去嘅話，咁咪通街嘅人都識預知未來？」

「呢層…Er…」

「屌！睇你都係鳩噏，費事睬你！」

Veronica轉身開門，返入大廈。

對方唔落搭，係我低估左佢。

但係唔緊要，我仲有Plan b。
 
Plan b好簡單，就係喺聽日平安夜同Kevin報串，督爆Veronica同金毛仔send情慾短訊嘅事。



當Kevin一check電話，見到曬啲sms，就肯定嬲爆，立即分手。

只要Kevin發現姦情嘅時間出現些微改變，就會令成個格局徹底唔同。

我咁樣做嘅話，最低限度保證到平安夜，佢兩個一定唔會上床。

總之就先要過到平安夜最危險呢一日，之後再諗辦法阻止佢地復合，再乘虛而入溝Veronica。

暫時我咩都未洗做，等待聽日來臨。

時間嚟到傍晚時分。

我返到筲箕灣，喺出面買左個外賣，諗住拎返屋企食。



「叮噹！叮噹！」

我身上無鎖匙，只能按門鈴，等十六歲嘅我開門。

響左五分鐘門鈴，都未見有人開門，打條友電話又無人聽。

最後一等就等左三粒鐘，先等到對方返嚟。

「你去左邊？咁耐先返嘅？」我坐喺門口等，坐到屎忽都痛埋。

「出左街囉。」

今日係23號，聽晚我地將會一大班朋友去石澳bbq，無記錯嘅話，呢晚我同小曼出左街，幫佢眼揀份聖誕禮物送俾阿德。

我行入廚房叮返熱盒飯，十六歲嘅我就去沖涼。



「鈴—鈴—鈴—」

屋企電話響起。

我放低筷子，行過去接聽：「喂？」

「唔該，我想揾鐘耀輝。」

「我係。」

「我諗住聽日送多張聖誕卡俾阿德，你話上面寫咩好…」

「邊個打嚟？」十六歲嘅我沖完涼行出廁所。



「小曼。」

「頂！又立亂聽人電話？！」

佢一手搶返個電話，急急腳行返入房。

我都唔得閒理佢咁多，拿拿臨食個飯沖個涼，未夠十二點就訓教。

聽日朝早我仲要揾Kevin，督Veronica背脊。

「想得太多，想得太多，可知我瑟縮在被窩… 」

睡夢中嘅我俾突如其來嘅音樂聲嘈醒左。

「搞咩呀你，成點幾仲喺度播cd。」我見到十六歲嘅我仲傾緊電話。

對方熄左部機，講左聲sorry，又慢慢行返入房：「拿，我無講大話，我真係買左隻CD，如果你真係想聽，我都不妨考慮下借俾你嘅…」

神驚無神咁樣俾人嘈一嘈，成個人醒曬咁滯。

之後我碌左好耐先訓得返，搞到第二日無曬精神。

臨出門口前，我特登開著CD機，嘈返佢轉頭。

何文田，巴富花園。

我嚟到Kevin住嘅地方捕佢。

我發覺次次穿越都變左個跟蹤狂咁，周圍喺人地屋企樓下捕人。

由上晝等到下晝，Kevin終於出現。

佢gel曬頭咁，執得好正。

我上前截停佢：「Hello，你記唔記得我？」

「記得，屎波但又要挑我機嗰個呀嘛。你又想揾我鬥波？但今日平安夜約左女朋友，我唔得閒應酬你。」

「唔係，我係有啲事要話你聽。」

「咩事？」

「你知唔知你條女背住你，偷偷地同你個金毛隊友搞埋一齊？」

「咩話？」

「你唔信嘅話，陣間揾機會check你女朋友電話，裡面有曬佢地嘅情慾短訊。」

「唔係掛…」Kevin一副難以置信嘅表情。

「我咁啱喺度撞到你，唔忍心見你笠住咁大頂綠帽都唔知，所以先走過嚟提你一句，陣間見到女朋友，記得記得要check佢電話。」
 
本來我以為今次計劃實食無黐牙，結果出到嚟都係失敗。