回到過去，破我未婚妻個處: （20）

兩次穿越，兩次都要入院，認真唔好彩。

護士姑娘用紗布為我包紮傷口，另一邊廂嘅Veronica傷口唔深，簡單消毒後就無大礙，隨時出得院。

Kevin拖住剛剛處理好傷口嘅Veronica，行出急症室：「我地去尖沙咀食放題，跟住去海旁倒數，好唔好呀？」

「好呀，你話事啦。」Veronica挨住Kevin個膊頭，表現親密。

「咁快啲行啦，平安夜咁多人，遲左就無曬位。」



佢地十指緊扣，準備搭lift離開醫院。

我坐喺走廊，望住二人離開…

喂！我喺度做咩？

上天咁難得俾第二次機會我，儘管佢地又喺返埋一齊，但場波一日未踢完都唔可以放棄。

就算係夾硬嚟都好，最最最低限度都要喺呢日平安夜，阻止佢地上床。



我起身想離開，護士姑娘叫停我：「先生你唔走得住，你個傷口太深，最好打支破傷風針。」

「好小事啫，唔洗啦。」

「要架，早幾日有病人𠝹親手，個傷口就好似你依家呢個咁深，佢以為無乜嘢唔肯打針，之後過幾日破傷風入院，差啲無命。」

「咁大獲？」

「係呀，打支針好快嘅啫，坐喺度等下啦。」



我以為好快講緊係五分鐘，點知等下等下，最後等左大半粒鐘先打到針。

等待嘅期間，靈光一閃，俾我諗到一個策略。

頭先Kevin話食完放題，就會到尖咀海旁睇燈飾，睇完估計就係去開房。

我嘅策略就係先揾到佢地，再跟埋佢地去酒店，然後我就老屈Veronica未夠稱，等酒店職員唔開房俾佢地。

我諗中學生一般都唔會帶身份證出街，相信有機會老屈成功。

平安夜，街頭人來人往，氣氛熱鬧。

我喺尖沙咀一帶左揾右揾，卒之今次皇天不負有心人，俾我揾到佢地，而且仲要喺某間酒店門口撞到正。

二人行到counter準備check in，我睇準時機，箭步上前，衝埋去counter，同個前台職員講：



「你千其唔可以開房俾佢地！呢個女仔未夠十六歲，呢個男仔就準備同佢上床，與未成年少女發生性行為係犯法，所以你地酒店絕對不能成為幫兇！」

職員嚇親咁款，o左嘴咁望住我。

「乜又喺你，點解成日都見到你？」Kevin一臉不爽。

我無理佢，繼續同個職員講：「你有無聽到我講嘢，你要阻止呢個男人同未成年少女發生性行為，一定唔可以開房俾佢地！」

「先生你冷靜啲，從呢兩位嘅身份證顯示，佢地係符合你所講嘅年齡，同埋我地酒店絕對尊重客人私隱，客人喺房間內做啲咩，我地都唔會干預。」前台職員回應我話。

「聽到未呀，夠曬稱架啦！」Kevin向我展示自己嘅身份證，出生年份係1991，至於Veronica嗰張就係1993。

我頓時啞口無言。



佢兩個攞住房匙，搭lift上房。

我得個睇字，無力阻止。

時間過左十二點，四方傳來倒數聲和歡呼聲。

「阿Ling，我愛你，Merry Christmas！」

眼前又一次浮現二人床上交合嘅畫面。

亦即係話，今次我嘅穿越任務再次失敗收場。

隨即，刺眼嘅白光同奇怪嘅聲音將我帶返到現實。
 
「鈴—鈴—鈴—」



床邊電話鬧鐘響起，代表一晚過去，新一日來臨。

手背貼住紗布，傷口仍感到些微痛楚，兩次穿越都破唔到未婚妻個處，仲搞到自己傷痕累累。

至於今次失敗嘅原因，其實都無咩嘢好講，只係有兩樣嘢我比較在意。

第一，年少嘅Veronica居然做出一腳踏兩船嘅行為。
 
第二，佢對Kevin嘅迷戀程度有少少超出左我嘅想象。

「起左身啦？」我老豆開門行入我間房，「發冷呀你，搞咩著咁多衫，仲著埋鞋訓？」

「無，呢排夜晚翻風，咪著多件衫訓。」



「話時話，琴晚凌晨嗰陣，你出過去咩？」佢問。

「下？唔係呀。」

「咁點解我琴晚凌晨三點幾起身屙夜尿，經過你間房唔見人嘅？」

「Er…我...」呢個問題有啲難回答，無理由答話我穿越返左去2009年。

「哇，你隻手搞咩嚟，紮曬紗布咁，點整親架？」佢望到我手背受傷。

「呢個…係...係琴日貪得意餵流浪貓，唔小心俾啲貓抓傷。」我求其講個理由。

「乜你咁大個人都咁論盡架。」

「係囉，又會咁唔小心都有嘅。」

「係啦，提一提你，下個禮拜六係你阿叔死忌，嗰日你唔好約人，我地一齊去拜你阿叔。」老豆提醒我話。

「哦，我知啦。」

每年阿叔死忌，我地一家三口都會去拜祭佢。計落阿叔都差唔多走左十年。

「你仲唔起身？八點幾啦喎。」老豆提我。

「下？八點幾啦咩？大獲！」

我即刻刷牙洗臉換衫，出門趕返工。

好彩無塞車，趕到喺九點前到公司。

上司交低一堆工作，忙緊嘅時候，收到Veronica嘅message。