回到過去，破我未婚妻個處: （10）

確認四周無人後，我喺褲袋舊石出嚟，行近Kevin個locker，準備一嘢「亨」爛把鎖。

當我想動手之時，見到locker門露出左一條嚹。

原來條友懵盛盛，無鎖實個locker就走左去。

我稍微用少少力拉一拉，度門就打開左。

趁無人見到，拿拿臨換佢啲衫上身。



我無Kevin咁高大，佢啲衫喺我身上瞬間變成oversized，連對鞋都大左一個碼，不過都無辦法，家下都要求唔到咁多。

換左衫，我就急急腳逃離現場。

眼見天又黑，肚又餓，我打算返屋企先抖下先，問題係我屋企喺對面海，身無分文嘅我，根本無可能過到海。

偷衫已經好仆街，偷錢就真係做唔到，無計可施之下只好就問人借。

我行出體育館，問經過嘅途人借錢搭車。



唔知係香港人太冷漠定還是我個樣唔夠可憐，問左半個鐘先有一個好心人肯借二十蚊俾我。

喺巴士站等車嘅時候，我忽然覺得唔對路。

呢度係土瓜灣，但我識嘅Veronica明明係住沙田。

大獲！差啲唔記得，Veronica講過佢細個係住紅磡喺土瓜灣讀書，大個先搬去沙田。

我淨係知佢沙田嘅地址，對於佢嘅舊居係一無所知。



咁唔係辦法，我要揾到佢依家嘅地址先得，免得到時想揾都唔知去邊揾。

只但係，紅磡咁大，加上附近一帶我唔熟，又唔知佢依家喺邊，要點樣揾？

就喺我懊惱之際，一個熟悉嘅身影行過，Veronica。

唔洗周圍揾，對方自動出現。

佢咬住珍寶珠，身上一件粉紅色hoodie，下面好似無著褲咁露曬成對腳出嚟，著住一對黃色boot，隱約散發住一股帶mk味嘅青春氣息。

佢朝住體育館方向行去，我快步上前截停：「Veronica！」

「頂！又係你個阿叔？你唔係跟蹤我咁變態下話？」

「Veronica，我地揾個靜啲嘅地方，我有啲緊要事同你講。」



我想拉佢埋一邊傾，點知佢一手fing甩我：「頂你個肺！警告你唔好掂我！再掂我就大嗌『非禮』！ 仲有就係，我唔係叫ver乜嘢ca，唔該唔好再亂嗌！」

「唔會有錯架，你係Veronica，可能依家嘅你未改呢個名。」

好多人讀到大學先改英文名，我諗佢個英文名應該喺大學先改。

我繼續講：「你留心聽住，我個名叫鐘耀輝，喺呢一個moment你可能唔識我，但喺未來嘅2021年，我同你兩個將會結婚，到時我將會係你嘅老公…」

「哈哈哈哈！」

我未講完，對方就大笑出聲：「你係我未來嘅老公？先唔講年紀，你條友又矮又生得柒，你咁嘅樣我會嫁俾你？阿叔，好心你想識女仔都唔揾啲咁憨鳩嘅理由啦，你真係當我kai子咩？哈哈！」

「我唔係亂講，我地將來真喺會結婚，我今次喺2021年時光倒流返嚟，係有一樣好緊要嘅事要同你做。」



「你都癡q線！有病睇醫生啦，咪阻住曬！」Veronica大鬧一句，轉身走人。

我伸手拉住佢，佢真係大嗌「非禮」，吸引曬周圍嘅人望過嚟。

咁都未算，佢仲向後起飛腳，踢中我下面。

「爆蛋」嘅痛楚一瞬間炸裂，痛到我跪左喺地，嚹埋口面掩住jer jer。

Veronica快步行入體育館，我唔敢跟埋去，怕見到Kevin，俾佢發現我偷左佢啲衫褲，咁就大獲。

過左好一陣，下身嘅痛楚先緩緩散去，慶幸嗰腳中得唔算好應，「細佬」仲保得住。

個肚呢個時候有啲餓，發出咕咕聲。

雖然無戴錶，但估計時間都差唔多八點，呢個係我平時食飯嘅鐘數。



手頭上得二十蚊，食個大快活都未必夠錢，只能喺附近士多買個十蚊燒賣，留返十蚊之後搭車。

我咬住燒賣，企喺體育館門外附近，等緊Veronica出嚟。
 
我計劃陣間偷偷地跟住佢返屋企，借此得知佢住嘅地方。