《平行軌跡》: Episode 40 - 無盡 (下)
「夢想，於漆黑裡仍然鏗鏘，仍然大聲高唱，仍然期待世界給我鼓掌…」
「起身！起身起身起身！」Auntie Angel 用力拍打收銀櫃台，喚醒在發白日夢的阿雪。
「啊？係咪午市到喇Auntie Angel？」阿雪意識還是很朦朧。
「唔係呀！妳有朋友嚟咗，快啲同人打聲招呼啦。」茶餐廳側面的卡位坐著傲雲和Windy，兩人面帶微笑看著睡眼惺忪的阿雪。
「咦？你哋做咩會嚟咗嘅？馳名蛋撻啱唔啱食啊？」
「妳一定係唔記得咗今日係咩日子。」雖然傲雲的心情已經好轉，但說話語氣仍然是同一副樣子。
「唔？今日？啊！Auntie Angel！」
「妳啲朋友講晒俾我知喇，我叫醒妳就係叫妳唔好霸住我個收銀機，我仲要收錢呀，快啲去。唔畫返十幅八幅唔好返嚟呀！」
「傲雲叔叔！我想…返屋企換衫先。」阿雪打量著自己的衣著，顯然不太滿意這個收銀員打扮。
「我哋喺度等妳，老闆娘話想我哋試吓特製菠蘿油。」
阿雪急步跑回家，家中的婆婆看見她回來，只做了一個豎起姆指的動作。是妄想，趁現在追趕失散方向，曾懷著心底的信仰，千次萬次跌傷。
她急忙換起之前買下的碎花連身裙，戴上蝴蝶頸鍊，然後在一個像音樂盒的盒子入面找到一只皮製手鐲，上面刻了一些奇怪的紋，裡面還有一張相，應該是她的爸爸和媽媽。
「爸爸，雖然唔知你喺邊。媽媽，雖然妳已經見唔到，但我相信你哋會支持我。」開始不敢回頭尋覓那真相，明日那個幻想，也開始不甘被雕刻成石像。
臨出門前發覺好像欠了一樣東西，唔，是頭髮。
經過多次的打扮，阿雪慢慢掌握她的理想髮型。先是留一點鬢角把耳朵遮蓋起來，然後綁起一個高馬尾，不要忘記用髮夾把瀏海夾起一點點。完成！
她原本想弄一個女神頭，最後左思右想，還是覺得馬尾比較適合自己。
阿雪跟傲雲夫婦到達海傍，這裡有很多檔攤為路過的人影相留念。其實每個人要開檔都是蠻自由的，傲雲介紹阿雪給其他檔攤主人認識，只是為了有什麼事發生起來，她可以有一些照應。
「阿雪，記住，盡量避免幫一啲講普通話或者拖篋嘅人畫人像畫，因為咁樣好危險，知唔知？」
「唔…啊…好啦。」阿雪其實不明所已然。
「好，如果有咩意外發生，再電聯。老婆，果邊好似有表演，不如我哋過去睇吓？」
「好喎，好似話有個天才靚仔會自彈自唱。」
留下來的阿雪便選擇了一個自己喜歡的位置坐下，再放下早前準備好的招牌，吸引路人的眼球，旁邊還放了一張椅子供客人坐下。
事情當然不會這麼順利，阿雪呆坐在這裡一小時，兩小時，還是門可羅雀，無人光顧。
說不會灰心是騙人的，她一直在等，等到夕陽西下，正要放棄準備回家時，她聽到遠處的歌聲。
太多太多構思踫壁，太多太多理想壓抑，沉默對應著歲月無聲，天空尚有片夕陽帶領。
「唔…等多一陣啦。」阿雪被歌聲感動到，決定待多一會兒，懷著信心與希望。
果然皇天不負有心人，她等到了。來者是一男一女，阿雪認識的人不多，偏偏這個時刻她碰到了認識的人。
林憶芊。
Shirley旁邊的人，是楊老師。
「芊芊姐姐？哈哈…又會咁啱嘅？」
「我原本嚟支持我朋友嘅，不過我諗我遲咗…」Shirley的心情依然低沉，阿雪也察覺到異樣。
「唔緊要啦！咁妳當係嚟支持我，妳只要俾我幫妳畫一幅人像畫，就可以成為我第一個客人！嘿嘿…等我免費幫妳畫啦！」阿雪努力掙出雀躍的樣子，希望可以把Shirley的心情帶起，卻多口問了一句：「呢個係妳男朋友？」
「我唔係佢男朋友，而家唔係。」楊老師溫柔地拍一拍Shirley膊頭：「但終有一日我會令呢個變成事實。」
阿雪對這個突如其來的進攻感到愕然，Shirley也怔住了。
「好啦！芊芊姐姐！擺好pose，我開始畫啦。至於先生，你不如行一個圈再返嚟？」阿雪畫人像畫的第二個目的是打聽別人的感情，他感覺到這個男人這一刻不應該在現場，希望可以打發他暫時離開。
「好，半個鐘夠唔夠？」
「夠。陣間再見。」
楊老師便識趣地遠離兩人。
「芊芊姐姐，我幫人畫畫有一個規矩，就係希望被畫嘅人，即係妳，可以講一講妳嘅故事，唔知妳介唔介意呢？」
「我應該要講咩故事丫？」
「嗯…只要係關於妳嘅，妳又覺得好深刻嘅，都可以講俾我知架。」
「咁……好。」
對Shirley來說，阿雪的出現剛好成為一個樹洞，她可以毫不避忌地把幾個月來的煩惱訴說出來。阿雪聽得出Shirley對自己的感情還很有留戀，即使她的表情顯得非常低落，阿雪還是嘗試把她的樣子畫得開心，希望她看到這幅人像的時候可以心情好轉。
「嘩…好靚丫…」由衷的笑容，由看見人像畫一刻開始。
「芊芊姐姐，加油啊！」
「阿雪，多謝妳丫。」Shirley把阿雪抱入懷中。
「哈哈…芊芊姐姐，阿雪支持妳！」
「嘩…乜妳哋畫畫畫到攬埋一舊呀。」楊老師準到回來，看到兩人擁抱的場面。
「呢個係我對客人嘅禮儀，而家將芊芊姐姐交返俾你啦。」阿雪畫過第一幅後，眼神堅定起來。對自己的生意滿懷信心。另一方面，她不知道這個楊老師對Shirley怎樣，只認為Shirley需要有人陪伴，他不失為一個選擇。
「好啦…阿雪，再見啦。祝妳成功丫。」Shirley對阿雪露出近期罕有的微笑。
阿雪望著二人離去，天色也漸次變黑，她準備收拾行裝回家，此時，一名戴著深綠色鴨咀帽，衣著走悠閒路線的男子步近：「妳好，妳就係紫月小姐？」
「你…？」
（請期待第二季！來Facebook留個言吧。）