《平行軌跡》: Episode 38 - 兩大無猜

阿杰懷著焦急的心情坐上的士，雖然不知道發生了什麼事情，心裡也不多不少有點惱怒Yuki，但當他到達小郎家後，Yuki撲向他痛哭的一刻，他看見Yuki那副哭得不似人形的樣子，便心軟起來。誰管幾歲，何必得我允許？請詐嬌如果需要淘氣地哭泣不要忍了。
 
「妹？咩事呀？阿哥喺度，有咩事阿哥都幫妳擋住。」眼見Yuki仍然失控地痛哭，阿杰便看著小郎，尋求一些線索，才又發現原來Shirley也在房中崩潰了。
 
「搞咩呀？」阿杰沒有出聲，只用誇張的口部動作問小郎。
 
「我都唔知呀，我去安慰芊芊姐姐，你搞掂自己個妹佢。」小郎還有加上一些肢體語言，才順利表達到自己的意思。
 
大廳只剩下兄妹二人，Yuki哭夠了，乘勢大力一口咬在阿杰的手臂。
 




「嘩！好痛！好痛！好鬼痛！」阿杰痛得猛將手臂揮動。
 
「阿哥你真係好鬼肉麻，咩嘢有咩事都幫我擋呀。」躲在哥哥的懷中，Yuki破涕為笑。
 
寧願跟妳留在能任性的世界，傻得不怕死。無須講理，仍似大哥哥般抱起妳。
 
「妳第一日有呢個阿哥咩？肉麻係我嘅做人宗旨，係我不可分割的一部份。」阿杰表露出一個非常自豪的態度：「點呀衰妹？今次又衰咩呀？」
 
「你哋啲男人無個好人！」Yuki突然怒目而視。
 




「呢個指控非常嚴重，我有必要嚴正對待。」阿杰平生不作虧心事，無端的指控讓他認真起來。
 
「個賤人原來一路只係諗住搞我！之前扮到風度翩翩咁只係引誘我！」Yuki拿著攬枕大力拍打。
 
「妳有無事呀？有無覺得邊度痛？我駛唔駛幫妳報警？」阿杰有點不知所措。
 
「無事啦梗係！我似咁容易出事咩？只好怪自己唔帶眼識人！」
 
「Vincent…Vincent 佢都係咁……？」Shirley落寞地從房間步出。
 




「Shirley？個死仔平時雖然係賤咗啲，但佢係點嘅人妳一定好清楚，我亦都可以人頭保証！」
 
「嗯…嗯…嗯…」心力交瘁的她撥了一個電話：「楊老師……你贏咗……」
 
輕聲說過這兩句後，又慢慢離開小郎的家。
 
「芊芊姐姐，妳記得下個禮拜嚟捧阿杰場呀！」小郎興奮地從房間跑出並叫喊，Shirley好像聽到了，但沒有特別表示。
 
「捧我場？我有咩做呀？無啦啦做咩捧我場？」阿杰一時間很迷茫。
 
「嘿……喺你不知情嘅情況之下，我已經幫你接咗個job啦！`嚟緊個星期日就係你處女show嘅大日子！」
 
「嘩……真係多謝妳……仲要咁鬼快就到，完全唔考慮吓我究竟準備好未。」與此同時，阿杰又感到一股閃亮的視線。
 
「哥……」似是期待又似是興奮的奸笑顯露在Yuki的面容上。




 
「妳有時間咪嚟囉，我都阻唔到妳嘅，點架妳，喊喊下突然間又咁開心，都完全唔連戲嘅。」
 
「嗨，咁發洩完之開心返架啦嘛，何況我有個咁好嘅阿哥照顧我，仲有咩好唔開心喎。就算有咩事你都會保護我嘅，攬攬。」可愛的抱緊你的天真情懷，懂世故不必太快，可記得無忌無慮赤腳走天涯？沒成長也沒壞。
 
阿杰被攬得呼吸困難，幾經辛苦掙脫：「咁點呀衰妹？係咪跟我返屋企？」
 
「唔…可唔可以喺度住多陣先？」Yuki露出一副尷尬的樣子。
 
「呢個問題唔應該問我…妳阻到嘅係另有其人囉。」阿杰忪一忪肩，望一望小郎。
 
「我梗係歡迎啦！唔係Yuki陪我我可能悶死咗啦！一於住多一排先！」小郎二話不說撲向Yuki，二人抱得緊緊的。
 
「唉…無妳哋乎，阿爸阿媽果邊我會同佢哋講返，等佢哋唔駛咁擔心。」阿杰無奈地搖搖頭：「妳真係無事啦嘛？」
 




「蠢大佬，就算有唔開心我講完你都唔明架啦，咁你明點解我要留喺度啦？」實際上，Yuki的心情只因為阿杰的出現而好轉了一會兒，她也知道自己需要多一點時間去平伏。
 
「咁妳叫我嚟做咩架小郎？」阿杰臉上寫上了不滿兩個字。
 
「哎呀，咁頭先同一時間要處理兩個人我真係搞唔掂嘛！妳個妹而家就交俾我啦！」
 
「係喎，頭先Shirley做咩事又喊得咁犀利？」
 
「我都唔係好知…Yuki返到嚟講咗幾句之後，佢都跟住一齊喊，但係佢喊完一輪，只係自己匿埋，咁我跟埋入去，佢都係唔出聲咁樣，直到頭先突然間走咗去囉。我諗佢無事嘅，放心啦。」
 
「唉…我走先啦，衰妹記得快啲返嚟呀。」
 
「知喇哥你快啲走啦，仲有快啲睇下你朋友有無事呀。」現場情況有如Yuki小郎二人站在同一陣線要抵抗外敵一樣。
 
「得啦我有分數。」




 
一離開家門口，阿杰急不及待拿出電話找Shirley，想了一想，還是傳一個訊息比較好。
 
「妳要相信Vincent。」
 
（Next：Episode 39 - 無盡空虛）