《平行軌跡》: Episode 29 - Shall we talk？

「不愧係杰少！係你先搞得掂壇嘢！」
 
「講埋晒啲衰嘢，快啲執埋啲嘢快手收工好過啦。」阿杰伸了伸懶腰，望了望電話的時鐘，原來已經是晚上十時半。
 
「咁我走先喇！Happy Weekend！」
 
「大家咁話啦。」經過一場腦汁大考驗後，阿杰腦袋空空，趴在枱上稍事休息，還巴不得現在就睡一覺。
 
「I can't write simple love songs…Just can't write simple love songs」
 




電話鈴聲在這個最不恰當的時間響起。
 
「嘿！又係我呀！今日練咩歌呢？」彼方傳來的是小郎的聲音，自從她重遇阿杰之後，經常都會致電給他，尤其是阿杰重新拾起結他後。
 
「我啱啱收工咋，練鬼練馬咩。」
 
「嘩……成十一點都嚟喇喎，乜鬼嘢工嚟架，快啲辭職啦。」
 
「我都想呀……妳估好似妳咁唔駛做咩……話時話，究竟妳讀完書未？點解妳會返咗嚟？妳係咪真係日日都喺度游手好閒無嘢做？妳知唔知咁樣好易變廢青？」
 




「哎呀哎呀哎呀，你呢個一輪咀問嘢嘅習慣幾時先肯改架，我都唔知答得你邊樣。你自己都未理掂唔好理我啦。」
 
「我覺得呢個人相當可疑，果邊而家又唔係暑假，妳無理由會得閒走返嚟嘅，快啲從實招來！」
 
「……我輕鬆畢咗業啦！其實你重新向你嘅夢想踏出第一步，咁咪唔駛返工囉！」
 
「妳……唉……妳真係不食人間煙火。我仲有老豆老母阿妹要養架。」
 
「嘻……唔好意思……」小郎一家屬小康中產，有自置物業安定居所，而且小郎是家中孻女，萬千寵愛在一身，所以對養家的概念很模糊。
 




「好鬼攰，遲啲再講，Bye。」
 
「哦……再見。」
 
這種時間下班，阿杰喜歡乘坐巴士回家，因為在這個站，他必定能在上層找到一個位置讓他好好休息。不像乘搭鐵路一般，多半沒有位置可以坐，就算有位置空著，坐下去還要擔心被人拍下睡姿放上互聯網，被人批評他不讓座。故此，今天阿杰跟往常一樣，乘坐巴士安心休息到總站。
 
晚上十一時半，總算回家了，還有半小時可以洗個澡才到十二時，真好，阿杰這樣樂天地想。
 
「衰女包！你走，你試吓走！你走咗以後唔好返嚟！」這股怒氣沖沖的聲音，來自阿杰的父親。
 
「我而家就走！你咪唔好理我囉！」只見Yuki正在執拾一些衣物，似乎真的要離家出走。
 
「喂……你哋……可唔可以話俾我知發生咩事？仲有，可唔可以唔好咁嘈？阿媽要訓架。阿妹，有咩事唔可以慢慢傾？」一打開門便是父女爭拗，讓阿杰一頭霧水。
 
「個衰女，俾我捉到佢同個男仔喺樓下咿挹，都唔知果個乜嘢人嚟！都唔知會唔會俾人呃！讀書就讀書啦學乜人拍拖呀！」




 
「我拍拖又輪唔輪到你理呀？」剛剛整理好衣物，Yuki大力反擊，又轉身推開阿杰，奪門而出：「阿哥，唔好阻住我。」
 
阿杰來不及反應，就被推到旁邊，目送Yuki出門口。回過神來，才定睛用凌厲的眼神注視父親：「老豆，你抖下先唔好追出嚟，我陣間再同你講，但你唔好以為我哋咩都唔知。」
 
沒有等父親的反應，阿杰就飛奔追趕Yuki。在升降機大堂，Yuki還在等升降機，便被阿杰拉到一旁談話。
 
「妹，究竟咩事？」雖然從剛才的對話中令阿杰略知一二，他還是想聽聽Yuki的想法。
 
「咁我男朋友送我返屋企，我唔捨得佢咪要佢喺樓下陪多我一陣囉，輪唔輪到佢管我呀？而家又唔係啲大件事，會唔會係咁緊張呀？就算係呀，都唔到佢緊張囉。」Yuki激動得淚水四濺。只道孩童只盼望歡樂，大人只知道期望，為何都不大懂得體恤對方？
 
「咦？妳幾時識咗個男朋友？幾時識架？點解連我都唔知嘅？有無相？無相無真相喎。」嗯……重點好像不在這邊。算罷，阿杰就是喜歡問這問那。
 
「嗱，星期一識架。係咪型仔過你幾百倍呢。嘿嘿。」一談起男朋友，她便立刻破涕為笑，又展示電話的待機畫面讓阿杰看。
 




「哎…」阿杰被Yuki的答案弄得語塞起來，一時間不懂反應。
 
「你係咪又想叫我同佢分手？係嘅話你可以返去先，我自己搞得掂。」看到阿杰的猶豫，Yuki立時把對方的潛在要求封掉，這方面有點像她的哥哥。
 
「唔……的確對我嚟講係有點難以相信，但唔代表我就唔會接受。之但係……妳又諗住走去邊呢？」出乎Yuki的意料，阿杰的反應很平靜，不像二人父親般激動。
 
「嗯……其實我都未諗，哈哈，男朋友屋企卦。」Yuki嬉皮笑臉地說。
 
「咁樣……我諗我就算阻妳都只會俾妳鬧返轉頭，但係妳都知妳咁講我一定會擔心。一係咁，我問吓我朋友睇吓佢可唔可以收留住妳先，咁得唔得？」
 
「又好，但佢會唔會唔歡迎我架？返學遠唔遠架？我朝早要揾我男朋友一齊搭車架喎。」這種一輪咀問問題的習慣，恐怕也是因為近朱者赤，近墨者黑，被阿杰潛移默化。
 
「死妹釘，佢住喺附近架咋。妳睇妳發仔瘟發到。」阿杰拿出電話傳了一個訊息，又以不屑的眼神盯著Yuki。
 
「好嘢！阿哥萬歲！」




 
「阿妹，我明白，每個人都有反叛期，所以妳想點，我都會尊重。唔知妳記唔記得，我讀中學果陣都曾經有段時間經常好夜先返屋企？」
 
「我知，你要練歌嘛。」
 
「一來啦，但係練歌鬼練到咁耐咩，好多時我好夜返屋企，其實都係因為覺得阿媽好煩，諗住等佢瞓著先返屋企。」明月光，為何又照地堂，寧願在公園躲藏不想喝湯，任由目光，留在漫畫一角，為何望母親一眼就如罰留堂。
 
「記得，果陣你仲成日同老豆嘈，你哋個個好似覺得我咩都聽唔到咁成鬼日嘈到拆天。」Yuki回想起當日難以入眠的一段日子：「不過後來突然間好似無啦啦又無事咁……呀！唔通係因為……」
 
「可能就係果日見到老豆咁樣……我覺得阿媽好慘，所以之後都乖乖地聽阿媽話，反叛期可能就咁就完咗。」
 
「其實我都唔明，點解我哋一路都要扮唔知姐？」
 
「嗯……所以今晚都時候要同老豆講講呢單嘢。」此時，阿杰電話傳來震動，他掃一掃後，又道：「搞掂，我而家send個地址俾妳，妳去到揾小郎就ok架喇。」
 




「阿哥，多謝你。」Yuki又露出阿杰最怕的亮晶晶雙眼。
 
「得喇得喇，唔好咁樣望住我，好唔自在。」阿杰用手掩眼以防自己看到那對閃亮的眼睛：「不過，記住記住，有咩事，要即刻打俾我。阿哥一定會保護妳，知唔知？」
 
「好鬼肉麻呀你，我走啦。」
 
「阿妹，我等妳返嚟睇我表演呀。」
 
「真係？聽住先啦，唔會咁易俾你引誘到嘅。嘿嘿。」
 
「唔好住咁耐呀，阻到人呀。」
 
就這樣，阿杰目送Yuki入升降機，一轉身，便看見父親在遠處的家門口抽煙，似是等待著阿杰的交代。
 
「放心啦，阿妹會去我朋友度暫住，佢都係女仔嚟。其實佢要拍拖咪由得佢囉，無事嘅，唔需要咁勞氣。」兩人倚傍著走廊旁邊的欄柵，看著走廊外的風景，這一種設計是某部份舊式公屋的特式。
 
「衰仔，係識幫住個衰女。我同你講，佢今晚走得就預咗以後唔駛旨意再返嚟。」
 
「老豆……其實我知道你出面有第二個女人。」阿杰不再兜圈，直入正題。
 
只見父親深深吸了一口煙，倒抽了一口涼氣，細妹的事，似乎要暫時擱置，然後鎮定地回應：「咁又點？果日我又點會見唔到你哋呢……」
 
「我理唔到咁多，我只係覺得，你根本無資格去管我同阿妹咁多。」
 
「咁點解你哋唔話俾阿媽知？」
 
「我哋……我哋唔想頭家散，我哋比你只會更加驚，更加驚阿媽會知道呢件事，唔知佢會點。」
 
又是一大口煙，大得只不過是兩口煙，就將那支煙由完整變成煙蒂。
 
「放心啦，個女人……我摵甩咗好耐。」
 
「真係……？」
 
「見過鬼仲唔怕黑咩？你兩個可以撞到我，你哋阿媽一樣有機會，到時咪又係搞唔掂。阿仔，記住一樣嘢，逢場作戲勿認真。」
 
「咁得啦，對阿媽好啲，阿妹嘅事我會同阿媽解釋，我叫咗阿妹唔好走咁耐，一人讓一步，OK？。」既然父親已經承認而且表示拋棄了對方，阿杰覺得再糾纏下去也沒有意思，而且自從那一天起，跟父親的關係也不大好，沒有什麼好說，便打算轉身就走回家。
 
「衰仔，企喺度，難得兩仔爺有傾偈，點會咁易俾你走？」陪我講，陪我講出我們最後何以生疏，誰怕講，誰會可悲得過孤獨探戈？難得可以同坐，何以要忌違赤裸？如果心聲真有療效，誰怕暴露更多，你別怕我。
 
「……我哋有咩好傾？」正當阿杰想挪開父親疊著自己膊頭的手，又看到面前多了一張面額可觀的支票：「……？」
 
「俾你架衰仔，拎住佢。」
 
「掩口費？收買我？我係咁容易收買嘅咩？」
 
「死仔包……你又覺得我會唔知你想做啲乜？見到你成日開工開到咁夜，想拎支結他出嚟練多陣都唔得個樣就覺得你肉酸。」
 
「……」明月光，為何未照地堂，孩兒在公司很忙不需喝湯……and shall we talk，斜陽白趕一趟，沉默令我聽得見葉兒聲聲降。
 
「俾吓反應呀衰仔。」然後一個鐵搥轟在阿杰的頭頂。
 
「老豆……點解你可以收埋咁多錢？你係咪做咗啲咩非法勾當？我係咪應該報警？」
 
「發咩神經呀你，辛辛苦苦儲好耐先儲到返嚟架。」
 
「估唔到……原來公屋仔都可以成功需父幹。」望著那張支票，阿杰不禁輕嘆：「其實唔駛喎老豆，我而家呢份工都幾好架，而且就算我真係辭職，都唔應該洗你啲錢，你袋返佢。」
 
「放屁！唔通你啲夢想志願全部都假嘅咩？唔好再呃自己啦。我哋兩老唔駛你擔心，我會搞得掂，你要追夢嘅就即管去啦！我哋會放長雙眼睇落去。」
 
「老豆……」阿杰熱淚盈眶，打算要跟父親來個大擁抱。
 
「你唔好呀你，點解我生個仔會咁鬼肉麻架。」父親見狀拔腿就跑，開門逃回家中，開門期間：「肉麻仔，我等你作返首歌頌親恩呀。」
 
「…有咁肉麻嘅老豆，就有咁肉麻嘅仔囉好唔好？」
 
「很想結局完美，付出不依正比，最尾卻被掉棄……」
 
「Shirley？又會呢個時候打嚟嘅？」阿杰正要踏進家門的時候，電話鈴聲又再響起，便又退出屋外，避免聲音騷擾到睡夢正酣的母親。
 
「阿……你……幫我……丫？」電話彼方的電視聲，把Shirley的聲音完全覆蓋。
 
「妳個電視好大聲，可否較細少少我完全聽唔到妳講乜。」
 
「唔好意思丫，啱啱睇緊個節目好好笑，哈哈哈哈……阿杰，妳可唔可以幫我俾返把遮Vincent丫？」螢幕發光，無論什麼都看，情人在分手邊緣……
 
「唔？哦……好。」阿杰第一個反應是感到突兀，思考過後，還是答應了要求：「仲有無嘢幫到妳？」
 
「無喇，唔該你，Bye Bye。哈哈哈哈…」笑聲來得有點造作，阿杰聽下去……總有種以笑遮蓋另一種情感的感覺。
 
「唉，Vincent呀Vincent，搞乜嘢呀。」收線的一刻，阿杰又立即致電給Vincent。
 
「馬建鋒，你把遮過兩日會喺我度，麻煩你得閒嚟拎返。仲有，唔該你兩個搞清楚，你兩個究竟發生咩事，你兩個究竟想點。」
 
「……」Vincent沒有回應，只傳來一些電視對白。若沉默似金，還談什麼戀愛？寧願在發聲機器面前笑著忙。
 
「呢樣嘢就算兄弟都幫你唔到，你既然已經決定唔撈而家份工，應該好得閒可以氹人哋架啦。」以阿杰所知，Vincent是主動辭職的，那麼他究竟是被炒，還是主動辭職？
 
「……得啦，我遲啲揾你拎返。」Vincent像是刻意的把自己的聲音壓低，使阿杰只能勉強聽到。
 
「記得我講過咩呀，熊貓呀。」成人只寄望收獲，情人只聽見承諾，為何都不大懂得努力珍惜對方？
 
理所當然，阿杰的下場是得到一個無情的收線。
 
「可惡，死仔又係咁。」
 
充滿突發事情的一晚，令阿杰思緒不能平伏，在門外獨個兒發呆了好一會兒。在充滿蟋蟀啷啷叫的伴奏下，又拿出電話，看著前度的名字，才發覺自己對這個名字開始感到陌生，難過的感覺，好像不再濃烈了。他將手指指向刪除鍵，確定？確定。
 
（Episode 30 - 那邊見）