《平行軌跡》: Episode 25 - 扯線風箏
現代的風箏是一種玩具，用竹篾統成不同形狀的骨架，鋪上一層層的紙，尾部系著一條線，順著風勢就可以自由自在地在天空上飛翔……不，一點也不自由自在，人類放風箏的時候，往往會將尾部的線捉緊，讓風箏隨自己希望的方向飛，風箏的走向，完全是人為控制下的結果。
怕，你不再著緊。怕，你討厭被綁緊。為了討好你，我不禁讓我那腦細胞犧牲。
「楊老師？你尋晚揾我有事？」Shirley在街上漫步，剛剛才發現昨晚有多個Missed Call。
「林老師，見妳最近好似唔係太開心，想同妳傾下偈，睇吓可唔可以開解吓妳。」楊老師的聲音很有磁性，聲線有點像電台常常聽到的某個音樂節目主持。
「我無嘢丫，有心，唔同妳講住喇我有嘢做緊。」字裡行間滲出一種獻殷勤的味道，讓Shirley下意識作一個理由收線。
「好……如果妳有事，我隨時樂意傾聽。」即便如此，楊老師保持著文質彬彬的態度。
Shirley悶悶不樂，並沒有在意對方說了什麼，只在絞盡腦汁思考，怎樣逗Vincent歡喜。
「就係咁簡單？」
「第一次懲罰無需要咁Harsh丫。」
「嗱，士多啤梨味孖條。」
「呢支你嘅。」
「咁好？不過我已經有杯雲呢拿雪糕，心領。」
「咁丫，我咬！」
以上是第一次捉鬼遊戲的懲罰。
然後是第二次…
「乜妳咁鬼為食架，上次食完雪條呢次又食雞蛋仔。」
「係架，仲要十種味道添丫！」
「玩嘢咩，邊有咁多味道架，點俾妳呀。」
「呢個就要你自己用吓腦喇，最多俾三日時間你諗啦。」
結果，三日後Shirley真的收到一底雞蛋仔，在那三十粒雞蛋仔入面，真的分佈著十種不同味道，有士多啤梨、朱古力、芝麻、芒果、菠蘿、橙、芋頭、綠茶、紅豆甚至咖喱味，每種味道各有三粒，更是分散分佈在整塊雞蛋仔。一口酸，一口甜，一口甘，一口辣，彷如一種新食物。
想起當年的雞蛋仔，Shirley登時甜在心頭：「唔知個傻佬喺邊度揾嘅呢？」
「芊芊姐姐！」正在街道邊畫畫的阿雪，瞥見Shirley遂忍不住大喊。
Shirley往四周張望，找不著是誰在叫自己，直至看到阿雪在猛然揮手：「呢邊呀芊芊姐姐！」
「妳係…阿雪？」畢竟只是萍水相逢，Shirley花了一些時間才認得阿雪。
「哈哈…我仲以為妳唔認得我添。」阿雪害羞地抓抓頭皮。
「我真係諗咗一陣架，妳……有少少唔同咗。」Shirley也走到阿雪方邊坐下，看她畫的畫。
「妳又咁覺得？但係我自己睇唔出有咩唔同咗。」對於有點不同了這個評價，阿雪還是摸不著頭腦。
「嗯…氣質嘅嘢察唔察覺到係好主觀嘅，睇唔出都唔出奇架。」相信Yuki也同樣感覺到，今天阿雪散發出的味道，比起過往更有吸引力。這種味道，不是單靠衣著打扮就能改變得到。其實，心情的影響更大，看看阿雪的畫就能明白了。
「咦？妳啲漫畫好靚喎，呢個男仔咩人嚟架，做咩成日出現但係無樣嘅？」Shirley拿起阿雪的畫，看到經常被阿雪以借位等方式迴避了男主角的正面。
「哎…因為呢排我成日發夢果陣…都會夢見一個無樣嘅白馬王子架，但係對佢嘅印象又好深刻喎，唯有咁樣畫住先啦。」由遊行那天的結他救世者，到某天的白馬王子夢，再結合阿雪從小就傾慕的神秘結他學生，甚至今天畫的獻歌給中年男子的表演者，反映出阿雪對某人的傾慕。可惜，阿雪對此人從來都沒有清晰印象。
「咁得意…希望妳快啲揾到妳個白馬王子啦！俾返妳先。」不料此時卻突然刮起狂風，二人沒有拿緊那些畫紙，順著風的方向，就如斷線風箏一般飛走，一些飛得較慢的紙，隨著風勢減弱，在附近跌在地上，飛得較快的，就不知到了哪兒。當Shirley準備幫阿雪找回遠去的畫紙，卻被阿雪抓住。
「芊芊姐姐，唔使揾啦，我成日都會唔小心搞到啲畫飛走晒或者唔見咗架，初頭都會走去揾返，到後來就覺得……佢哋要飛走都無辦法啦，可能俾有緣人睇到，多啲人欣賞呢……而我又有藉口俾自己再畫過，哈哈，係咪好傻？」這個看似很蠢的說法卻令Shirley內心不禁一涼。要走的，始終要走？
隨著你鬆與緊，彷似扯線風箏，連動作跟氣氛，都要聽你指引，如若斷線不牽引，突然滑落怎偷生？
與此同時，阿雪的電話鈴聲響起。
「如歸家的一刻 再沒南瓜車 就靠這一雙腿 散步返宿舍」
「芊芊姐姐，我聽電話先。」
Shirley一時感觸，遂對阿雪作了個再見的手勢，轉身行不了兩步，便忍著嗚咽撥電話。
「你打嘅電話暫時未能接通，請你遲啲再打過嚟啦。」
突然很想念Vincent，卻又發覺昨晚對方才利用互聯網告知自己電話壞了的消息，正要在今天見客後去修理。行著行著，聽到讓人舒暢的悠揚歌聲及結他聲。
「演奏完畢。」外加一個鞠躬。
「咦？Shirley，妳又喺度嘅？妳唔會…又係嚟捧我場卦？又得妳一個？」阿杰感到有點尷尬，也意外Shirley的出現。
「嗯，其實呢，係小郎叫我嚟架。我呢兩日都無見Vincent丫…佢今日又要見客…」。
「Okay…又係妳，妳哋好似尋晚先認識咋喎，有無搞錯。」阿杰視線轉到小郎，小郎只報以一個吐舌：「唔係喎，尋晚我哋撞到妳之後，又撞到Vincent，佢又好緊張咁揾妳架喎，我仲以為妳兩個又玩緊中學果陣果個乜鬼嘢捉鬼遊戲添。」
「無見過佢喎……」聽到這個消息，Shirley既喜又悲，喜是因為Vincent仍然著緊自己，悲則是既然緊張自己又為何不告訴自己？
「個死仔電話又打唔通。」阿杰顯然不知Vincent電話壞了，便立刻拿起電話打給Vincent，當然同樣是未能接通。
「阿杰，我問你一樣嘢丫，Vincent中學果陣呢，有無問過你關於十種味道嘅雞蛋仔？」阿杰說起捉鬼遊戲，正好令Shirley想起自己的疑惑。既然Vincent是阿杰的死黨，那麼他大有可能問過對方意見。
「十味雞蛋仔？雞蛋仔……我記得啦！條友仔有一次問樓下小食店阿叔借咗啲整雞蛋仔嘅爐嚟用，又叫個師傅教佢，仲拉埋我去幫佢手整喎。條友都痴線嘅，十種味道仲要分散咁落，又要快手又要唔好倒瀉，足足整咗兩日兩夜！人都癲！」很狂野的舉動，可能也只有中學時期才有這份衝動。
「原來……係自己整架？」Shirley又吃驚又感動。
「係呀，我諗佢都係整俾妳食架啦？條友果然係有異性無人性。」雖然口裡經常吐出類似的埋怨，其實阿杰並沒有絲毫怪責Vincent的意思。
Shirley突然情深款款地盯著阿杰，阿杰也意會到她的意思：「妳諗咩呀？嗱，妳唔好呀，我唔會理妳架。」
「嚟啦幫我啦，你都幫過佢整架嘛，而家幫埋我都好合理姐，話晒我都係校花喎，妳係咪應該要聽我話呢？」Shirley決定有樣學樣，給Vincent準備一底雞蛋仔作驚喜。
「我又幫手我又幫手！」這個雞蛋仔計劃令小郎為之雀躍，攘著要參加。
「好！首先要揾爐！唔知邊度有呢？」恐怕這是製作雞蛋仔的最大難題。
「我舖頭有喎，唔知幾位有無興趣使用咁呢？我果度仲有材料提供添。」剛才去了買可樂的木盒大叔適時出現。
「呢位係……」Shirley對木盒大叔的介入感到驚訝。
「唔駛咁緊張，佢兩個係我恩人，佢哋朋友我梗係要幫一把啦。係咪咁講呀小兄弟？」木盒大叔把兩支可樂分別遞給阿杰和小郎。
「大叔，究竟你喺度聽咗幾耐……點解你好似好清楚發生咩事咁架。」阿杰接過可樂，沒神沒氣地問。
「呵呵，一早就喺度啦，你無發覺姐。係咪呀小姐？」木盒大叔瞧著小郎道。
「係呀係呀，佢有聽你唱歌架低能仔。」小郎瞪著大眼好像很純真地望著阿杰。
「唔好講咁多喇快啲行喇。叔叔你帶路！」Shirley急不及待就要進行她的大計。
「呢班人痴線架……救命呀……」即使阿杰叫苦連天，在這裡已經沒有人幫到他了。
（Episode 26 - 冷雨夜）