《平行軌跡》: Episode 21 - 十面埋伏

某年春夏交替之間，Vincent和Shirley仍然是中學生。
 
「呵，又捉到你喇。」在地鐵某一個站的月台椅子上，身穿夏季純白校服裙配上冷衫的Shirley從後拍拍同是穿著冬季長袖校服的Vincent膊頭。
 
「有無搞錯呀又係妳贏，妳出貓！」Vincent裝作很不服氣的樣子。
 
「呵，我有特別嘅追縱技巧，就絕對唔係出貓。」右手叉著腰，左手撥一撥秀髮，即便是中學時期，Shirley就已經明艷照人，是學校的校花。
 
「再嚟過！今次我捉妳先！」
 




「唔得丫，夜喇我要返屋企喇，呢度同屋企又天南地北。」
 
「咁樣…我送妳啦。」
 
「扮嘢啦你，明明你就住我隔離街。唔好以為咁就做咗個懲罰丫。」Shirley毫不留情地搣Vincent的臉。
 
「哎…請問有咩吩咐？」
 
………
 




當年，車廂空無一人，簡直可以讓人翻筋斗而不影響他人。
 
今日，車廂擠迫得連站也覺得困難，Vincent看著無論按什麼鍵都是空白畫面的電話，深深嘆了一口氣：「無端端走嚟壞電話……」
 
心情壞透又無所事事，唯有在狹窄的車廂環境閉上目入神。
 
「可惡，阿杰個死仔又匿埋練歌賣甩我哋，喂，悶悶哋不如我同妳玩個遊戲？」
 
「講嚟聽吓等本小姐考慮吓。」炎炎夏日，Shirley正吃著雪條，吃得津津有味。
 




「嗱，我哋而家就等緊車啦，呢度就藍色線，妳就上跟住嚟果班車，我就再等多兩班車，期間妳就喺呢條藍色線入面其中一個站度揀一個喺月台嘅位置，睇吓我要用幾多時間先揾到妳。」
 
「聽落都幾得意，但係如果你一直都揾唔到我，我咪唔駛返屋企？仲有，輸咗係咪應該要有懲罰呢？」
 
「咁啦…時間就限定一個鐘，如果我都係揾唔到妳嘅，我哋再喺我哋原本落車返屋企個站集合。仲有個條件，我隨時都可以打俾妳問tips，妳唔可以唔聽架喎。輸咗果個要受罰架。」
 
「咁丫，咦，有車喇喎，有緣再見～」Shirley帶著輕盈的步姿，隨著列車從Vincent的眼前徐徐變小。
 
兩班車後，Vincent也上了車，他根據Shirley的喜好、興趣找了不同的站，卻尋遍不獲，又因為要面子的關係，一次也沒有致電Shirley。最終，在回家的站甫一下車，就被敲了敲頭。
 
「傻佬！」Shirley的身影展現在Vincent的眼簾，原來她一直在這裡，是二人平時放學習慣乘坐的第三卡。可能正因為是慣常的地點，Vincent反而沒有前往。
 
沒想到，從那天起Shirley竟然喜歡上這遊戲，經常在放學時攘著Vincent要玩，Vincent當然也樂於奉陪，結果兩人經常放學後「行孖咇」，令Vincent頃刻成為全校男性師生的公敵，當然，男性當中並不包括阿杰。Vincent和Shirley兩人對閒言閒語皆不以為然，認為他人的眼光都只是一些愚昧的想法，在不影響自己的生常生活下，根本沒有需要理會，加上身處Vincent身邊，Shirley更有效防止有盲頭烏蠅騷擾自己。
 
漸漸，藍色線已經滿足不了兩人，他們決定每一次開始遊戲前都先畫鬼腳決定遊戲在藍色線、紅色線、紫色線還是綠色線進行。可是，每一次Vincent做鬼都找不到Shirley，而Shirley做鬼的時候，與其說是她找到Vincent，不如說是Vincent刻意被捉。不管怎樣，在兩人中學畢業之前，紀錄是九十九比零，Shirley一面倒的勝利。




 
「嘿，又係我贏喎。」「傻佬，呢度丫。」「你咁蠢架。」「笨～蛋～」
 
由於輸掉遊戲的一方需要答應勝方的一個要求，Vincent受的懲罰很多元化，由簡單的買糖、拿書包，到請吃飯、請看電影，甚至教踏單車、教溜冰等等等等。也許是Vincent掌握到Shirley的心理，實際上同樣是獻殷勤，但透過輸掉遊戲，卻比直接利益輸送容易接受得多，至少，Shirley對其他人眼尾也不望一次，卻願意跟Vincent玩遊戲。
 
「Shi…搞乜無端端會諗起以前嘅嘢…」回過神來，Vincent才發現自己在回家的路途上遊鐵河，來不知不覺間來到一個平常不會到的站。
 
「馬建鋒同學，你喺度做乜嘢？」Vincent的背後是意圖把聲音裝作中學老師的阿杰。
 
「李櫻杰，你都唔識扮聲就唔好搞咁多花臣啦。」Vincent一轉身，便看見一身白色禮服的阿杰和身穿長裙晚裝的小郎：「咦咦？著到咁四正仲咁快有新女都唔講俾兄弟知呀？」
 
「哎…說來話長…呢個咪小郎囉，你口中果個瘋狂fans呀…」發生太多事，阿杰一時間解釋不了。
 
「嘩嘩嘩…女大十八變喎，完全唔同晒呀，果然識將最好嘅果實留俾自己食呀農夫先生。」女大十八變，源於小郎以前是個近二百磅的肥妹，現在竟然變成一個模特兒身型。
 




「講乜嘢呀你…話時話你同Shirley做咩事前後腳？咁有情趣又喺度玩果啲咩鐵路捉鬼遊戲呀？」
 
「吓？你見到Shirley？佢喺邊呀？」聽到這個消息，Vincent立時緊張起來。
 
「對面月台囉，你條友仔咁緊張又唔打電話俾人？」
 
「唔同你講住。」阿杰二人聽到這句句子的同時，看見Vincent火箭般飛走。
 
走過對面月台，他看到一個衣著打扮髮型高度都跟Shirley相像的人正走進列車，便二話不說跟隨進入車廂。車要開了，他猛然在車廂搜索，卻找不到要找的人。
 
難道是只差一點點即可以再會面？可惜偏偏剛剛擦過，十面埋伏過，孤單感更赤裸？
 
列車開走，稍瞬即逝的一刻，Vincent從列車玻璃望向月台，竟然瞥見真正的Shirley錯過這一班列車。
 
遲兩秒，搭上地下鐵，能與妳碰上麼？是命運弄人嗎？是天都幫妳去躲，躲開不見我？




 
他立刻拿出褲袋的電話亂按一通，冀望有一個隱藏按鍵能夠令電話死而復生。可能Vincent是因為最近工作太忙碌，或是電話壞掉令他沒有發現，使他跟Shirley近一個星期極少接觸，不單是沒有見面，是連電話，甚至是電子訊息來往都寥寥可數，是他渾然不自覺？還是他不再緊張對方？然而此刻擦身而過，又驟然感覺遺失了什麼而悔恨不已。此時此刻的Vincent，會否已經養成病態？
 
（Next：Episode 22 - 幾分鐘的約會）