《平行軌跡》: Episode 9 - 二人世界盃

「今屆世界盃喺巴西呢個足球王國舉行，可以話係特別有另一番意義…」今天晚上，因應舉世觸目的盛事，平時已經關門的茶餐廳內，電視機正播放著世界盃的直播節目，現在變得座無虛席。
 
「今次真係踢晒腳，一日都係個衰鬼，話咩世界盃開夜場做多啲生意喎，你睇吓佢呀，根本就係自己同班波牛吹水，你睇吓佢呀，踢完波返嚟仲掛住喺度傾傾傾，呢度地震火燭佢都唔理架喇。」叨嘮的人是一邊執拾桌子，一邊吼叫的Auntie Angel，然而，吹水的食客靜下來，餐廳的伙記不敢回應，只有阿雪走向一名咀上有二撇雞，一身鮮橙色波衫的男人…
 
「Uncle D…」連名字都沒有機會叫完，阿雪就被打斷說話。
 
「阿雪你唔使理佢架，個衰婆無嘢揾嘢嚟講咋嘛，妳望吓班伙記做得幾開心，一陣又有得一齊睇波，大家一齊Happy，咁先係做生意架嘛。」也不知道究竟有沒有伙記認同他的言論，只知道這位Uncle的確很享受跟一班人一起看足球賽事。接下來，在世界盃足球賽事開始之前，一對夫婦在茶餐廳已經上演了一場精彩賽事，球來球往，唇槍舌劍，你來一記細哨式插花，我來一記施丹式轉身，餐廳內的觀眾由起初的鴉雀無聲，竟然變成了吶喊助威。
 
阿雪無奈地走回收銀櫃位，大惑不解地想：「真係唔明Auntie Angel同Uncle Demon平時係點相處嘅，前幾日仲上演緊甜蜜蜜，今日就好似換咗畫做六國大封相咁…」
 




此時，阿雪的電話在櫃台上震起來，是傲雲傳來的訊息。
 
「紫月，妳而家得唔得閒？」
 
「嗯…我落咗場，而家仲喺茶餐廳度…本身諗住睇吓有咩幫到阿姨…不過…」
 
「得閒嘅話過嚟揾我。」
 
「好呀」
 




沒有追問到哪裡找他，阿雪好像已經知道要到哪裡，拿起電話銀包就匆忙走出去，收銀櫃台上遺留了一張用茶餐廳做背景的畫，裡面有一個二撇雞足球員擺出射球的動作，一個肥嘟嘟守門員和一群正在做人浪的觀眾。
 
「紫月！呢度！」不知道有沒有特別意義，他們倆碰面的地方只是一間平平無奇的便利店。
 
「傲雲哥哥…你又叫我做紫月…」傲雲依然當街當巷大叫紫月這個名字，而阿雪亦繼續對這個稱呼感到尷尬。「做咩叫我出嚟叫得咁急嘅？」
 
「上次見妳成個唔同晒，今日心血來潮想買多啲俾妳著多啲。」
 
「傲雲哥哥…你都覺得我平時啲衣著好肉酸？」阿雪的日常生活只有茶餐廳和家裡，平時雖然不至於邋遢，但至少是不修邊幅，正如之前所說，去迪士尼那次是阿雪正正式式的第一次認真打扮。
 




「做女仔，打扮唔會嫌多架，係咪？」
 
「但係…你又送嘢俾我，做咩成日送嘢俾我嘅？」
 
問題沒有得到傲雲的回應，傲雲沒作聲地向前走，阿雪只有望著他的背影從後跟隨。雖說要shopping，但傲雲本身是男人，阿雪又沒有shopping的習慣，所以他們陷入了一個根本不知道要買什麼的境況。經過一間又一間的boutique，都只是走馬看花，幾乎沒有看得上什麼。結果，阿雪總算挑選了一條連身裙，但這條粉紅色的連身裙應該稱作晚裝，一般人絕對不會隨便穿上這條裙在街上走。
 
「嗯…哈哈…其實我都唔識買衫，枉費咗你一番心意添…」阿雪一臉腼腆又矛盾地感激傲雲，同時亦覺得抱歉。
 
「其實唔緊要，慢慢嚟，唔識唔係妳嘅錯，而且條裙好靚。」
 
「嗯。」比起言語反應，阿雪的表情反應更顯著，她害羞地盯著傲雲，期待他望過來時可以有一個深情對望。可惜，情況就像長傳的眼波，從龍門邊飛過，落在界外這射球沒結果。
 
阿雪掃興地將視線從傲雲身上移走，眼前是聚集在馬會前的人群，因為世界盃的關係，聚集的人群比平常更多，多半是上了年紀的叔伯，在最後面則有兩個年輕人，一個穿著裇衫西褲，另一個則是波衫波褲。人群突然一起歡呼，阿雪隱若聽到一些對話。
 
「杜奧巴好波！杜奧巴!很想去捕捉他!」




 
「睇清楚啲啦，呢個係耶耶托尼嚟架懵丙！耶耶托尼yeah yeah yeah 無名勇士又勁射！yo！」
 
阿雪覺得很有趣，但又不知道是什麼，就問傲雲：「傲雲哥哥，咩係杜奧巴…很想去…捕捉他…仲有仲有，耶耶托尼…耶…耶…耶？」
 
「杜奧巴同耶耶托尼係兩個足球員嘅名，有啲人將佢哋個名擺咗入首歌度…算係惡搞啦。」傲雲依然保持正經八百的態度去解釋。
 
「吓…乜啲人咁無聊架…」
 
阿雪一直跟著傲雲走，直至回到他們碰面的那一間便利店，原來傲雲的車停泊在便利店外的車位。
 
「都夜喇，車埋妳返屋企。」
 
「嗯。」又是一個說不出話來的回應，乃至於在車上，阿雪仍然是含情默默地呆望著傲雲。
 




「其實…傲雲哥哥個心諗緊啲咩呢？」疑惑停留在阿雪的腦海，她不了解的，不只是傲雲對她的行為態度，其實她更不了解的是她自己的想法心意。
 
（Next：Episode 10 - 細街盃）