一個A0毒L和O4女神的故事: 番外篇 - 感受三十七度的體溫 (20)

番外篇 - 感受三十七度的體溫 (20)

一幕幕跟Edan之間的往事，Rachel鉅細無遺地回憶起來。

明明自己是非常喜愛Edan所送的水晶手機殼，為何當時會因為風筒被摔跌，而冷待了它？

就是這種模稜兩可、糾纏不清的心結，令她當日作出了錯誤的決定。

Rachel拿出手機，並將之翻轉。那個已經被Edan摔裂的電話殼，仍舊裝在Rachel的手機上。





分手那天，Edan狠狠地將那手機殼摔在地上，大部分水晶被震甩，手機殼更被一分為二。

Edan離開後，Rachel從地上慢慢拾起那破裂的手機殼，以及散滿一地的水晶粒。

回家後，她嘗試將手機殼修復。她用膠水貼好了斷裂的部分，並將大部分水晶貼回手機殼上。

驟眼望，手機殼看似回復原貌，但當中的裂痕，永遠不會消失。

現在，她望著那個被修補過的手機殼，已再忍不住，淚水不停地從眼眶裡湧出來。





她再次打電話給Edan，發現直接被轉駁至留言信箱。很明顯，Edan已關掉了手機。

她終於知道，她真真正正失去了Edan。

**********

Edan再次來到Natalie的家。

Natalie的母親也有點驚訝，但她知道Edan最近發生了不快事，所以仍非常歡迎Edan再次到來，並樂意讓他在這裡留宿。





Edan原本想放空一晚，甚麼也不想，好好睡一覺。當然，心情並不是理性所能控制的事，不可能立即平復得到。他睡到凌晨三點，醒來後便不能再次入睡。

他坐在客廳的沙發上，望著窗外的天空，腦袋並沒有休息，仍然不斷想著這數天所經歷的事。

「你瞓唔著呀？」Natalie從睡房步出客廳，循例問問Edan是否睡不著。

「係呀，希望過多一陣會瞓得返啦！」

Natalie坐在Edan旁邊，沒有再次說話。二人迎來了數分鐘的寧靜。

其實，Edan心裡有點兒緊張。現在與他只有兩尺之隔的人，極有可能仍喜歡著自己，而這個人也曾是自己喜歡過的人。

Natalie也是。今晚的心情跟昨日是完全不同，因昨日Edan並未知道她仍喜歡著自己。

「其實，我係好珍惜我哋三個之間嘅友誼。」Natalie打破沉默。





Edan︰「你同Justin分手之後，係咪已經做唔返朋友？」

Natalie︰「以我嘅性格，係可以再見亦是朋友。但我知我哋三個唔可以再返到轉頭，只要當中出現過愛情嗰種feel，就已經去唔返以前三個一齊好開心、好無憂無慮嘅日子。」

Edan︰「我……其實我唔想見到你同Justin就咁就散，你依家真係一啲鍾意Justin嘅感覺都冇？」

Natalie︰「唔係冇，但喺我心裡面，你同Justin都有一定嘅位置。我唔可以咁自私，同佢喺埋一齊，心裡面又有你！」

Edan跟Natalie互相凝望著。Natalie終於親口承認自己仍喜歡著Edan，令Edam再也不敢與Natalie對望，立即逃避Natalie的眼神。

「所以，我依家只係想同你哋做返朋友，咁樣會舒服好多！」Natalie知道Edan現在根本不喜歡自己，立即將話題轉移回朋友的層面。

Edan︰「我只係知道，Justin根本就唔鍾意佢依家個女朋友！」





Natalie︰「你想表達啲咩？」

Edan︰「我feel到佢依家個女朋友Mia，真係好鍾意佢，不過佢根本就唔鍾意Mia，佢只係喺我面前扮恩愛。我覺得Mia好慘，佢只係做咗Justin同你分手之後嘅水泡！」

Natalie沒有追問，繼續讓Edan說下去，

Edan︰「有時我哋諗嘢真係諗得太複雜，令到我哋都錯過咗好多嘢，同時亦都不自覺咁傷害緊人！」

Natalie︰「我只係知道，timing真係好重要，有時喺錯嘅時間遇到啱嘅人，係好令人沮喪！」

Edan︰「我同你真係錯咗timing，但你同Justin唔同！」

Edan多次在言談間提及Justin和Natalie之間的關係。很明顯，他不想二人緣盡於此。

雖然現在Justin已有新戀情，但長遠下去，Mia只會承受更大的傷害。所以，阿康很想Justin跟Mia分手，並和Natalie再次走在一起。





他相信今晚Justin所講的每一句話，相信Justin由始至終都喜歡Natalie，雙方的時間根本就是恰到好處。令他們不能走在一起的唯一原因，是Edan的存在。

Natalie︰「我唔係好明你講緊啲咩！」

Edan︰「我相信佢今晚同我講過嘅嘢！你知唔知道，Justin一直都鍾意你！」

Natalie︰「『一直』嘅意思係咩？」

Edan︰「當你拒絕咗我嘅表白之後，由嗰段日子開始，Justin已經對你有好感。」

Natalie︰「冇可能，嗰陣我俾晒暗示佢，但佢冇做任何嘢。」

Edan︰「原來你唔知呢部分嘅嘢！當時Justin係因為唔想我難過，所以先冇對你作出任何表示！」





二人傾談之間，發現Natalie根本不知道，Justin在很早的時候已喜歡Natalie。當時Natalie十分喜歡Justin，Justin對Natalie也有好感，只因Justin不想好友難堪，才沒有跟Natalie作進一步的發展。

Natalie︰「天意嚟㗎，咁樣只係顯得我同佢係有緣無份！」

Edan︰「我唔係想增加你嘅煩惱，我只係好想、好想你重新去審視一下你同Justin之間嘅可能性！」

Natalie聽到Edan認真說話的模樣，立即大笑起來。

Natalie︰「你講嘢一時又咁低能，一時又咁認真，真係好難捉摸！我明你想講咩喇，但女仔諗嘢冇咁理性，只係會信當前嘅感覺。」

Edan和Natalie再次互相對望。

Edan選擇再次逃避Natalie的眼神，並說：「冇嘢喎，我只係想我地三個之間唔好再有任何誤會，唔好再有任何唔清唔楚嘅嘢！」

Natalie︰「係喇！咁，你同你女朋友點呀？」

Edan︰「我頭先諗咗好耐，我同佢都有相似嘅地方，我唔應該只係諗佢唔好嘅嘢，而忽略佢對我嘅好！」

Natalie︰「咁咪幾好囉！我係真心祝福你同你女朋友可以喺返埋一齊㗎！」

Edan選擇相信Justin所講的說話，換言之，他也相信Rachel一早知道自己心裡可能有Natalie這個人的存在。

他之前不斷怪責Rachel在意阿康的物品，認為Rachel心裡有阿康，但反過來，Rachel從來沒有怪責過他半句。而且，Rachel為了挽救這段感情，還特意學結他，目的是想在Edan面前自彈自唱他最喜歡的歌。這份心意，他實實在在感受得到。

Edan決心跟Rachel重新開始。

**********

早上醒來，Edan開啟手機，發現Elise傳送了很多信息給他：

「哥 做乜唔覆message😡」

「仲要單剔😡
你做乜熄電話」

「好夜喇
你做乜仲唔返屋企?」

「喂
你係咪去左搵rachel呀?
我搵唔到rachel
又搵唔到你
你地攪乜呀」

「丁俊森
我命令你即刻開電話
即刻返嚟屋企😡」

Elise一連串的轟炸級信息，Edan並不感意外。他隨意覆了Elise之後，立即打電話給Rachel，可惜打了數次也打不通。

自從親眼看見Edan跟Natalie上了的士之後，Rachel心情一直未能平復。Elise找不到Edan，便不斷傳信息給Rachel，說Eden連手機也關掉了，深夜也未有返家。

Rachel相信，Edan心已死，並重投Natalie的懷抱。

再次返回家中，Rachel立即將自己鎖在睡房，並躺在睡床上。

忽然，她看見書枱上有那個東西。

剛才明明已將它丟在垃圾箱，現在卻再次重現她眼前。

沒錯，這個東西，就是阿康送給她的Dyson風筒。

「點解會咁㗎！明明已經揼咗，點解又出現返㗎！」

她立即走到父母的睡房，問他們有沒有從垃圾箱拾回風筒。

Rachel母親：「你一直都當呢個風筒係寶，我見到佢喺垃圾筒入面，以為係唔小心跌咗落去，所以咪幫你執返囉！唔講喇，夜喇，早啲瞓啦！」

返回房間後，Rachel望著風筒，顯得極度無奈。這情況猶如她永不能放下阿康一樣，阿康的陰霾就像一直纏擾著她似的。

她用力將風筒擲在地上洩憤，發出隆然巨響。她感到無可奈何，一種無力感重重壓在她的身上，伴隨又是幾行眼淚。

她再次拾起風筒，只見它被撞凹少許，但外觀上沒有任何分別，看來相當堅固。

她最終作出了一個決定。

**********

翌日，Rachel根本沒有心情工作，所以向公司請了假。

Elise仍未放棄，一直傳送信息給Rachel，又打了數次電話，Rachel也不打算接聽，最後索性像Edan昨晚一樣，關掉了手機，乾淨俐落。

所以，Elise和Edan也找不到她。

Edan打電話給肥媽，希望肥媽可以讓Rachel跟他通話，可惜肥媽回覆Edan，Rachel今天沒有上班。

Edan立即決定前去Rachel家找她，但Rachel剛好在Edan到來前離開，二人緣慳一面。

Rachel離開後，她返回公司，但沒有上辦公室，而是坐在樓下大堂的沙發上。

Rachel︰
「阿康 我喺公司樓下大堂
你可唔可以落一落嚟
我有啲嘢想俾返你」

阿康：
「下 你唔係請左假架咩
做乜又返嚟公司」

Rachel︰
「你唔好問咁多啦
你快啲落嚟啦」

阿康：
「唉 冇你符」

阿康收到Rachel信息後，立即下樓找Rachel。

阿康：「做咩呀Rachel，隻眼做乜紅晒？你喊過嚟呀？」

Rachel︰「你唔使理我，我冇嘢！我有啲嘢想俾返你！」

Rachel將風筒歸還給阿康。

阿康：「吓，你特登返嚟公司，就係想還返個風筒俾我？」

Rachel︰「係！冇乜嘢我走先喇，下星期返嚟公司再傾啦！」

阿康：「吓，你認為我會就咁俾你走咩！你今日好唔妥呀，做咩事者你！」

Rachel︰「我唔知呀，我都唔知自己想點呀！嗚……嗚！」

Rachel在阿康面前哭泣，而且在短時間內去到一發不可收拾的地步。

當時是平日早上十一時左右，雖然未到午飯時間，但九龍灣商廈的地下大堂，仍不乏工作的人路過。Rachel的忽然哭泣，引起在場人士的注意。

看見別人的注視目光，阿康顯得一臉尷尬。他立即讓Rachel坐在沙發上，並輕拍她的背部，嘗試讓她冷靜下來。

兩分鐘過後，Rachel開始冷靜下來。

阿康：「Rachel，係咪同男友嗌交呀？」

Rachel︰「佢同我提出分手。」

阿康：「可唔可以講俾我聽係咩原因？」

Rachel︰「我唔知呀，我唔知點講！」

阿康：「OKOK，唔使夾硬講。咁，同你還返個風筒俾我又有咩關係呀！」

Rachel︰「我想還返晒所有同你有瓜葛嘅嘢俾你！」

聽到Rachel的回答，阿康開始惆悵起來。Rachel煞有介事地將這些物品歸還，她一定還有心結未完全解開。

阿康慨嘆，自己跟Rachel在情感上的關係，自一年多前、Rachel喜歡自己開始至今，仍未能完全斷絕。他們已各自開始了新戀情，但Rachel仍未將阿康這個人完全忘卻。

阿康：「你男朋友以前同你講過，你心目中有我嘅位置，佢唔會expect你會喺心裡面完全刪除我呢個人。但係點解你仲係糾結喺呢樣嘢入面？」

Rachel︰「我發覺，我重視你俾我呢個風筒，多過我男朋友送俾我嘅嘢。」