一個A0毒L和O4女神的故事: 番外篇 - 小樽之約定 (1)
番外篇 - 小樽之約定 (1)
「靚女，你漏咗袋嘢呀！」
「吓！係喎！唔該晒你呀！」
Sophie剛下車，的士司機隨即發現她遺留了一袋物品，立刻示意她取回。
「你唔似咁大頭蝦㗎喎！」同行的Athena跟Sophie說。二人各自手執兩大袋戰利品，並一同步行前往Athena的新居。
Sophie︰「頭先陪你行ikea行咗足足四個鐘呀，攰到就嚟死喇，仲要俾你話我大頭蝦！」
Athena︰「係係係，sorry囉！我好多謝你特登陪我買新屋嘅嘢呀！不過頭先你陪我行街呢幾個鐘，都好似神不守舍咁，頭先落車又攞漏袋嘢。係咪有心事呀？」
Athena一邊詢問Sophie，一邊拍卡，然後進入新居的電梯大堂。
Sophie︰「冇事呀，係尋晚見返個渣男喳嘛！」
Athena︰「做乜咁唔好彩呀！」
Sophie︰「係囉，時運低。」
二人進入升降機，Athena按下52樓的按鈕。
Athena︰「都成兩年啦，你仲係忘記唔到呢個人，咁你點開始新嘅戀情呀！」
Sophie︰「我冇放唔低佢，只係俾佢hurt得太深，仲係唔想拍拖住。」
Sophie表面上性格剛烈，但內心其實非常脆弱。上一段戀情，被對方傷得太深，至今仍無法釋懷。
升降機到達52樓，二人步出。正當Athena放下兩袋戰利品，並用指模開啟大門門鎖的時候，隔鄰的B室有人從單位內推開大門。
「唔係咁冤家路窄吓話！」Sophie輕聲道。
一個大約四十歲的中年女人，跟一個七八歲大的男孩，從隔鄰單位步出。
Athena︰「Hello馮太！」
馮太：「你好呀杜小姐！你係咪搬咗入嚟喇？」
Athena︰「未呀，兩三日後先正式搬入嚟！」
馮太：「Arnold，叫姐姐啦！」
Arnold︰「Hello Athena姐姐！」
Athena︰「叻仔喎，仲記得我叫咩名！」
Arnold︰「嘻嘻！」
三人寒喧幾句後，便分道揚鑣。Athena和Sophie也進入了阿康不久前買下的這個A室單位。
**********
二人放下沉甸甸的戰利品，隨即躺在沙發上，累得再也不想做別的事情。
Sophie心中充滿著疑惑。
Sophie︰「嗰兩個係咩人嚟㗎？係Thomas嘅屋企人？你又話Thomas住喺你新屋隔離嘅！」
Athena︰「Thomas佢搬走咗喇！」
Sophie︰「吓！咁戲劇性！」
舊愛Thomas是Athena新居的鄰居，那麼震憾性的消息，Athena當然第一時間告知姊妹們。大家也覺得事情實在太巧合，而又確實會為Athena和阿康的感情生活製造了不確定性。正當眾人再次為他們二人的感情而擔憂之際，Thomas竟然在他們入伙之前搬走了。
Athena︰「係呀，我都唔知點解！係前日我同阿康上嚟同裝修師傅交收單位嗰陣，我哋發現頭先嗰個馮太一家人搬咗入嚟，而Thomas已經喺兩個禮拜前搬走咗。」
距離阿康和Athena復合的日子，至今已接近一個月。Thomas就在得知他們二人成為鄰居後的兩個星期，便自行遷出了。
Sophie︰「可能Thomas見到你哋太sweet，所以拿拿聲搬走，費事眼冤呢，嘻嘻！」
Athena︰「哈哈，唔會囉，我哋就係見得嗰次面，之後都冇再見，點知我哋sweet唔sweet？不過我冇再諗，依家Thomas唔係住喺隔離，心情輕鬆好多！」
Sophie︰「佢搬走不特止，仲要咁快搵到屋搬走嗰下勁。」
Athena︰「對佢應該冇難度，佢屋企有十幾層樓喺香港收租，呢層樓我相信都係佢屋企人嘅。佢隨時都可以搬去第二間冇人租緊嘅單位住。」
Athena跟Thomas拍拖的時候，已知道他的家人是大地主，在香港和世界各地均有物業。
Sophie︰「你早啲介紹Thomas俾我識嘛，哈哈！」
「我先唔會囉！」Athena向Sophie伸出舌頭，表示她不會介紹前度讓閨蜜認識。
Sophie︰「係呢，阿康幾時返㗎？我想喺度坐多陣，同你傾多陣偈呀！」
Athena︰「好呀，佢最近好忙，又要忙公司嘢，又要買新屋嘅嘢。佢陣間放工仲要去攞個茶几，冇兩個鐘都唔會返嚟。有你陪我實在太好！」
**********
晚上，阿康在Dylan的協助之下，將其中一個新買的茶几搬來新居。
初時Sophie以為阿康的朋友，也會是一個像阿康般的宅男，誰不知Dylan是一名型男，完全出乎Sophie意料之外。
由於Sophie望著Dylan的眼神太過明顯，Athena很快便察覺到。她知道Sophie已有兩年沒有拍拖，難得見這位好姊妹好像對眼前的男子動心，於是打算撮合二人。
Athena︰「唔該晒你呀Dylan，幫阿康抬呢個茶几返嚟！不如咁吖，今晚一齊食飯啦，我同阿康請！」
「都好喎，有人請食飯！」Dylan答應。
「Sophie，如果你今晚冇約，不如都一齊食啦！」Athena說完，暗地裡用手肘頂向阿康的腰部，要阿康幫口。
「係啦，你同Athena行咗咁耐街，又幫手拎嘢，你都辛苦喇，一齊食飯啦，呢餐我同Athena請！」阿康隨即附和。
「好啦！」
四人就在屋苑商場的餐廳用餐。
事實上，Sophie和Dylan都是單身，而且Athena和阿康也察覺得到，二人也互有好感，於是積極拉攏二人，席間不斷為二人製造話題。
飯後，阿康和Athena準備返回寓所，Dylan和Sophie也準備離開。
Athena︰「Dylan，你今日係咪有揸車嚟呀？」
Dylan今晚刻意駕車前來，幫阿康搬茶几來新居，Athena沒可能不知。她這樣刻意提及，Dylan也知道她的用意。
Dylan︰「有呀！Sophie，不如我車埋你返屋企啦！」
Sophie︰「好呀，唔該晒你呀！咁我哋走先喇，拜拜！」
Athena﹑阿康：「拜拜！」
Sophie就這樣跟Dylan一同前往停車場。
阿康和Athena十指緊扣，慢慢在商場裡閒逛。
阿康：「哈哈，你會唔會做得太明顯呢！」
Athena︰「我嫌撥得唔夠行，應該再加多幾錢肉緊！」
阿康：「我未見過Dylan講嘢係咁風度翩翩，今晚一句粗口都冇講過！」
Athena︰「我夠未見過Sophie講嘢係咁細聲同斯文咯，哈哈！」
二人不禁哈哈大笑。
阿康：「不過佢哋唔係咁易可以喺埋一齊，Dylan佢以前有過一段好唔開心嘅經歷，唔係咁輕易可以開始到新嘅戀情。」
Athena︰「Sophie都係！可能佢哋同是天涯淪落人，會一撻即著呢！」
他們二人對於能成為月老，將Dylan和Sophie連在一起感到興奮。當然，二人能否走在一起，仍然十劃未有一撇。
**********
返回新居後，二人分別為新居放置好新買的物品，也併砌好一些中型傢具，便做完今晚要做的事。
二人坐在沙發上休息。
阿康：「只係差床褥未送嚟，我哋可以如期後日入伙。攪掂晒屋企嘅嘢，再過兩日就可以專心去北海道玩喇！」
自從Athena向阿康透露過，她在小樽音樂盒店的留言冊上，寫下對阿康的情話之後，阿康一直都很心急想到小樽，看看Athena寫了甚麼給自己。他早早就預訂了下星期出發到北海道的機票和酒店，希望可以跟Athena一起去北海道旅行，順道看留言冊。
阿康：「Athena，我……我想問你一樣嘢！」
Athena見阿康問得吞吞吐吐，大約也估到他想問甚麼。
Athena︰「你係咪想問我嚟咗M未呀？」
阿康：「嘩，你真係醒！」
Athena︰「係咪驚我旅行先嚟M，冇得攪嘢呀！」
阿康：「邊係喎，我係擔心你冇得浸溫泉喳！」
Athena︰「你係擔心我冇得浸溫泉，同埋冇得曳曳吖嘛！」
阿康：「我似係啲咁衰嘅人嚟，淨係掛住旅行扑嘢嘅咩！我梗係唔會啦，我淨係想睇留言冊，同埋一心一意同你一齊去旅行㗎！話晒呢個都係我哋拍拖之後嘅第一次旅行！」
Athena︰「嘻嘻，係喇，知你唔係喇！我未嚟M呀，不過應該就快。」
Athena見阿康一副認真的樣子，但左額又有幾滴汗珠，她不禁暗自竊笑。
Athena拿出一張紙巾，為阿康抹汗。
Athena︰「呢個月辛苦你喇，公司嘢又多，又要理新屋嘅嘢，又要plan行程。我都話旅行可以遲啲先去，你又要心急，之後我話旅行嘅嘢等我諗，你又唔想我辛苦，攬晒啲嘢嚟做！你真係傻豬嚟㗎！」
阿康：「為你做嘅嘢又點會辛苦喎！」
Athena擁抱著阿康，親了阿康一口，並在阿康耳邊輕聲說：「多謝你！你真係好好，好彩我哋可以喺返埋一齊！」
阿康沒有回答，立即深情地跟Athena接吻。
情到濃時，阿康忍不住撫摸Athena的胸部，Athena也狀甚享受。正當阿康想有進一步行動之際，他又突然收手。