一個A0毒L和O4女神的故事: 第六十八章 唔代表我要包容你所有嘅嘢

第六十八章 唔代表我要包容你所有嘅嘢

阿康甩開了Athena的手。

阿康很想原諒Athena，但他做不到。

經過Athena的解釋後，他相信Athena之後沒有再找Thomas，今晚也不是跟Thomas幽會。

他最在意的，是Athena心裡有Thomas的位置。





阿康：「Thomas對你嘅影響力實在太大，只係你自己唔知。」

Athena︰「咩影響力呀！」

阿康：「Sorry呀，我之前曾經喺你用緊電話上網嘅時候，偷睇過你輸入嘅密碼，發覺你仍然用緊Thomas嘅生日日期。『Lee921014to』，Thomas係姓李㗎，你係姓杜㗎！就當係我小氣啦，我接受唔到你所有登入密碼都有Thomas嘅痕跡。」

Athena︰「啲password我用咗好多年㗎喇，我唔想再去記過另一組密碼。我可以即刻改晒佢㗎！」

阿康：「就當呢個係你嘅習慣，我冇怪過你。但係，上次喺你舊屋間房，書枱上面同Thomas嘅合照，你又點解釋？你同Thomas分手已經咁多年，依家已經拍第三次拖，點解你仲未肯摵走張相？」





Athena︰「我講過，之前兩個前度都冇介意過，所以我一直懶得摵落嚟。如果你真係唔鍾意，我可以即刻返去摵走佢，撕爛佢，揼咗佢。」

阿康：「仲有，上次睇你啲舊相，我發現你中學時期好鍾意著鮮色衫，但自從大學開始，你就轉晒著沉色嘅衫。呢個轉變，實在太明顯。我問你，係咪Thomas以前同你講過，鍾意你著沉色嘅衫？」

Athena︰「邊度係呀！點解你會咁諗？著衫嘅習慣係會隨住年紀會有唔同，根本就同其他人無關。」

阿康：「你唔好呃自己啦！我睇返Thomas好耐之前嘅facebook post，佢有講過，你著沉色嘅衫好好睇，著鮮色衫會太過eye catching。之後你同佢再post有你出現嘅相，你已經全部轉晒著沉色嘅衫。」

Athena︰「係，佢最初可能改變咗我某啲習慣，但習慣咗嘅嘢唔會咁容易就改到，就算我之後改唔到，都同佢無關。」





阿康：「可能係啦。我咁講並唔係想你改密碼，並唔係想你撕爛你同舊愛嘅合照，並唔係想你改變著衫嘅習慣。我只係在意，佢對你嘅影響力，一直都有存在，以前有，依家有，將來都會有。我唔想同你拍緊拖嘅時候，你心裡面係諗緊第二個男人。」

Athena︰「我唔會再諗起佢㗎喇，你信我啦，我做得到㗎！」

此時此刻，Athena只求阿康原諒。她確是因習慣和惰性問題，才會多年不改密碼，不抛掉與前度的合照，以及一直保持穿衣的習慣。她完全估不到阿康會發現此三點，並用此作為質問自己的理由。但自己心裡面仍有Thomas，是鐵一般的事實，她無法辯駁。

阿康：「你依家可唔可以同我講，你已經冇再鍾意Thomas！」

Athena望著阿康，停了數秒，然後回答阿康：「冇呀，我冇鍾意佢！」

阿康：「你都係接受唔到你仲係鍾意佢呢個事實。我問你吖，點解你會鍾意『默契』呢首歌？明明呢首歌都唔係你嘅年代，點解你會無端端鍾意呢首歌？」

Athena聽到阿康有此詢問，已知道阿康的意思。

Athena︰「其實你已經知道，點解仲要問？但我可以同你講，呢個都係唔關佢事，我係覺得好聽先鍾意，就算我依家仲係好鍾意聽，都唔關佢事！」





當阿康搜尋Thomas以前在Facebook上的帖文時，除了發現Thomas曾經說過喜歡Athena穿深色衫之外，他同時得知，「默契」這首歌，根本就是二人定情的歌。這是Thomas喜歡的歌，剛好歌詞又代表到二人之間的感情。

阿康：「其實你可能自己都唔知！從呢啲生活上嘅細節，加加埋埋，令到我覺得，Thomas真係一個對你好重要嘅人！你可能會覺得我喺雞蛋裡面挑骨頭，去針對你同Thomas之間嘅嘢，但我就係感覺到，感覺到你個心係有Thomas呢個人。」

「阿康，你……你要我點做，你先會原諒我！」Athena再次淚流滿面，並拖著阿康的手。

阿康：「其實……其實我初時係好激動㗎！我諗唔明點解你要咁樣對我，點解你同我拍拖，你都可以諗住第二個男人！但係我講咗我嘅心聲出嚟之後，我覺得個人反而平靜咗。」

阿康續說：「Athena，我好鍾意你，真係好好好鍾意你，我從來都冇掩飾過！我好珍惜呢段感情，但並唔代表我要包容你所有嘅嘢！就算我相信你唔會再搵Thomas，亦都唔等於你個心會冇佢嘅存在。我可以接受到你唔夠愛我，但我接受唔到你心入面有另一個人。」

Athena未能作出回應。

阿康：「我再問多你一次，你要老老實實咁答我，唔好再呃我。你心裡面係咪仍然掛住Thomas？」





Athena知道不可以再對阿康作出隱瞞，但又講不出口。她根本不能在阿康面前說自己心裡記掛著Thomas。

二人沒有再說話，持續了整整一分鐘。

最終阿康打破沉默，忍痛說出今晚最不想說的話。

「分手啦！我唔想再拍多幾年拖，感情再深啲嘅時候，先發現你根本係鍾意其他人多過我。依家都只係拍咗四個月拖，依家放手總好過幾年後先分。」

「唔好呀阿康，唔好分手呀，唔好！」Athena邊哭邊說。

換轉是以前的阿康，如果看見Athena哭著求他原諒，他一定會忘記Athena的過錯，並用最快的速度去原諒Athena。Athena是他最深愛的女生，是他花了很多心機和時間才追到的女生，他又怎可能讓Athena傷心太久！

但現在的阿康，確實原諒不了Athena。

阿康：「呢三個幾月以嚟，我會無條件咁為你付出，亦都唔介意自己付出得比較多，我做每一件事都會先諗咗你嘅感受，我先會做。我以為我鍾意你，所有嘢都係冇問題㗎，所有嘢都可以解決到㗎，但係，原來我都會介意，介意你唔夠愛我！」





Athena仍然緊握著阿康的手，仍然是淚流披面。

阿康：「你就當我自卑心作崇啦！我同你始終都唔係太合襯，Thomas真係會比較適合你！既然佢忘記唔到你，你又忘記唔到佢，咁我再棟喺度都冇乜意思！」

說罷，阿康再次甩開Athena的手，準備離開。

阿康：「我走喇，我返自己屋企喇，我遲啲再過嚟擰返啲嘢走。」

Athena︰「唔好走呀！唔好呀！」

阿康：「我覺得，我都係適合住公屋多啲！其實我一早就應該要知道，屋邨茶餐廳同酒店fine dining嘅餐廳，根本就係兩個世界，大纜都扯唔埋！」

阿康終於離開，離開了這個二人一起居住了只有三個月的家。





**********

Athena非常傷心，知道自己徹底傷透了阿康的心，但不知怎樣挽救這段感情。她一整晚都睡得不好，翌日醒來，感到十分頭痛，很不舒服，於是向公司請了病假。

她自醒來之後，一直都呆坐在梳化上，沒有做過任何事，也不知將要做甚麼。

Chloe得知Athena請了病假，於是她經WhatsApp問Athena哪裡不舒服。

「心好痛」

Athena連詳細一些的內容也沒心情去描述，只回應了這三個字。Chloe再打電話給Athena，Athena也沒有接聽。

Chloe知道Athena有心事，也記得阿康昨晚打過電話給她，問過Athena的行蹤，知道二人可能出現問題。Chloe決定請假，去找Athena。

Athena見Chloe親身前來找她，忍不住再次落淚，並緊緊擁抱著Chloe。

由於Chloe也認識Thomas，而且有出席當晚的聚會，所以Athena決定由頭到尾，將整件事情向Chloe說起。

Chloe︰「原來發生咗啲咁嘅事！你有冇攪錯呀！」

Athena︰「我知錯喇！你鬧我啦！」

Chloe︰「你唔怪得阿康會嬲你㗎！唉，總之嗰晚我就唔走啦！其實嗰晚邊係我男朋友嚟接我吖，佢只係打嚟問我幾時返，我順勢想撇甩Thomas喳嘛！」

Athena︰「根本都唔關你事！就算嗰晚冇發生任何事，Thomas佢都會再搵我，事情可能都會發生！」

Chloe︰「究竟你想點㗎？你同阿康一齊，心裡面仲有第二個！雖然我知道你以前真係好鍾意Thomas，但都已經係過咗去嘅事，你依家個男朋友係阿康呀！」

Athena︰「我知呀，但我真係控制唔到自己個心諗乜！自從見返Thomas之後，我先知我個心原來仲有佢！唉哎，好想死呀！」

Chloe︰「咁你去死啦，我都幫你唔落！」

雖然Chloe刻意請假找Athena的原意，是來安慰Athena，但她也是理性的人，現在反過來直斥Athena的不是。

Chloe︰「唉！件事唔發生都發生咗，要諗解決方法。OK，我嚟問你，你究竟鍾意邊個多啲？」

Athena︰「我唔知呀！」

Chloe︰「阿康啱啱先同你經歷咗咁多嘢，你竟然唔係答鍾意阿康多啲！你同佢先係真實㗎，Thomas嗰啲已經係N年前，過去咗嘅虛無嘢嚟㗎！」

Athena︰「我覺得我好對唔住阿康，要咁樣hurt佢，但佢叫我要老實答佢，我個心入面有冇Thomas，我唔可以再呃佢話冇！」

Chloe︰「不如你真係同阿康分手啦，就當係放過佢啦！」

Athena︰「我唔想冇咗佢！」

Chloe︰「如果我頭先問你鍾意邊個多啲，你係答阿康嘅話，咁就仲有得救，我哋一定會諗方法幫你氹返阿康返嚟。但你依家答唔出呀，我點幫你呀！」

霎時間，Athena未能回應Chloe。

Chloe︰「你知唔知阿康有幾鍾意你呀？連我呢個旁觀者都feel到啦！如果你埋沒良心，同阿康講你心裡面已經再冇Thomas，繼續一齊嘅話，你只係會繼續傷害阿康。」

Athena仍然默不作聲。

其實，Chloe已客觀地分析了二人之間的關係。阿康似乎已不在意Athena跟Thomas接吻的事，而是非常介懷Athena心中有Thomas；而Athena同時喜歡兩個男生，就算跟阿康繼續相戀，對阿康都是不公平。

二人的關係，已接近終結的一日。