一個A0毒L和O4女神的故事: 第五十一章 溝女唔使攞晒成副身家出嚟下話

第五十一章 溝女唔使攞晒成副身家出嚟下話

三兄弟從WhatsApp中得知阿康想變賣figure，於是他們連夜趕來阿康的家，一同質問阿康。

Patrick︰「屌，你係咪痴撚咗線呀，溝女者，唔使攞晒成副身家出嚟下話！」

阿康：「唔關溝唔溝女嘅事呀！Athena屋企人有事，人命尤關，我唔可以唔理！」

家俊：「依家講緊係你儲咗十幾年嘅figure呀，你成日都話啲figure係你嘅第二生命嚟㗎，你唔好咁傻啦！」





Dylan︰「其實Athena鍾唔鍾意你，唔會因為你借唔借到錢俾佢而有改變。身為你嘅兄弟，我想你再諗清楚，啲figure係你由小學六年班開始儲，隻隻都係有血有汗㗎！」

阿康：「我都唔係想改變啲乜，我只係想借錢俾Athena渡過呢個難關，純綷係幫朋友。」

Patrick︰「朋友唔係咁幫㗎，就算佢真係你條女，你都冇義務咁做㗎，更何況你哋仲未一齊。」

Dylan︰「你記唔記得中六嗰年，我同你輪流喺動漫節排隊，排咗幾日隊呀，為嘅係你最鍾意嘅嗰set限量版，當時有人打尖，我哋差啲同人開片。你嘅每一隻figure都好有價值，喺你嘅心目中，並唔係普通嘅玩具咁簡單，而係你嘅精神支柱，你嘅精神食糧，總之就係好重要嘅嘢啦，你點可以話唔要就唔要！」

三人輪流勸說阿康，阻止他變賣figure。三人雖沒有儲figure的習慣，但曾經幫過他排通宵隊，為的就是買限量版的figure。所以，阿康對figure的狂熱，他們三人是真切的感受到。





現在阿康要為女生而變賣figure籌錢。雖然阿康多番強調與男女關係無關，但三兄弟很清楚阿康為人，阿康或多或少都是因為Athena的緣故才會瞓身籌錢，並不會單純為朋友而做。

阿康：「我知，但我心意已決。figure冇咗可以再買過，但生命冇咗就冇咗！」

Dylan︰「你有一半嘅figure都係限量版嚟㗎，點買過呀？你好想要嗰隻marvel，都要足足搵咗三年先買得到呀！」

阿康：「上次都係靠Athena先買到……你哋唔好再勸我喇！你哋當我係兄弟嘅話，就幫我呢個忙啦，好冇！」

家俊：「喂，依家講緊嘅係一百五十萬呀，就算賣晒啲figure，都未必有咁多錢啦！」





阿康：「咁我都有積蓄㗎嘛，我大約計過㗎喇，如果賣晒啲限量版，同埋啲比較值錢啲嘅，都應該夠。」

阿康一向生活簡樸，雖然以前收入不高，但使費也不多，公屋租金便宜，又沒有拍拖，使得最多就是買figure，所以也儲到錢。這數月來轉了新工，在Smartoys也幫公司做到大生意，賺了佣金和bonus，加起來也有數十萬。只要能成功以市價賣出他所有限量版figure，應該可達到一百五十萬。

Patrick︰「唉，算鳩數，我唔想再同你拗！怕咗你喇兄弟，成日都用兄弟呢個身份嚟勒鳩索我哋！你想我哋點幫你呀？」

由於要在短時間內變賣大量figure，又不可以讓買家知道他同時賣很多，避免被人知他等錢用而壓價，所以他想三位兄弟幫手，用多個分身去散貨。

他們合四人之力，用多個分身，在不同的網上平台放賣，不下數十次跟不同的買家面交，幾經辛苦，在三日之內，終於賣掉所有值錢的figure。

其實還差大約二十萬才凑夠數，最終Dylan私下借給阿康，終於籌足一百五十萬。

阿康：「多謝晒你哋呀，感激不盡，日後你哋要我赴湯蹈火都可以！」

家俊︰「唉，我哋辛苦唔緊要，都只係忙三日。但係，係兄弟先講，你今鋪真係去得太盡，犧牲咗呢十幾年嘅心血，去幫一個唔一定鍾意自己嘅女仔，實在太唔值得喇！」





Dylan立刻向家俊打了眼色，示意他停止再講。

阿康：「我覺得值得就得啦，啲錢都係借俾人者，又唔係攞唔返。」

Dylan︰「事情已經完結，唔好再諗返轉頭喇。阿康哥，你快啲將啲錢交俾Athena啦！」

他們四兄弟之間，有時會盡在不言中，有時會互相破口大罵，但一方有難，另外三個都會力撐到底。

**********

這三天，徐宏志已經打定輸數。在籌不足手術費的情況之下，他隨時準備將公司賣給競爭對手，以套取足夠現金。

至於Athena，她只感到無奈。在這件事情上，她完全幫不到忙。她並不是高薪一族，但平時又多用錢，而且需要交屋租，每月的薪金，到月尾都會所剩無幾。她又沒有家庭壓力，平時不需給家用，自然也沒有心態去為自己或家人儲錢。





這兩天，不知甚麼原因，曾經追過Athena的富二代Henry，突然向Athena發動猛烈追求，並相約Athena明晚一起晚餐。

Henry就是那個比諾少更有錢、家族生意更龐大的那個富二代。早前Athena不想拍拖，所以曾冷落過他，之後便沒有下文，直到這兩天，Henry才重新展開攻勢。

姊妹們都很擔心Athena的家事，所以今晚刻意到Athena家中探望，而Athena也將富二代重新追求的事向她們說起。

Chloe︰「咁你想點應付個富二代？」

Athena︰「唔諗喇，處理咗媽咪嘅事先啦，最重要係媽咪冇事！」

Sophie︰「我知你媽咪嘅事好重要，但如果你再一次拒絕個富二代，咁以後就再冇機會㗎喇！」

Esther︰「Athena之前咪已經揀咗阿康囉！佢喺阿康同Fred之間揀咗阿康，只不過咁啱遇到Athena媽咪嘅事。點解仲要同第二個男仔約會？」

Sophie︰「Athena都冇講實佢會唔會接受阿康，而且依家有另一個更好嘅選擇，可能係上天嘅安排呢！就俾Athena多一次機會去試下認識呢個富二代，如果佢個人好差，咪唔好再理佢囉！」





Esther︰「就算你要同人約會，都好應該等到你媽咪做完手術先。」

Sophie︰「其實都只係食餐飯者，又唔係啲咩，叫做互相了解一下。我知道Athena從來都冇特登去釣金龜，亦都唔會去貪富二代嘅錢，但如果世伯最終真係要賣公司，再用大部分錢去幫伯母醫病，剩低嘅錢可能唔會好多，Athena你都要為自己同屋企人打算一下。」

大家對Sophie的觀點，好像不敢苟同，但她又不是完全沒有道理，一時間，大家都沒有任何辯駁。

Sophie︰「Athena，呢幾日你已經為屋企嘅事煩咗好耐，不如你就答應約會啦，當係輕鬆一下，忘記最近嘅煩惱，開開心心咁同人食餐飯啦！」

當晚，Athena想了很久。她不知道為何自己要考慮是否應約，明明數天前已打算跟阿康一起，雖然現在有阻滯，但自己對阿康的心一直不變。為何自己仍要考慮跟Henry約會呢？

可能，就如Sophie所言，是母親的病和父親公司的問題吧！如果沒有家人方面的顧慮，可以在愛情上自由選擇的話，Athena一定會選擇阿康，而且有可能已經開始拍拖。

Athena心想，就算現在跟Henry約會，根本就改變不了現況。她不可能從第一次約會當中得到甚麼，就算她要為家人而犧牲愛情，也不會改變得到父親要為母親的病而放棄事業的事實。





可是，Athena一再想起父親的事。父親窮一生之力去經營公司，現在因為母親的病而選擇放棄，身為女兒的自己，卻完全未出過一分力，她深感內疚。

她仍存有一絲希望，希望在跟Henry的約會當中得到甚麼。就當是多認識一個富有的朋友也無妨，如果那個Henry心懷不軌，她相信自己足夠應付得到。

最終，她決定赴會。

**********

當晚的約會，Henry選擇了屬於自己集團轄下的酒店、內裡的一間法國餐廳用餐。Athena暫時忘記了近期的不快，好好地去了解一下Henry的為人。

一如以往的印象，以富二代來說，Henry為人不錯，沒有富二代的不可一世，而且對女生很溫柔體貼，初步印象非常好。而且Henry學識淵博，辦事能力高，非常成熟穩重，加上他已開始接管公司的生意，基本上，整個package都是無敵。

吃過晚餐，Athena跟Henry說她要回家。Athena以為Henry會很有風度地送她回去，但Henry沒有這樣做。

「Athena，我喺呢間酒店長期有一間自己嘅套房，嘗唔嘗面上嚟飲杯嘢？」

Athena對於Henry的邀請，顯得相當驚訝。當然，對方的意思，怎可能是單純喝酒。雖然Athena知道很多有錢人都是這樣子，但一直以來，Henry給她的感覺都比較正直。只怪自己看漏了眼，還選擇了在此關鍵時間接受Henry的約會，讓他有機會侮辱自己。

「唔好意思，我諗唔係咁方便，我走先喇，拜拜！」說罷，Athena便轉身離開。

Henry︰「30萬！」

Athena聽到Henry的說話後，停下了腳步。

Henry︰「30萬，你上嚟同我瞓一晚，30萬現金就係你。」