一個A0毒L和O4女神的故事: 第五章 我唔想再對住呢個男人，一秒都唔想
第五章 我唔想再對住呢個男人，一秒都唔想
「咦，原來你哋兩個識㗎，咁啱嘅！」Johnson聽見阿康講得出Athena的名字，知道二人一早認識，便無需多作介紹。
Athena︰「點解會係你㗎？」
阿康：「我……我唔知呀！」
Athena︰「你係咪痴線㗎，已經兩年喇，你都係唔放過我？」
阿康：「我……我唔係呀！」
眾人聽見二人的對話，無不感到驚訝，估不到二人原來一早認識兼有瓜葛。
Athena其實是阿康其中一位曾追求過的女生，亦即是三年內被七位女生拒絕的其中一位，也是最深刻的一位。
之前也提及過，阿康可以完美地令每一位追求過的女生都討厭他，Athena也不例外，而且是關係最差的一個。
無可否認，這三年間，阿康愛得最深的，就是Athena。以阿康的級數，去追求女神級的Athena，根本就是不可能的任務。在追求過程的後期，阿康不惜死纏爛打，以為只要努力地對她好，她終會接受。實情是，Athena根本從來未對阿康看得上眼。
當時阿康每日纏擾著Athena，每天在她居住的屋苑門口和公司樓下等候她，更試過在她與朋友聚會的餐廳用餐，遠距離偷望她，行為越來越過份。
這些行為令Athena極度討厭阿康。為了令他知難而退，Athena試過在大庭廣眾之下奚落他，過程被Athena的朋友拍下，放上Facebook並瘋傳，令他失去自尊。但他仍未放棄，繼續纏擾著Athena，最終Athena以報警作要脅，警告阿康不要再煩著她。同時，Athena開始跟其中一名追求者George拍拖，最終阿康無奈放棄。
**********
Johnson見情況不妙，拉了阿康和Athena入房再傾。
Athena︰「Johnson，唔好意思，就算你唔鍾意聽，我都要講。我唔知你點解要請佢，但如果你真係請佢，我會即刻辭職，我唔想再對住呢個男人，一秒都唔想。」
阿康仍然不懂如何回應。
Johnson︰「OK，咁啦，我哋先理智啲處理呢件事。其實，你哋之前發生過啲咩事，講唔講得俾我知？」
Athena︰「我唔想再提。」
阿康看見Athena那麼決絕的樣子，感到很心痛，那種失落感，比之前被Jessie拒絕時更強烈。這令他想起兩年前追求她時的情景，仍然是歷歷在目。他一時未能回答Johnson的問題。
Athena︰「你點樣搵到我㗎？你點知我喺呢度做嘢㗎？明明我已經block咗你所有IG﹑WhatsApp，連你好兄弟Dylan我都block埋，你冇理由知道我啲嘢。莫非你又跟蹤我？」
雖然阿康到目前為止，仍未有開口說話，但Johnson聽到Athena對阿康的質疑，大約也估到二人之前發生過甚麼事。
Johnson︰「Athena，其實唔係阿康自己apply呢份工㗎，係我無意間喺一間餐廳見到阿康，覺得佢好適合呢份工，先主動邀請佢嚟面試，佢根本唔係主動嚟見工……」
Athena打斷Johnson的說話︰「咁可能係佢知道我係幫你做緊嘢，見到你去餐廳，佢先特登喺你面前搏表現，嚟引你注意呢！」
Johnson對Athena這樣的回答感到驚訝，因Athena處事一向成熟，不會過份主觀地去批判一件事或一個人。可想而知，當年阿康纏擾得Athena有多嚴重，Athena有多討厭阿康。
Athena︰「佢根本係一個病態嘅纏擾狂同跟踪狂，我唔會同佢一齊做嘢。如果Johnson你堅持要請佢，sorry，我會辭職，我陣間補返封信俾你。」
Johnson︰「Athena，有事慢慢講。」
Athena在公關和銷售方面都有很出色的表現，當年Johnson因認識Athena的父親，靠她父親的關係才能邀請到Athena來Smartoys幫手，慢慢幫公司打好了根基。老實說，Johnson不會為了阿康而放棄Athena。
「我發誓……」阿康突然高舉右手，並伸出三隻手指，是發誓的手勢。
「我事前係唔知Athena喺呢間公司做，我發誓！」阿康鼓起勇氣，說出第一句話。
「Athena，對唔住，以前我對你做咗好多好過份嘅嘢，但你相信我，我已經忘記咗你好耐，我只係想轉工，換一個新環境做嘢。希望你可以忘記我以前做過嘅嘢，當我係一般嘅新同事咁看待。」阿康放下手後，和Athena說出這番話。
Johnson望著Athena，希望她會接受阿康這位新同事。Johnson已經見了很多應徵者，也找不到像阿康般會賣命和全程投入的人。難得找到阿康，他不想再從頭招聘。
阿康再次打破沉默：「喺公司我會同你保持距離，只會同你講公事，只要你對我有唔舒服嘅感覺，你可以即刻出聲，我會即刻辭職，我唔想Johnson難做。」
阿康很久也沒試過一下子講那麼多的話。Athena望著阿康，本來望著Athena的他，立即逃避Athena的眼神。
Johnson︰「我承諾，我會做好監察，唔會俾你受到傷害。你覺得阿康有問題，即刻同我講，我會公平處理。」
Athena︰「好啦，我信你啦Johnson。」
Athena勉強答應了Johnson，讓阿康留在公司，自己也以大局為重，暫不再提辭職的事。
**********
Athena有三位好姊妹，她們分別是Chloe﹑Esther和Sophie，所以她們經常自稱「ACES女子組」，間中會相約出來聚會。今晚，Athena主動提出飯局，三人知道Athena有特別事，立即應邀出席。
她們臨時預約了一間五星級酒店的意大利餐廳，作為今晚聚會的地點。
Chloe︰「唔係咁大獲吓，嗰個宅男又嚟搵你！」
Sophie︰「咩宅男呀，係變態佬纏擾狂死毒男呀！高攀Athena都算啦，當時仲要攪到Athena咁唔開心。佢一定係兩年前被拒絕之後仍然死心不息，處心積慮要搵機會再接近Athena，扮晒唔知情咁嚟你公司做嘢。」
Athena︰「我唔知呀，我望住佢個樣，就諗起佢當時點樣騷擾我，好可怕呀！」
Esther︰「Athena，你出入要小心啲，我可以陪你。」
Athena︰「唔使，你都要拍拖，我有分數。」
Chloe︰「不如你辭職啦！」
Athena︰「我之前應承過Johnson，要幫佢公司生意上咗軌道先會走，我唔可以言而無信。既然Johnson應承咗唔會俾我再受傷害，佢又係我世叔伯，我唔可以令到佢難做。」
和好姊妹傾談過後，Athena心情已改善不少。回家後，她也想向男友George傾訴。可是，兩年前Athena和George開始拍拖之時，阿康仍然死纏Athena一段時間才收手，當時曾惹怒過George。Athena不想George擔心，說話時吞吞吐吐，最終因George太疲倦，Athena未講完他便睡著了。